DANIEL 11 - Cho Bible Common Language 2016

¹ Ani ah bi vai cu, kei ana m’htei vai, ana shungvong vai ah kyak ci.

² “Tuhbäi kei naw ka ning m’thein law vai cu akcang ah kyak ci nei.” Khanchang naw pyen ci, “Persia cu ghangpughang thum naw uk ba khai gui, cun kawn ah ak phli nak naw uk khai. Ani cu ahei gui ami van ah bämang pi khai. Ani cu huham mah pikbäih, bühmang pikbäih ne a kyak law ung Kreece uktu khaw cu ghüh law tuk khai.

Egypt la Siria Uktu Khaw gui

³ “Cun kawn ah m’gäi ciah ghangpughang om lawk khai. Ani naw khaw ak chün uk ne ang yak hlü päng ci bik khai.

⁴ Cun ung phi a huham a hlüng pikbäih sangung ani ah uknak khaw cu she ne, phli ah ng’bou khai. Ani ah ng’shon ah kä kyak ciah ghangpughang gui naw ani ah hnün ung uk khai gui. Cun ung phi ngami cu ani ah mäih ah kä huham mah khai gui.

⁵ “Egypt ghangpughang cu thamah lawk khai. A gabawi gui ungka tumat cu thamah law pi ne, dämduh ciah uktu khaw cu uk khai.

⁶ Khokum api shou khäta Egypt ghangpughang naw Siria ghangpughang cu ng’gei püi khai, a chu nak vai ah a hta hnumi pe tuk khai. Cun ung phi ami ng’gei nak cu kä khäng khai, amät, a cei, a hta la ani awn atäng ah a chang shäm gui ami van cu ngawn gui khai gui.

⁷ A cun ng’lung ung ani ah a mätyah gui ungka tumat cu ghangpughang ah kya lawk khai. Ani naw Siria ghangpughang ah gakap gui cu tu gui ne, ami vongpang kyong ah luh shi gui ne hnim gui ci.

⁸ Ani naw ami khanpughi gui ah agup gui la a cun ah khanpughi gui ami khawihnah nak ah ghui la ngui khawh gui cu Egypt khaw ah hteh püi ba ci. A ding gei nak khokum a shou kawn ah,

⁹ Siria ghangpughang naw Egypt cu khaai lawk khai, cun ung phi ng’hlat ba khai.

¹⁰ Siria ghangpughang ah hta gui naw ng’tuk vai ah pawng u ne, gakap akda m’cut khai gui. Cun gui ungka tumat naw tui k’law ah ng’güt ah mäih ah gakap ng’vongpang tumat cu tuk khai.

¹¹ Egypt ghangpughang cu m’lung she neta, Siria ghangpughang cu ng’tuk püi ne, a gakap akhak cu khäm ci.

¹² Ani cu a näng ah phäh la chang akda a ngawn ah phäh ah chang ah ng’shei khai, cun ung phi ani cu k’täi ne kä näng hlawt khai.

¹³ “Siria ghangpughang cu ng’hlat ne hteit ba ne, ayanä kaa ah ta da pi khai ah gakap m’cut ba khai. Akhin a gawk law ung ani cu likhim akbe, gakap akhak awn ng’hlat law ba khai.

¹⁴ Cun kawn ah chang akda naw Egypt ghangpughang cu hnungtuk püi khai gui. Daniela, na pakhui ungka m’gäi m’cik ci gui naw, muimang ami hmuh ah hmawk ah hnungtuk khai gui, cun ung phi ngami cu hnim gui khai gui.

¹⁵ Cun ah kyasei Siria ghangpughang naw gaw k’paang mang gaw cu tu ne khäm khai. Egypt gakap gui cu k’täi ne kä ng’tu ba khai gui, ngami ungka akni pi gui phi ami thagui kä om ba khai.

¹⁶ Tu law gui ciah Siria gui naw ami m’hni ah bii bik khai gui, a u naw kä hnungtuk püi gui khai. Ani cu shaitak ah khaw ung düi ne, cun ah khaw avan cu amät ah huham kyong ung chum khai.

