DANIEL 4 - Cho Bible Common Language 2016

Nebukhadnezzar ah Akhnih vei nak Angmang

¹ Ghangpughang Nebukhadnezzar naw khomdek khan ung om ciah changpakhui gui, pahta gui la pa ng’tän gui avan am shin ah ng’thu cu m’khäh gui ci. “Ning yavaih gui nei!

² Hlüngtai ciah Khanpughi naw a nam hnuh ah cäicat gui vai la cäi aih gui vai cu ngai vä.

³ “Khanpughi naw a na m’dang ah cäicat gui vai cu dämduh aih ci nei! Ani naw am dang ah ca’i aih vai gui cu huham mah ci nei! Khanpughi cu ghangpughang ah kya ci, ani naw khonglän ung uk khai nei!

⁴ “Kei cu ka mang-im ung kyäp nep sei om ne, dämduh sei khawh mah ne ka yeikyai ci.

⁵ Cun ung phi ka ih sangung kyihkyawk vai ah ka ng’mang she sei, cäi ng’ä vai ah muimang ka hmuk ci.

⁶ Cun ah mang ah mawng na m’thein khai gui ah Babilon ung bawi mang gui avan cu thu khän ne ka khü gui ci.

⁷ Cängbang ci gui, cee gui, tukaih ci gui, kho m’khin thei ci gui, ami van law püi gui u sei, kei naw ka mang cu ka m’thein gui ci. Cun ung phi cun ah mawng cu ngami naw kä na m’thein hning ci gui.

⁸ Cun kawn ah Daniela cu lawk ci (ani cu Belteshazzar phi ming nam ci, cun cu ka Khanpughi ah ming ciah kyak ci) Theingcim ciah Khanpughi ah mümcha cu ani ung om ci, cun ah kyasei kei naw ka mang cu ka m’thein ci. Kei naw ka pyen nak ci:

⁹ Belteshazzar, cängbang ci gui ung ang vai pikbäih, Nang ung Khanpughi ah mümcha theing om sei, thuuk kau ci gim cu avan na hmat ci, cicu kei naw ka hmat ci nei. Shin ah ka mang ah amawng cu nang naw na m’thein ä.

¹⁰ “Kei ka ih sangung khomdek ah anglung lai ung sing ghing nu tumat om sei ka mang nak ci.

¹¹ Cun cu dämda law ne khomik han pha sei, khomdek khan ung chang avan naw a hmuh hning ah kyak ci.

¹² A hnah gui cu kyom ci, am theih gui cu a ghing ung be ci — khomdek khan avan ungka naw a ei vai ah ng’büh ci. A cun ah ang hnin ung khisa gui ng’yii ci gui, ang ban gui ung kha gui ng’bu tuk ci gui, ak ghing nici naw a cun ah m’theih cu ei ci gui.

¹³ “Cun ah mang ah mawng kei naw ka ngaih-tüh yah ung, cimgang ne tengkhen ciah khankho chang cu kyum law sei ka hmuk ci.

¹⁴ Ani naw ak aw m’caan ne a sha’u cu, ‘Sing ghing cu chu pit ne, ang ban gui chawm ne, a hnah gui ghu ne, am theih gui phiang yawp vä. A cun ah ka ung khisa gui la ang ban gui ung kha gui cu k’täm gui vä.

¹⁵ Cun ung phi ak hmui läi cu m’sii gui la kyei gui awn ven ne khit ne m’dek ung nawng shü vä. Lo ma m’ghaw hmu ah nawng shüt vä. “‘Tuhbäi a cun ah chang ah khan ah khüi baw sä, khisa gui la sing ghing gui awn atäng ah om sak vä.

¹⁶ Khokum chih ung ani cu chang ah m’lung ngaih kä om sei, khisa ah m’lung ngaih ah m’lung ngai khai nei.

¹⁷ Shin cu cimgang ne tengkhen ciah khanchang ah m’hnüt bäi ah kyak ci. Cun ah kyasei khaw päng ung chang nü am hmat sak vä, hlüngtai ciah Khanpughi cu hnicim chang ah uknak khaw avan ah khan ah a huham om ci nei. Ani naw ak yawpi ah chang pang phi ghü ne a cun ah huham cu pe hning ci nei.’

¹⁸ “Shin cu kei ah mang nei,” cine, ghangpughang Nebukhadnezzar naw pyen ci, “Tuhbäi Belshazzar aw, cun ah mawng cu na m’thein ä, ka bawimang gui a u naw phi kä na m’thein hning ci nei, cun ung phi nang naw na hmat hning khai, a i ah kyasei ci ung theingcim ciah Khanpughi ah mümcha cu nang ung om ci.”

Daniela naw Ng’mang K’phlan ci

¹⁹ Cun ung Daniela, Belteshazzar ah phi ami kh cu, cäicat aih neta a i phi kä pyen hlawt ne om ci. Ghangpughang naw ani am, “Belteshazzar aw, mang la mang ah mawng ung kä cäicat en ä” ci nak ci. Belteshazzar naw m’shang ne, “Mang la mang ah mawng cu nang ah phäh ah kä kya en ne na ga gui ah phäh ah a kyak vak ah kei naw ka ng’ya hlük ci nei.

²⁰ Sing ghing ng’shäi aih ne khomik han pha ci, khomdek khan ung chang nü naw a hmuh hning,

²¹ a hnah gui cu kyom ci, am theih gui cu khomdek khan avan ah ei ng’büh vai ah kyak ci. Khisa gui a ka ah ng’yii ci gui, ang ban gui ung kha gui ng’bu tuk ci gui.

