DANIEL 2 - Cho Bible Common Language 2016

Nebukhadnezzar ah Ng’mang

¹ Nebukhadnezzar ghangpughang ah a kyak nak a kum goi nak ung ang mang shek ci. A cun naw ani cu cäi ng’a “Sak sei kä ip hlawt ci.

² Cun ah kyasei ani naw ng’cäbang thei ci gui, k’cee gui, mik hmuk ci gui, la cuun ci gui cu khü gui ne law ne ang mang ami k’phlaan vai ah k’thäh gui ci. Ngami law u ne ghangpughang ah ma ah ng’üi u khäta,

³ ani naw ngami a, “Kei cu ka mang ah phäh ah ka ng’ä ai ci nei. Cun ah mang cu a i ah shek khai cicu kei naw ka hmat hlük ci nei” cine ng’shi gui ci.

⁴ Ngami naw Aramaik ng’thu awn m’shang u ne, “Kami ghangpughang aw, ghi ne ghing ä Na mang cu na m’thein gui ä Ka mi ning k’phlan pek khai nei” cik ci gui.

⁵ Ghangpughang naw, “Kei naw ka m’lung ung ka k’bäi pyi ci, nangmi naw ka ng’mang cu nami na m’thein vai, cun ah ng’mang cu k’phlan ne phi nami na m’thein vai. Kä nami pyen hlawt ah a kyak ung, akpit am tawn ah ning kiük gui ne, nami im gui phi m’vut ah kyak khai ah ka cik khai.

⁶ Cun ung phi ka mang la a cun ah ng’phlan cu nami na m’thein hning ah a kyak ung, nangmi cu ning m’cümhnah gui ne, aktung ah ka ning m’tamkhah gui khai. Tuhbäi cun ah mang la cun ah mang cu k’phlan ne na m’thein law vä” cik ci.

⁷ Ngami naw ghangpughang cu pyen na bamä ci gui, “Na mang bäng na na m’thein gui ah a kyak ung ka mi phlan hning khai nei” cik ci gui.

⁸ Cun ung ghangpughang naw, “Ka ngaih ah mäih bä ah nangmi naw a khin nami ng’pyi sak ci nei. A i ah kyasei ci ung kei naw ka m’lung ka k’bäi cu nangmi naw nami hmu pyi ci.

⁹ Ka mang cu kä nami na m’thein ah a kyak ung m’kyuk nak atäng täng ah nami van am ka ning pe gui khai nei. Akhin a gawk law ung amawng ama cu ng’thawng ei lawk khai ah nangmi naw ngai ne, hleei ne nami na m’thein khai ah nami yum yawp ci nei. Mang cu na m’thein vä, cun ung cun na mang cu k’phlan ne nami na m’thein hning khai ah kei naw ka hmat khai nei.”

¹⁰ M’cumcäi ci gui naw, “Kami ghangpughang aw, nang naw na hmat hlü ah mawng ning m’thein hning ci khomdek khan ung a u kä om ci nei. A u ghangpughang, dämduh pikbäih ci, huham mah pikbäih ci naw phi, a chang gui, ng’cäbang ci gui, ceek ci gui, cun gui am cun ah mäih ah kä shi thäh gui man ci nei.

¹¹ Nang ghangpughang ah na ng’shi gui cu khak aih ci nei, khanpughi gui ah kawn ah a u naw kä bi hning khai nei, cun ah khanpughi gui cu chang gui awn atäng ah kä om ci gui nei” cik ci gui.

¹² Cun ung ghangpughang cu m’lungshe aih neta, Babilon ung m’cumcäi ciah bawi gui ami van, ami ngawn gui vai ah ng’thu k’bäi ci.

¹³ Cun ah kyasei Daniela la a teihpüigui mah ah m’cumcäi ci gui ami van ngawn gui khai gui ah pawng ci gui.

Ng’mang K’phlan vai ah Khanpughi naw Daniela Am M’hnuh ci

¹⁴ Daniela cu ghangpughang ngäng ciah gabawi Arioch, ngami ngawn gui vai k’bäi ciah om nak ah hteit neta, geing na ne ng’thu pyen ci,

¹⁵ A i ah kyasei shin ah mäih ng’thu k’bäi ghangpughang naw a bi ang cicu ng’shik ci. Cun ah kyasei Arioch naw amawng avan cu Daniela am m’thein tuk ci.

¹⁶ Daniela cu ang ghit ah ghangpughang ah hteit neta, akhin api a pek vai, cun ung ani naw mang cu k’phlan hning khai ah pyen ci.