¹⁷ Siria ghangpughang naw a gakap avan phook ne ng’tuk vai ah pawng khai. Cun kawn ah aga ah uktu khaw a shum nak vai ah, ani naw aga am a hta hnumi chu na sak ne ng’khawt sheng nak bik khai, cun ung phi ani ah pawng püi cu kä näng khai.

¹⁸ Cun kawn ah ani naw tuinu kem ung om ciah pakhui khaw gui cu tu gui ne akda näng gui khai. Cun ung phi a khaw hei ang vaihta naw ani cu hnim ne, ani ah m’gäi nak cu ng’pyi sak khai. Akcang ah Siria ghangpughang cu ani naw shum sak khai.

¹⁹ Ghangpughang cu amät ah khaw mang gaw paang ah hteit ba khai, cun ung phi ani cu hnim khai gui, cun cu ani ah ng’pyi nak ah kyak khai.

²⁰ “Ani ah kawn ah ahei ghangpughang om law ba khai, ani naw a bawi tumat cu tüi ne, a uktu khaw ah a bämang nak vai ah akhon loh sak gui ne, chang gui cu shedam na gui khai. Kä sho pha sei ghangpughang cu ngawn khai gui, cun ung phi chang ah ng’lung ah kä kyak khai, ng’tuk nak ung ah kä kyak khai.

Siria ah Ghangpughang K’She

²¹ Khanchang naw hteit ne am thein cu, “Cun kawn ah ka Siria ghangpughang cu changshe ah kyak khai, ghangpughang ah kä khin ciah kyak khai, ani naw kä ngaih-tüh ah law ne huham khäm khai.

²² Ani hnungtuk püi ci phung cu Khanpughi ah taigütung ah a kyak ung phi k’täm ne tuthat khai gui.

²³ Ani naw shaitak bi ne ahei pakhui gui m’hleeihlak gui khai. Ani naw khaw aläm hta a uk pang ung phi, ani cu thamah law pi pi khai.

²⁴ Ani naw kä pyen sak ah bühmang ciah khopäng tumat cu tu ne khäm ne, apupa gui ah kä bi man cu bik khai. Ani naw ng’tuk nak ung a gah ah khawh gui cu a hnu ah läk ci gui am tei gui khai. Ani naw mang gaw paang gui tuk khai ah pawng khai, cun ung phi ani ah khin cu a shäng pyi khai.

²⁵ “Ani naw gakap akda awn Egypt ghangpughang cu king ne tuk khai, Egypt naw phi huham mah ciah gakap akda awn tu tu ba khai ah pawng khai. Cun ung phi Egypt ghangpughang cu m’hleeihlak u sei kä näng khai.

²⁶ Ani awn ng’et pikbäih ciah ang vai gui ne dishum sak khai gui. A gakap akda ngawn gui khai gui, a gakap mawng mah avan cu hnim khai gui.

²⁷ Ghangpughang hnih cu tawnglang tumat ung atäng ah ngo ne ei khai goi. Cun ung phi ani m’lung ngaih cu sheka sei tumta la tumat ng’thuvi na tuk khai goi. Ngami naw ami ng’yak hlü kä gah khai gui, a i ah kyasei ci ung ngami ah a khin kä gawk law phak ci.

²⁸ Siria ghangpughang naw tuh na a khäm ah khawh avan hteh püi ne a im ah hteit ba khai. Ani naw Khanpughi ah chang gui ah yum nak cu m’di vai ah k’bäi ci. Ani naw amät ah m’hni hni ah bi neta amät ah khaw ah hteit ba ci.

²⁹ “Shou hta khäta ani naw Egypt cu tuba mä khai. Cun ung phi tuhbäi läi apäng ahei ah ana kya yawp khai.

³⁰ Roman chang gui naw htinpaw awn law u ne ani cu hnungtuk püi khai gui, ani cu kyi kyawk khai. “Cun kawn ah ani cu m’lung she ne ng’hlat ba neta, Khanpughi ah chang gui ah yum nak cu m’di khai ah tha nak khai. Cun ah yum nak nawng shüt ciah chang gui ah m’cumcäi phi ani naw läk khai.

