ATÜNNAK 9 - Cho Bible Common Language 2016

Noah Am Khanpughi Ah Ng’thumkhän

¹ Khanpughi naw Noah la a hta gui cu hriham pe gui neta, “Nangmi cu akda ah hta ne khomdek nami be sak vai nei.

² Ak ghing avan, kha avan, nga avan naw nangmi cu ning kyih gui khai nei. Cun gui avan cu nami kut ung ka ning ap gui ci.

³ Ak ghing phung avan thui an ah mäih ah nami ei vai, avan cu nami ei vai ah ka ning pe gui ci.

⁴ Cun ung phi si la si ah om nak ah asa cu kä nami ei vai, si ung ghin nak om ci.

⁵ Chang ah hnun gui m’kat cicu m’kyuk nak gah khai. Khisa naw chang am kat ah a kyak ung kei naw sih nak pe ne ka m’kyuk khai.

⁶ Chang cu Khanpughi ah mäih ah a tüisho ah kyak ci. Cun ah kyasei chang awn cicu amät chang naw ngawn tuba khai.

⁷ “Nangmi cu akda ah nami hta vai nei, nami htangshon gui cu khomdek khan ah be ne om khai gui nei” cik ci.

⁸ Cun kawn ah Khanpughi naw Noah la a hta gui am,

⁹ “Nangmi la nami htangshon gui avan,

¹⁰ a hnun ghing gui avan — kha gui avan la khisa gui avan la nangmi awn a täng ah htinpaw im ungka lut law ba ci avan am kei naw thumkhän ka pek ci.

¹¹ Shin ah ng’thu gui awn kei naw thukhän ka ning pe gui ci: Cän kawn ah tuiyiin mü sei a hnun ghing gui ah sih nak kä om ba khai. Khomdek m’di khai ah tuiyiin kä mü ba khai.

¹² Nangmi la a hnun ghing avan awn ka bi ah angtäi om ciah thukhän m’hnüt nak ah,

¹³ Ka yapi cu khongmei ung ka ng’dang sak ci. Cun ah yapi cu khomdek la kei ah thukhän ah kyak khai nei.

¹⁴ Kei naw khawmik cu khongmei awn ka shung law päng ung yapi cu dang lawk khai nei.

¹⁵ Nangmi la ak ghing avan ung ka shaitaak cu ka shüm lä ci nei. Tuiyiin mü ne ak ghing gui cu kä m’di ba khai.

¹⁶ Khongmei ung yapi angdang law ung kei naw hmu ne, kei la khomdek khan ak ghing gui ah ng’lak ung angtäi om ciah ng’thukhän cu ka shüm ba khai nei.

¹⁷ Shin cu kei naw a hnun ghing gui ah khan ah ka bi ah shaitaak ah saksi ah kyak ci nei.

Noah La A hta Gui

¹⁸ Htinpaw im ungka lut law ba ciah Noah ah a hta gui cu, Shem, Ham la Japheth ah kyak ci. (Ham cu Kanaan ah apa ah kyak ci.

¹⁹ Shin ah Noah ah htapami thum cu, khomdek khan ung chang khli ah ng’shon lawk ci gui.

²⁰ Noah cu lo bi ne sapyit geit law htük ciah chang ah kyak ci.

²¹ Ani cu sapyit tui aw ne, awktat ne, a suisak suut ne akplui ah ak pyu ah ng’yän ci.

²² Kanaan ah kaa Ham naw ami pa akplui ah ang yän cu hmu neta, a nau goi am m’thein tu goi ci.

²³ Shem la Japheth cu ani suisak ani k’phleing ung khooi ne, a hnu täng ah law ni neta ani pa cu khuih ci goi. Ngani naw akpung täng ah mang ne khuih ci goi kya ne, ami pa ak plui cu kä hmuk ci goi.

²⁴ Noah naw ng’shüm law ba ne a hta hmawpi naw a m’htei cu hmu neta;

²⁵ Ani naw, “Kanaam cu ka plahtaam ci nei, ani cu a phäinau gui ah changshäm ah kyak khai nei.

²⁶ Shem ah Khanpughi Bawipa cu yei na vä, Kanaan cu Shem ah changshäm ah kyak khai nei.

²⁷ Khanpughi naw Japheth cu hlüngtai sak sä. A hta ng’shon gui cu Shem ah chang gui awn om ghawm u sä! Kanaan cu Japheth ah changshäm ah kya sä” cik ci.

²⁸ Tuiyiin a mü kawn ah Noah cu khawkum 350 ghing ba neta,

²⁹ a khawkum 950 ung sik ci.