DANIEL 1 - Cho Bible Common Language 2016

DANIEL LA A TEIHPÜI GUI AH MAWNG ( 1:1—6:28 ) Nebukhadnezzar ah Mang Im ung Chang Nong

¹ Judah kho ung Jahoiakim ghangpughang ah a kyak nak a kum thum nak ung Babilonia ghangpughang Nebukhadnezzar naw Jerusalem cu tu ne mang gaw cu koi ci.

² Bawipa naw ghangpughang Jehoiakim cu ani am pha sak ne, Taigüim ung m’kümcu ani am khäm sak ci. Ani naw thawng kyum amshah gui cu, Babilon ah amät ah khanpughi gui ah pum im ah hteh pui ne ami khäm ah m’küm gui cu pum im ah khawh gim nak ung tha gui ci.

³ Ghangpughang naw a bawi angvai pi Ashpenaz am k’bäi ne a pyen nak cu, Israel omktu gui ah ng’lung ungka, bawi gui ah kyong khui gui ungka chang nong gui la mang ah kyong khui ungka gui, a ghü gui vai ah kyak ci.

⁴ Cun gui cu kyom sang khai gui, hmuhmat khai gui, cüivai khai gui, ng’thei thang hning khai gui, ami pumsa ung pyen vai kä om khai, cun ah kyasei cun gui cu ghangpughang ah im ung bii bi hning khai gui. Ashpenaz naw cun gui cu Babilonian ca gui thei, phat thei khai gui ah am thei gui vai ah phi kyak ci.

⁵ Ngami am a hnüüptä sei ei la sapyit tui ami pek gui vai ah phi ghangpughang naw k’bäi ne pyen na gui ci. Cun ah ami ng’thei nak kum thum a lüng kawn ah ngami cu ghangpughang ah ma ah ami hteh püi gui vai ah kyak ci.

⁶ Cun ah ami ghü gui cu Daniela, Hananiah, Mishael la Azariah ah kyak ci, ngami ami van cu Judah pakhui ungka ah kyak ci gui.

⁷ Bawi angvai pi naw ngami cu ming akthai pe gui ci: cun gui cu Belteshazzar, Shadrak, Meshach la Abedneko ah kyak ci gui.

⁸ Mang im ungka ei ei ne sapyit tui awk nak awn kä theingthap nak ung kä gawk vai ah Daniela naw amlung pyang pyi ci. Cun ah kyasei ani naw, Ashpenaz naw am thei thang tu vai ah k’thäh ci.

⁹ Cun ah kyasei Khanpughi naw Daniela cu Ashpenaz naw a chimgein vai ah bii bik ci.

¹⁰ Ashpenaz naw ghangpughang cu kyih neta, Daniela a pyen nak cu, “Ghangpughang naw nangmi ah ei vai, awk vai cu ak bäi pyi ah kyak ci, a hei chang nong gui ah mäih ah nangmi cu kä nami müisa law ah a kyak ung, ani naw kei cu na ngawn khai nei.”

¹¹ Cun ah kyasei Daniela cu a mät la a teihpüi “gui thum ngäng gui khai ah Ashpenaz naw a hmoh ah chang ah hteit neta, ani naw,

¹² “Hnüüp gha ung keimi cu na m’nüm gui vä, ei vai thui an la awk vai tui bäng na pe gui vä.

¹³ Cun kawn ah mang im ung ei ei ciah chang nong gui awn keimi cu na m’täng gui vä, keimi a i ah mäih ah kami kyak law cu na teng gui u neta, m’hnüt bäi nak cu bi vä” cik ci.

¹⁴ Ngami hnüüp gha ung m’nüm gui vai cu ani naw yum ci.

¹⁵ Hnüüp gha a lüng kawn ah ngami cu mang im ungka ei ei ci gui ami van ah ta gai gawng law pi ne thamah law pi ci gui.

¹⁶ Cun ah kyasei ngäng gui ciah chang naw, ghangpughang naw ami ei vai a pek gui ah hnün ung thui an bäng pe ne ei sak gui ci.

¹⁷ Khanpughi naw cun ah chang nong phli am, ng’thu la ca la ngaih thei nak, hmuhmat nak la m’khüt näng nak cu pe gui ci.

¹⁸ Ghangpughang naw akbäi nak ah khokum thum ng’pyi law khäta, chang nong gui ami van cu Ashpenaz naw Nebukhadnezzar ah hteh püi gui ci.

¹⁹ Ghangpughang naw ami van ng’thu püi gui neta, Daniela, Hananiah, Mishaela la Azariah ni gui cu, a hei gui ah cüivai pi u sei hmu gui ci. Cun ah kyasei ngami cu ghangpughang ah mang im chang ah kya lawk ci gui.

²⁰ Ghangpughang naw a i ah mawng ang shi gui ung phi, a i cheishoh nak a thawh law ung phi, shin ah chang phli naw, a uknak kho avan ung om ciah, ng’cängbang ci gui, cecai ci gui ah ta agha vai ah hmuhmat law pi ci gui.

²¹ Daniela cu Persia ghangpughang Sairus naw Babilonia tu ne a näng güt ung mang im ung om lä ci.