¹⁷ Cun kawn ah Daniela cu im ah hteit ba neta ateihpüi gui, Hananiah, Mishela la Azariah am amawng avan cu m’thein tu gui ci.

¹⁸ Ani naw, “Khankho Khanpughi naw ana m’thein gui vai ah mi taigü khai, cun ah thuuk ciah ng’mang cu k’phlan ne ana m’thein gui vai ah mi thäh khai. Cun ung Babilon ung m’cumcäi ciah bawi gui awn atäng ah kä na ngawn tu gui khai gui nei” cik ci.

¹⁹ Acun ah mu “Ung cun ah thuuk ciah mang cu Daniela ah muimang ung dang law khäta, ani naw khankho Khanpughi cu m’tamkhah ci:

²⁰ “Khanpughi cu “Cüivai ci, huham mah ci nei! Khong län ung ani cu m’hlüngtai vä.

²¹ Ani naw akhin la khokhi aa cu k’pang ci nei; Ani naw ghangpughang cu hmoh ne chah ba ne cik ci nei; Ani naw cüivai nak la hmuhmat nak cu pek ci nei.

²² Ani naw thuuk ci la ng’thup ci gui cu dang sak ci nei; Ani naw hmüp khui ung ng’thup cicu hmat ci nei, ani amät cu akdei naw ng’vong ci nei.

²³ Ka pupa gui ah Khanpughi aw, ning m’hlüngtai ne ka ning tamkhah ci nei, Nang naw cüivai nak la thagui na na pek ci; Nang naw ka taigü na m’shang ne ghangpughang am a i cha ah m’thein vai cu na na m’hmuh gui ci nei.”

Daniela naw Ghangpughang am Ng’mang la Ng’mang Phlan cu M’thein ci

²⁴ Cun ah kyasei Daniela cu m’cumcäi ciah bawi gui, ngawn gui vai ah ghangpughang naw akbäi sak ah, Arioch ah hteit neta, ani naw, “Sihnak kä pe gui cang ä, kei cu ghangpughang ah na hteh püi ä, kei naw ani ah ng’mang cu k’phlan ne ka m’thein khai nei” cik ci.

²⁵ Acun vai am Arioch naw Daniela cu ghangpughang Nebukhadnezzar ah ma ah hteh püi neta, ghangpughang am m’thein ci, “Nang ghangpughang ah ng’mang phlan ne ning m’thein hning ciah Jew chang omtu tumat cu kei naw ka hmuk ci nei.”

²⁶ Ghangpughang naw (Belteshazzar ah ami sui ah) Daniela cu pyen na ne, “Ka mang la cun ah mang phlan cu nang naw na na m’thein hning ne ma?” cik ci.

²⁷ Daniela naw, “Ghangpughang aw, cun ah ng’mang ning m’thein hning ciah, a u phi cuun ci, ce k ci, cängbang ci, pui kaih ci, kä om ci nei.

²⁸ Cun ung phi ak thuuk pi m’dang hning ciah khankho Khanpughi om ci nei. Ani naw nang ghangpughang am ngawi ah a i ah kya lawk khai ci cu, ning hmuh sak pyi ci nei. Tubäi kei naw nang na ih yah ung na muimang nak ah ng’mang cu ka ning m’thein khai nei.

²⁹ “Nang ghangpughang naw na ih sangung ngawi ah a i ah kya lawk khai cicu na mang nak ci nei; akthuuk pi dang sak ciah Khanpughi naw, a i ah kya lawk khai cicu nang am ning m’hnuh ci nei.

³⁰ Tuhbäi cun ah akthuuk gui cu kei ung dang sak ci nei, Cun cu a hei gui ah ta kei, ka cüivai pi su ah kä kyak ci, nang ghangpughang naw na mang ah mawng na hmat nak vai la nang ung gawk lawk khai ah ngaih-tüh nak gui na hmuhmat nak vai ah kyak ci.

³¹ Ka ghangpughang aw, nang ah na ih mang ung teng ung, kyih vai ah kya ne pyü ne ng’shü ciah agup nu cu na ma ah ng’düi sei na hmuk ciah kyak ci nei.

³² Cun ah alu cu ghui aknipi awn pyan ah kyak ci, ang kyang la a ban cu ngui awn pyan ah kyak ci, a poi la a phei gui cu kyei awn pyan ah kyak ci;

³³ am tan cu m’sii awn pyan ah kyak ci, a khaw avang cu m’sii, avang cu m’deknai ah kya ci.

³⁴ Nang naw cun cu na teng sangung lung akdäm nu cu a u naw kä a tawn ah hlit ne kya law ne, m’sii la ng’nai awn pyan ah agup ah khaw cu kyak ne ci hnget ci.

