DANIEL 10 - Cho Bible Common Language 2016

Taikris Tuinu Pei ah Daniel ah Muimang

¹ Cairus cu Peisia ghangpughang ah a kyak nak a kum thum ung Belshazzar ah phi ami pyen ah Daniela ung ng’thu m’khäh gawk lawk ci. Thu m’khäh cu akcang ah kyak ci, cun ung phi kä hmat hlawt vai ah kyak ci. Cun cu ani ah muimang ung ng’phlan ne gawk lawk ci.

² Cun yah ung kei cu hnüüp m’ku lei ät ka thüikyap ci.

³ Hnüüp m’ku lei ät kä ang pyi pha ah chuih kei cu buh meh akni kä ka ei ci, sapyit tui phi kä ka awk ci, ka lu phi kä ka huih ci.

⁴ Khokum ah a cha ät nak, a hnüüp mku lei phli nak ung m’gäi ciah Taikris tuinu kem ung ka ng’düi ci.

⁵ Kei naw hang mang neta linen sui sui ne, ghui ni kheipat pat ciah chang tumat cu ka hmuk ci.

⁶ Ani ah pumsa cu pyülung ah mäih ah vai ci, ani ah hmai cu kho lailäp ah mäih ah khang ci, amik cu mei ah mäih ah ng’shü ci. Ani ah akut gui la a khaw gui cu kyei m’tui ah mäih ah vai ci. Ani ah ak aw cu chang hli nän ah k’aw ah mäih ah ng’hmum ci.

⁷ Muimang hmuk cicu kei ka mät bäng ah kyak ci. Kei awn atäng ah om ciah chang gui naw a i phi kä hmu tuk ci gui, ngami cu kyi ne dawng ne ng’thup ci gui.

⁸ Kei ka mät bäng cun ung na nawng shüt u sei, cäi vai ah muimang cu ka ngäng ci. Ka ng’düi hlawk khai ah thagui kä om ba ci, ka hmai cu ng’ham sei a u naw kä na hmat ba ci.

⁹ Kei naw ak aw cu ng’ya neta m’dek ung ng’baw lawk ne kyu ne a i kä ka shüm ba ci.

¹⁰ Cun kawn ah kut naw kei cu na k’pang neta, ka kut la ka khaw ung na m’tho ci, kei cu ka ng’hlet lä ci.

¹¹ Khanchang naw kei am ana pyen nak cu, “Daniela, Khanpughi naw ning m’hni ci. Ng’düi law ne kei naw ka pyen law vai cu geing na ne ngai ä. Kei naw nang cu ka ning tüi ci nei.” Ani naw shin ah a pyen yah ung kei ka ng’düi lawk ci, ka ng’hlet lä ci.

¹² Cun kawn ah ani naw, “Daniela, kä na kyih vai nei. Nang naw hmuhmat nak na gah vai ah na mät naw na mät ng’neim sak ne, na k’ba’i ah hnüüp ung tün ne, Khanpughi naw na taigü cu ng’yak ci nei. Kei cu nang ah taigü ka ning m’shang khai ah ka lawk ci nei.

¹³ Persia uktu ah khanhta ng’piang naw hnüüp m’ku lei ät ung na hnu nak ci nei. Cun kawn ah khanchang gui ungka ang vaipi tumat Michaela naw law ne kei cu na m’htei ci, a i ah kyasei ci ung Persia ung kei cu ka mät hta bäng ka om shüt ciah kyak ci.

¹⁴ Nang ah na chang gui ung ngawi ah a i ah kya lawk khai ci cu, kei naw law ne ka ning hmuhmat sak ci nei. Shin cu ngawi ah kya lawk khai ah mawng muimang ah kyak ci.”

¹⁵ Ani naw shin ah a pyen vai am kei cu m’dek teng ne ang thu ka ah ka om ci.

¹⁶ Cun kawn ah chang ah mäih lawk ciah khanchang naw akut shäng ne ka m’nei na tawk ci. Kei naw ani ka pyen nak ci, “Bawi aw, shin ah muimang naw tha na ken sak sei, kei kä ng’düm ne ka ng’hlet cinei.

¹⁷ Kei cu bawi ah ma ah ng’düi ciah chang shäm ah mäih ah ka kyak ci nei. A i hawkcha ah nang ka ning thu püi khai aw? Kei ung thagui la ka ng’ghi nak phi kä om ba ci nei.”

¹⁸ Hnü ät mä ani naw na k’pang bamä khä ta, ka thamah law ba ci.

¹⁹ Ani naw pyen ci, “Khanpughi naw ning m’hni ci nei, cun ah kyasei a i naw kä ning ng’ä en sak sä, kä ning kyih en sak sa.” Ani naw shin ah a pyen yah ung, kei naw thamah ba pi neta ka pyen cu, “Bawi aw, nang naw na pyen vai cu na m’thein ä. Nang naw na na hüiyang sak pi ci nei.”

^20-21 Ani naw pyen ci, “Kei a i ah kyasei nang ah ka law cu na hmat naw? Düng ciah ca-uk ung ami guk cu nang ung m’than vai ah kyak ci nei. Tuhbäi kei naw hteit ba ne Persian ngäng ciah khanchang cu ka tuk khai nei. Cun kawn ah Kreece ngäng ciah khanchang cu dang lawk khai nei. Michaela, Israel gui ngäng ciah khanchang ah kawn ah kei na m’htei ci a u kä om khai nei.