²² Ghangpughang aw, nang cu ng’shäi ne m’htungkhong ciah sing ghing ah na kyak ci. Nang dämduh ng’ghawtai ne khankho mik na han pha ci, nang ah huham naw khomdek khan avan küm ci nei.

²³ Nang ghangpughang naw na ngäng yah ung khanchang kya law neta a pyen cu, “Sing ghing cu chu ne m’di vä, cun ung phi ak hmuicum’dek ung om sä. M’sii gui la kyei gui awn ven ne khit ne, loma m’ghaw hmu ah nawng vä. Cun ah chang ah khan ah khüi baw sä, ani cu khisa gui awn atäng ah kum chih ung om sak vä.’

²⁴ “Ghangpughang aw, cun ah amawng cu, hlüngtai ciah Khanpughi naw nang ah khan ah a i ah kya lawk khai cicu ang dang sak ah kyak ci nei.

²⁵ Nang cu hnicim chang ungka ning täm khai gui, khisa gui awn ata’ng ah nami om khai. Nang cu khokum chih ung seipat ah mäih ah khumghaw na ei khai. Kho häu ung na ip khai, khüi naw ning book shi khai. Cun kawn ah hlüngtai ciah Khanpughi naw hnicim chang ah uknak khaw avan k’pang ne, a ghü ah chang am pe hning ci, cicu nang naw na ng’kyaa khai.

²⁶ Khanchang naw sing hmui cu m’dek ung nawng shüt vai ah ng’thu bäi ci. Cun cu nang naw Khanpughi naw khomdek avan cu uk ci, cine nang kiaa kawn ah nang cu ghangpughang ah na kya ba khai ciah kyak ci.

²⁷ Cun ah kyasei ghangpughang aw, kei ah m’cäicat nak cu läk ä. Hmakat nak cu nawng ne düng nak cu bi ä, dukhaih cicu chimgein ä. Cun kawn ung nang cu k’täi ne na bühmang khai nei.”

²⁸ Shin gui avan cu ghangpughang Nebukhadnezzar ah khan ah gawk lawk ci.

²⁹ Cha gha lei-goi lüng khäta, ani cu Babilon khaw mang-im khan ah a hteh hton yah ung,

³⁰ Ani naw, “Teng vä, Babilon cu a i hlawk ah dämduh ci ang! Ka huham, ka hlüngtai nak, ka bämang nak, ka m’gäi nak ka dang sak nak vai ah ka cawh ah mang gaw ne.”

³¹ Ng’thu lung am gawng ung kä a luh law pha ung, khankho ah ka ng’thu k’aw gawk lawk ci, “Ghangpughang Nebukhadnezzar, kei ah ka ng’thu cu ngai ä Na mang-im huham cu tuhbäi nang ungka ka lak pyi nei.

³² Nang cu chang hmu ungka ka ning k’täm pyi ci nei. Khisa gui awn atäng ah om ne, khokum chih ung seipat ah mäih ah khu na ei vai nei. Cun kawn ah nang naw na ng’kyaa vai cu, hlüngtai ciah Khanpughi ung hnicim chang ah uknak khaw ah khan ah a huham cu om ci nei, cun cu ani naw a ghü ah chang am pe hning ci nei.”

³³ Cun ah ng’thu gui cu ang ghit ah akcang ah kya lawk ci. Nebukhadnezzar cu chang ah hmu ungka k’täm u sei, seipat ah mäih ah khu ei ne om ci. A pum ah khan ah khüi naw book shi ci. Alu sam cu hmuu ah mu ah mäih ah sei ne, am htin gui cu kha ah m’htin ah mäih ah ng’shäi lawk ci.

Nebukhadnezzar naw Khanpughi M’hlümtai ci

³⁴ “Khokum chih ang pyi kawn ah ghangpughang naw, kei naw khankho mik cu han dan neta, ka ng’shüm nak gawk law ba ci. Kei naw hlüngtai ciah Khanpughi cu m’hlüngtai ne, angtäi ghing ci am m’tamkhah nak la bämang nak cu ka pek ci. “Ani naw khonglän ung uk khai nei, Ani ah uknak kho cu ngawiyä om khai nei.

³⁵ Ani naw chang gui cu akholä ah mäih ah teng gui ci; Khankho ung khanchang gui la m’dek khan ung m’dek chang gui cu ani naw shum gui ci. Ani ah ng’yak hlü cu a u naw kä hnung tuk püi hlawt ci, Ani ah bi cu a u naw kä ng’shi k’thäh hlawt ci.

³⁶ “Kei ung ng’shüm nak a gawk law ba kawn ah, ka m’tamkhah nak, ka bawimang nak, ka bämang nak, la uknak khaw cu na pe ba ci. Ka bawi gui la ka chang vai gui naw na dou chang ci gui. Ayanä ah ta dämduh pi ciah m’tamkhah nak awn, ka bawimang huham cu na pe ba ci.

³⁷ “Tuhbäi kei, Nebukhadnezzar naw, khankho ghangpughang cu m’hlüngtai ne, m’tamkhah ne ka bämang sak ci nei. Ani ah abi phung cu düng ne taga ci nei. Chang ah ng’shei ne hnüntho ci gui cu ani naw ng’nein sak gui ci nei.”