DANIEL 3 - Cho Bible Common Language 2016

Chang päng naw Ghui Agup cu a Khawihnah vai ah Nebukhadnezzar naw K’bäi ci

¹ Ghangpughang Nebukhadnezzar naw ghui a gup cu pyang ci, cun cu metre m’ku lei-chih ah hlüng ci, metre thum ah ng’shawng ci, Babilon khopäng Dura khodou ung ami su “m ah kyak ci.

² Ghangpughang naw a bawi gui avan ami law vai ah k’bäi gui ci — mang hta gui, uktu ng’vai gui, uktu hmaw ba gui, bawimang gui, ngui kawt ci gui, suki gui, palik ng’vai gui la cun ah khopäng ung bawi gui ami van ah kyak ci. Ngami cu ghangpughang Nebukhadnezzar naw ang lin ah agup ap nak ung ami kai tu vai ah kyak ci.

³ Cun ah bawimang gui ami van ng’apnak vai ung ng’bum law u ne, agup ah ma ah ng’düi u kha’ta,

⁴ shätu chang tumat naw ak aw m’can ne,

⁵ changpakhui avan, pahta avan, khopäng avan gui aw! nangmi naw pyung puuk gui ah k’aw, pyung lawi, htiing, tingtäng, peen m’hlui gui cu nami ng’yak khai; cun kawn ah ahei tumkhawn gui phi nami ng’yak khai. Cun ah tumkhawn gui ami tün vai am, ghangpughang Nebukhadnezzar naw a pyan ah ghui gup cu m’khuuk dong ne nami khawihnah vai.

⁶ Cun ah kä m’khuuk dong ne kä khawihnah tui ciah chang cu ng’ai ne caang ciah meicaang ung ang ghit ah yuk shum vai nei ciah kyak ci.”

⁷ Cun ah tumkhawn gui ami ng’yak vai am, changpakhui pahta gui la khopäng gui ami van naw m’khuk dong u ne, ghangpughang Nebukhadnezzar naw ang lin ah ghui gup cu, khawihnah ci gui.

Daniela ah Teihpüi gui Thum cu Ng’thu kä Ami Ngaih ah Phäh ah M’kyuk gui ci gui

⁸ Acun ung Babilonian gui naw Jew k’bu “n ne thu ami sha “u nak vai om lawk ci.

⁹ Ngami naw ghangpughang Nebukhadnezzar ah ma ah, “Mi ghangpughang cu ghi ne ghing sa!

¹⁰ Nang ghangpughang naw thu nak bäi cu, tumkhawn ami tün vai am, chang päng naw m’khuuk dong ne ghui gup cu a khawihnah vai,

¹¹ kä m’khuuk dong ne kä khawihnah tuk ciah chang cu, meicaang ai ung yuk shum vai ciah kyak ci.

¹² Nang naw Babilon khopäng uk khai ah na tha gui — Shadrak, Meshak, Abedneko ni gui cu nang ah thu kä ngai ci gui, ngami naw nang ah khanpughi kä khawihnah ci gui, na ng’lin ah a gup ah ma ah kä kawp ci gui nei” cine pyen ci gui.

¹³ Cun ung ghangpughang cu ang htei ah m’lungshe neta, cun ah chang thum cu ama ah ami law püi gui vai ah thu k’bäi ci.

¹⁴ Ani naw ngami am, “Shadrak, Meshak la Abedneko, kei ah ka khanpughi khawihnah vai ah kei ah ka ng’lin ah ghui gup ah ma ah m’khuk dong vai ah, nami mak ci, cicu akcang ang?

¹⁵ Tuhbäi pyung puuk, pyung lawi, htiing, tingtäng, peen m’hlui la tumkhawn gui nami ng’yak vai am, m’khuk dong ne agup cu nami khawihnah vai, cun ah kä nami bi ung nangmi cu meicaang ai ung ang ghit ah ning shum gui vai nei, nangmi ning hun gui hning khai khanpughi om khai ah nami ngai ne ma?” cik ci.

¹⁶ Shadrak, Meshak la Abedneko ni naw m’shang u ne, ghangpughang aw, keimi kami mät naw kami mät kä kami shungvong khai nei.

¹⁷ Keimi naw kami khawihnah ah Khanpughi naw, mei caang ung la nang ah huhma ung, ana hun gui hning ung na hun gui khai nei.

