ATÜNNAK 6 - Cho Bible Common Language 2016

Hniciim Chang Gui Ah Shetkat Nak

¹ Khomdek khan ah chang pakhui gui pung pyiah u ne, hnumi hta gui ah phi hta ci gui.

² Khanchang gui amshah naw cun ah hnumi hta gui kyom u sei hmu gui u neta, ami m’hni phäh phäh chu na ne om püi ci gui.

³ Cun ah kya khäta Bawipa naw, “Chang gui am angtäi ghin nak kä ka pe ba gui khai; chang cu pumsa ah kyak ci. Tuhbäi ung tün ne chang gui cu khawkum phia la m’ku ah däm sei kä ghing khai gui” cine pyen ci.

⁴ Cun sangung khomdek khan ah chang angghaw angsau gui om man ci gui. Cun gui cu chang hnumi gui la khanchang gui ah hta gui ah kyak ci. Ngami cu gaigawng mingthang ne om man ci gui.

⁵ Khomdek khan ah chang gui cheishoh yawp u ne, angtäi sei ami m’lung kyong ung akshe bäng a om cu Khanpughi naw hmu neta,

⁶ Khomdek khan ung chang tüisho ne a tha ah phäh ah a yä ba ci.

⁷ Khanpughi cu amlung thüi sei a yä neta, “Ka tüisho ah chang, phyu kha akghing avan cu ka ciin sak yawp khai, shin gui ka tüisho ah phäh ah ka ng’yuu ba ci nei” cik ci.

⁸ Cun ung phi Noah cu Bawipa naw yeinak ci.

Noah

⁹ Shin cu Noah ah mawng ah kyak ci. Noah bäng cu ng’düng ci, chang k’ni, Khanpughi yumhni ciah kyak ci.

¹⁰ Noah ung a hta pami thum om ci, cun gui cu; Shem, Ham la Japheth ah kyak ci.

¹¹ Cun ung phi chang avan cu Khanpughi ah ma ah sheka yawp ci, khomdek khan avan cu cheishoh nak awn be ci.

¹² Khanpughi naw m’dek khan cu teng neta, akshe ah kyasei hmuk ci. Khomdek khan ung chang gui cu cheishoh yawp ci gui.

¹³ Khanpughi naw Noah am, “Hniciim chang ah ng’pyi nak vai cu ka k’bäi pyi ci nei. Khomdek khan cu cheishoh nak awn be ci kyasei, ka m’dii khai nei.

¹⁴ Na mät ah hmawk ah sing akni awn htinpaw na cawh vai. A kyong ah a khan gui na pyan vai, ak pung akyong avan m’htai pli awn na hluk vai.

¹⁵ Ayuun dawng phia thum, akdang dawng hmakip, A hlüng dawng thumkip ah na cawh vai.

¹⁶ A khan täng phi nak cih vai, am kiung ah dawng ah ng’veing khai ah m’kiung puut na pyan vai. Thum ah ng’dün khai ah co ne vang lam ah m’kawt na pyan vai.

¹⁷ Khomdek khan ung ak ghing avan k’biing ne m’ciin khai ah tuiyiin ka mü sak khai. Khomdek khan ung hang om ci phung avan si yawp khai.

¹⁸ Cun ung phi nang awn thukhän ka bik khai. Na chu ni, na hta gui ni la ami chu gui awn hleikaw kyong ah lut vä.

^19-20 Ak ghing phung avan, kha ming avan, akhik akhla bäng bäng ghü ne, ghing khai gui ah htinpaw im kyong ah na chum gui vai.

²¹ Nami mät ah ei awk vai la ak ghing avan ah ei awk vai gui cu na hteh püi vai nei” cine m’cäi ci.

²² Khanpughi naw a pyen ah mäih ah Noah naw avan cu bik ci.