³⁵ Ang ghit ah m’sii ni, m’deknai ni, kyei ni, ngui ni, ghui ni gui cu, khui ne ng’pyäih ne, cha-khaw ah htang leh nak ung m’vut khui ah mäih ah kyak ci gui nei. Khokhi naw cun gui avan cu yon yawp sei, api phi kä pawih ba ci. Cun ung phi lung nu cu däm law ne, khomhtung nu ah kya law ne khomdek khan avan cu küm ci.

³⁶ “Shin cu ng’mang ah kyak ci. Ghangpughang naw, tuhbäi acun ah mawng cu ka ning m’thein khai nei.

³⁷ Ka ghangpughang, nang cu ghangpughang gui avan ung na dämduh pikbäih ci nei. Khanpughi naw nang cu Uktubawi ah nin pyang ci, huham, m’gäi nak la m’tamkhah nak ning pek ci.

³⁸ Ani naw nang cu m’dek khan avan uktu la khisa gui la kha gui uktu ah ning pyang ci, nang cu ghui lupum ah na kyak ci.

³⁹ Nang ah kawn ah ghangpughang ahei om lawk khai, ani cu nang hlawk ah kä dämduh khai, cun kawn ah ak thum nak ah kyei uktubawi om lawk khai, ani naw m’dek khan avan uk khai.

⁴⁰ Cun kawn ah ak phli nak ah Uktubawi om lawk khai, ani naw m’sii ah mäih ah khüighaat ne apäng avan cu hnget sak yawp khai. Ani naw ana om ma ciah uktubawi avan cu dep ne güt gui khai.

⁴¹ Khawlek la khawnu gui cu ateih m’deknai, ateih m’sii ah kyasei na hmuk ci. Cun cu ng’pai ciah uktu khaw ah kyak ci. Acun ung m’sii ah mäih ah thamah nak amshah om khai, a i ah kyasei ci ung cun ung m’deknai awn ng’caw ciah m’sii ah om ah hmawk ah kyak ci.

⁴² Khawnu — m’sii ateih la m’deknai ateih — ah kyak ci ci cu, uknak khaw ateih cu thamah ne, ateih cu tha ken khai ciah kyak ci.

⁴³ M “sii cu m’dek awn ng’caw ci, cun phi nang naw na hmuk ci. Cun cu a i ang ci ung, khaw uktu gui naw ami kyong khui chang gui cu, ami ma’t chungla sak gui ne kawng a “t nak bik khai gui. Cun ung phi m’sii la m’deknai k’caw ne kä gah ah mäih ah ngami cu kyak khai gui.

⁴⁴ Cun ah uktu gui ah a khin ung khankho Khanpughi naw kä ng’pyi hlawt ciah uknak khaw cu m’düih khai. A cun cu a u naw kä näng hlawt khai, ani naw ahei uknak khaw gui cu m’di yawp ne, khonglän ung om khai.

⁴⁵ Lung nu cu a u naw kä a tawn ah hlit ne kya law ne, m’sii ni, kyei ni, m’deknai ni, ngui ni, ghui ni awn pyan ah a gup cu, shudeng ciah nang naw na hmuk ci. Dämduh ciah Khanpughi naw ngawi ah a i ah kya lawk khai cicu nang ghangpughang am a ning m’thein ah kyak ci. Kei naw nang ah mang akcang cu ka ning m’thein ci, acun ah mawng akcang phi ka ning m’thein ci.

Ghangpughang naw Daniela cu M’cümhnah ci

⁴⁶ Cun kawn ah ghangpughang Nebukhadnezzar cu m’dek ung ng’boop neta khawihnah nak la douthak nak cu Daniela am ami pek vai ah thu k’bäi ci.

⁴⁷ Ghangpughang naw, “Nang ah Khanpughi cu Khanpughi avan ah dämduh pi ci nei, ghangpughang gui ah bawipa ah kyak ci, cäiaih gui vai m’than ciah kyak ci. Kei naw shin cu ka hmat ci, a i ah kyasei ci ung, shin ah cäiaih vai gui cu nang naw na m’dang thei ah hmawk ah kyak ci.”

⁴⁸ Cun kawn ah ani naw Daniela am bawimang ak hlüng pi pe ne, am cümhnah nak akda pek ci, Babilon khopäng ung uktu ah tha ne, mang im angvai gui avan ung angvaipi ah tha ci.

⁴⁹ Daniela ah k’thäh nak awn ghangpughang naw, Shadrak, Meshak la Abedneko gui cu, Babilon khopäng uknak täng ung angvai gui ah bi sak gui ci.