¹⁸ Cun ah kä ana hun gui ah a kyak ung phi, nang ghangpughang naw na hmat vai cu, kemi naw nang ah khanpughi kä kami khawihnah khai, nang ah na ng’lin ah ghui agup ah ma ah kä kami m’khuk dong khai nei” cik ci gui.

Daniela ah Teihpüi Thum cu Sihnak Pek gui vai ah K’bäi ci gui

¹⁹ Nebukhadnezzar cu amlung kä üp hlawt sei Shadrak, Meshak la Abedneko ah khan ah m’lungshe neta a hmai sen ci. Cun ah kyasei ani naw a chang gui am, mei cu ak chih ah caang law pi khai ah cih sak gui ci.

²⁰ Ani naw thumkhän ne, a gakap ung akgai pi gui am, cun ah chang thum cu khih sak gui neta, mei caang ung shum sak gui ci.

²¹ Cun ah kyasei ngami naw khit gui ne — k’htu, suinu, lukhu avan m’suisak gui u neta, mei caang ung shum gui ci gui.

²² Ghangpughang naw tuhbäi mei cu caang aih ne ng’ling aih khai ah a bi sak gui ah kyak ci. Mei caang ung chang thum yuk shim gui ciah chang gui cu ami van mei naw ui gui ci.

²³ Shadrak, Meshak la Abedneko gui cu gui awn ami khih gui ah kyak ci, ngami cu mei caang ah ang lung ung yuk chah gui ci gui.

²⁴ Nebukhadnezzar cu ang ghit ah cäi ne ng’düi law neta, a bawi gui cu ng’shi gui ci, “Shin ah chang thum cu gui awn khit gui ne mei caang ung mi shum gui ciah kä kya ne ang?” cine ng’shi gui ci. Ngami naw, “Ghangpughang aw, a cun ah kami bik ci nei” cik ci gui.

²⁵ “Cun ung a i ah kyasei mei ung chang phli hteit shüi shüi u sei ka hmuh ang?” ci neta ng’shi ba gui mä ne, “Ngami cu gui awn khih gui ah kä kyak ci, ngami cu mei naw a uih ah mäih ah kä kyak ci gui — ak phli nak tumat cu khanchang ah mäih lawk ci.”

Chang Thum cu Chah Ba gui neta M’hlüngtai gui Ci

²⁶ Nebukhadnezzar naw mei caang ah m’kawt ung law neta khü gui ci, “Shadrak! Meshak! Abedneko! Küikyang ciah Khanpughi ah chang shäm gui! Lut law ba vä!” cik ci. Cun a ci vai am ngami cu ang ghit ah lut law ba ci gui.

²⁷ Mang hta gui, uktu ng’vai gui, uktu hmaw ba gui, la ghangpughang ah ahei bawi gui ami van law u ne, cun ah chang thum cu teng gui ci gui. Ngami cu mei naw a pi ah phi kä ui gui ci. Ami lumu phi kä khiit ci, ami suisak phi kä ui ci, meikhu ah phi kä thuk ci gui.

²⁸ Ghangpughang naw, “Shadrak, Meshak la Abedneko ah Khanpughi cu m’hlüngtai vai ani naw a khanchang tüi law ne, ani ah bii bi ne, ani ung ng’ap ciah shin ah chang gui cu gung gui ci nei. Ngami naw kei ah thu ka ngai u ne, ami mät ah Khanpughi ah kawn ah, ahei khanpughi khawihnah ne ami m’khuk dong nak vaisü ung, ami ghin nak pek ci gui nei.

²⁹ “Tuhbäi kei naw thumkhän ka bik ci, changpakhui tumat, pahta tumat, khopäng tumt cu, Shadrak, Meshak, Abedneko gui ah Khanpughi kä chang m’sui ne ng’thu a pyen ah a kyak ung, ani cu tu pit pit ne, a im cu phye ne k’bum vai nei. A shin ah ma’ih ah gung hning ciah Khanpughi a hawi kä om ci nei” cik ci.

³⁰ Cun kawn ah ghangpughang naw, Shadrak, Meshak, Abedneko gui cu Babilon khopäng ung ak hlüng pi ah han chaang gui ne tha gui ci.