³¹ Am shah gakap gui naw Taigüim cu shemshai sak khai gui. Ngami naw a hnüüptä khawihnah nak cu düm sak khai gui. Kyihkyawk shemshai vai kyak cicu m’düih khai gui.

³² Ami yum nak nawng shüt ciah chang gui cu ghangpughang naw m’hleeihlak gui ne, amät täng ah ami kyak vai ah ci gui khai. Cun ung phi Khanpughi läk ciah chang gui naw ng’tuk püi tuba khai gui.

³³ Cüivai ciah ang vaihta gui naw chang akda am cüivai nak ah mawng m’thein khai gui. Cun ung phi kä shou pha sei amshah cu ng’tuk nak ung ngawn gui khai gui, amshah cu guttep u ne thawng ung chum khai gui.

³⁴ Ngawn sheh nak cu om gäk gäk khai, ngami ung ng’dawn law tuk ciah chang akda naw ami mät ah phäh bäng ah ami bi ung phi, Khanpughi ah chang gui naw api ah m’hteihtang nak gah khai gui.

³⁵ Cüivai ciah ang vaihta gui cu ngawn gui khai gui cun ung phi cun ah ami ngawn ah phäh ah chang gui cu theingthap lawk khai gui. Shin cu Khanpughi ah m’hnüt nak ah khin kä a gawk pha ah chuih a cun ah kya lä khai.

³⁶ “Siria ghangpughang naw amät ah m’hni ah bik khai. Ani cu khanpughi nü ah dämduh pi ne, hlüngtai ciah Khanpughi ah phi bämcam pi ciah pyen ne khähghah khai. Ani naw Khanpughi naw am kyuk ah khin ung khüt sei, a cun ah bik khai. Khanpughi naw a pawng püi ah mäih ah akcang ah bik khai.

³⁷ Ghangpughang naw apupa gui ah khawihnah man ah Khanpughi la hnumi gui ah m’hni ah Khanpughi cu a i ah kä sui khai. A i ah kyasei ci ung ani naw cun gui avan ah dämduh pi ciah ngai khai.

³⁸ Cun gui ah a hnün ung vongpaang gui ngäng ciah Khanpughi cu ani naw m’tamkhah khai. Ani naw ghui ni, ngui ni, pyülung ni la ahei aküikyang gui cu, apupa gui naw kä ami khawihnah man ah, Khanpughi am douthak khai.

³⁹ Ani naw ang vongpaang gui a shungvong nak vai ah a khaw hei khanpughi khawihnah ciah chang gui cu mang gui khai. Ani uktu ah dou ciah chang gui cu akdäm ah m’tam gui khai, yung ak hlüng ung tha gui khai, ng’chuh ah khobung phi pe gui khai.

⁴⁰ “Siria ghangpughang ah akhin ang pyi law ung, Egypt ghangpughang naw tu lawk khai. Siria ghangpughang naw a huham avan, yatha gui, ng’sela gui la htinpaw akda mang ne ng’tuk püi tuba khai. Ani naw tui klaw ah mäih ah khopäng akda cu tu gui khai.

⁴¹ Ani naw shaitak ah khaw phi tuk khai, chang tämkäp phia khak ngawn gui khai, cun ung phi Edom, Moab, la Ammon ah ak eng täng khaw gui cu phyawng khai gui.

⁴² Ani naw cun ah khopäng gui a tuk law ung Egypt khaw phi kä pawih khai.

⁴³ Ani naw Egypt naw a thuh ah m’kümkhawh ah kyak ciah ghui, ngui la ahei a phu küi khawh gui cu la yawp khai. Ani naw Lipya la Sudan khaw phi khäm khai.

⁴⁴ Ani cu ak kyang täng la a siiptäng ah kaa lawk ciah ng’thu naw cäicat sak sei, ani naw aknui ah tu gui khai, chang akda ngawn gui khai.

⁴⁵ Ani naw tuinu la Taigüim ah om nak ah khomhtung ah ng’lak ung mang im gui co khai. Cun ung phi ani cu m’htei tuk khai a u kä om sei, a cun ung sik khai.