ATÜNNAK 8 - Cho Bible Common Language 2016

Tuiyiin Ang Pyi Nak

¹ Khanpughi naw htinpaw im kyong ah om ciah Noah la ak ghing gui avan cu ngaih na gui neta, khokhi sak sei, tui cu ng’düm lawk ci.

² M’dek khui tui m’kawt la khankho tui m’kawt cu khaai ne, khaw k’aa cu ng’düm sak ci.

³ Tui cun phi ng’hnawk ne long ne, hnüüp phia la hmakip lüng khäta kyeim law ba ci.

⁴ A cha chih nak, a hnüüp gha lei chih hnüüp ung Htinpaw im cu Ararat khomhtung lai ah ng’taang ci.

⁵ Tui cu va kawi vü sei a cha gha nak, a hnüüp ät hnüüp ung khomhtung gui cu ng’dang law ba ci gui.

⁶ Cun kawn ah a hnüüp phlikip hnüüp ung Noah naw htinpaw m’kawt cu hmawng ne, kaap tumat cu m’shoon ci.

⁷ Cun ah kaap cu kä ng’hlah law ba ah tui kä a kawi yawp pha ah chuih yong shüi shüi ci.

⁸ Cun kawn ah tui a ket la kä cun ah hmat nak vai ah müm tumat mä m’shoon ba ci.

⁹ Khomdek khan ah tui be yah sei, müm cu a ngoh nak vai kä om sei, htinpaw im ah law ba ci. Noah naw ana dou ba ne htinpaw khui ah chum ba ci.

¹⁰ Cun kawn ah hnüüp chih om ba neta müm cu m’shoon ba mä ci.

¹¹ Khaw mühun law khäta müm cu am gawng ung sing hnah m’kiam ne yong law ba sei, tui kawi ciah Noah naw hmat ci.

¹² Cun kawn ah ak hnüüp chih hnüüp ung müm cu m’shoon ba mä ci. Cun ah müm cu kä ng’hlat law ba ci.

¹³ Noah ah khawkum phia chuk la kum ät, a cha ät nak, a hnüüp ät hnüüp ung tui cu ket ba yawp ci. Noah naw htinpaw m’kiung cu hlaat ne dan neta, khonglei hu law ba sei hmuk ci.

¹⁴ A cha goi nak, a hnüüp m’ku lei chih hnüüp ung khomdek avan huu ba ci.

¹⁵ Khanpughi naw Noah cu,

¹⁶ “Na chu, na hta gui la ami chu gui avan htinpaw ungka lut law ba vä.

¹⁷ Phyukha khisa avan lut law püi ba gui ä, khomdek khan ung hta nau pungpiah ne om khai gui nei” cine m’cäi ci.

¹⁸ Cun ah kyasei Noah cu ak chu, a hta gui la a hta gui ah chu gui awn a täng ah lut law ba ci gui.

¹⁹ Phyukha khisa gui avan phi a phäh phäh ah ng’gui ne lut law ba ci gui.

Noah Ah Khawihnah Nak

²⁰ Noah naw Bawipa ah khawih kiang co neta, theing ciah phyukha khisa gui, ming ät ungka tumat ci ghü ne, khawih kiang ung m’khih ne khawihnah ci.

²¹ Bawipa naw ng’ui ciah khawihnah nak cu dou neta “Cun kawn ah chang gui ah hmawk ah khomdek cu kä ka plah taam ba khai, chang gui cu ami hmaw sang ge ung ami m’lung ngaih shekhak ciah ka hmat ci. Tuhbäi ka bi ah mäih ah cun kawn ah a hnun ghing gui cu kä ka m’di ba gui khai.

²² Khomdek a om mah chuih geit nak ah khin la khäm nak ah khin om khai. A khing la ang ling, khaw cha la khaw sik, khawmü la khaw hnüüp angtäi sei om khai” cine pyen ci.