ATÜNNAK 50 - Cho Bible Common Language 2016

¹ Joseph naw apa kyawp ne, kyap ne a hmai ung ng’ui ci.

² Joseph naw apa ah gook cu tui ng’ui a hlü hlü awn pyan sak gui ci.

³ Cun ah kä thuk khai ah pyang ne ami thung ah ami htüm nak cu hnüüp phli kip lüng ci. Jakob ah phäh ah Egypt chang gui cu hnüüp chih kip kyap ci gui.

⁴ Ami thüi kyah nak ng’düm khäta, Joseph naw mang im chang gui am, “Nami bä ni, shin ah ng’thu cu ghangpughang am va m’thein vä.

⁵ ‘Kapa naw a sih law vai ung ng’thu ana khän shüt ah mäih ah, amät naw a pyen shüt ah Kanaan khaw ng’cim hmun ung ka k’phuh ba khai nei. Cun ah kyasei kapa ah gook cu hteit ne ka k’phuh ba vai ah na m’gein sä, cun kawn ah ka law ba khai nei” cine tüi gui ci.

⁶ Ghangpughang naw, “Thukhän na bi ah mäih ah napa cu hteit ne m’cim ba ä” cik ci.

⁷ Joseph naw apa cu hteit ne m’cim ba ci. Ghangpughang ah bawimang gui avan, mang im kyong ah bawi gui la Egypt khaw ung chang avan naw Joseph cu läk tuk ci gui.

⁸ Amät ah kyong chang, a phäi gui la apa ah kyong chang ami van hteit tuk ci gui. A hmaw gui la ami seime gui bäng Koshen khaw ah om shüt ci gui.

⁹ Ng’sehle gui la ng’se cum ci gui phi hteit tu ci gui, chang hli ng’peeih hteit ci gui.

¹⁰ Jordan ah hni law lam Atad khlang hmun ung gawk law u neta, akshou m’lau ne kyap ci gui. Joseph cu cun ah hmun ung khaw hnüüp chih ung kyap ci.

¹¹ Atad ung cun ah ami kyah cu Kanaan khaw ah chang gui naw hmu gui u neta, “A i ah kyasei Egypt chang gui shin ah ami kyah law ang?” cik ci gui. Cun ah hmun cu Abel Mizraim ah sui ci gui.

¹² Jakob ah a hta gui naw am cäi gui shüt ah mäih ah bik ci gui.

¹³ A gook cu Kanaan khaw ah kawt ba u ne, Abraham naw Hittit chang Ephron ah ng’cim hmun vai ah a thon ba ah Mamre lai ah a kiangtäng Makpelah phuh hmun ung phuh ci gui.

¹⁴ Joseph naw apa a phuh kawn ah a phäinau gui la htüm tuk ciah chang avan cu Egypt khaw ah law ba ci gui.

Joseph naw a Phäi gui Ngaih Gep Sak gui ci

¹⁵ Ami pa a sih kawn ah Joseph ah a phäi gui naw, “Mikmi naw ani ah khan ah akshe mi bi ah phäh ah Joseph cu ng’u neta mikmi ah khan ah akshe bi tu ba hman khai” cik ci gui.

¹⁶ Cun ah kyasei Joseph ah ng’shä tüi u ne, “Mi pa kä a sih pha ung

¹⁷ na m’cä gui ne kami pyen vai ah a pyen cu, “Na phäi gui naw ami ning hma nak cu na m’gein gui vai nei” a ciah mäih ah, napa ah Khanpughi ah ana changshäm gui naw, kami ning hma nak cu na m’gein gui ä” cine kyak ci gui. Cun ah ng’thu cu ng’ya neta Joseph cu kyap ci.

¹⁸ Cun kawn ah a phäi gui cu law u ne ama ah kawp u neta, “Shin ung na ma ah na changshäm gui ah kya ne kami lawk ci nei” cik ci gui.

¹⁹ Joseph naw, “Kä nami kyih vai, kei cu Khanpughi ah hnün ung kä ka om ci.

²⁰ Nangmi naw kei cu akshe ah nami na kyak nak ci, cun ung phi cun cu Khanpughi naw akni ah m’hlat ci nei, Tuh ngawi om ciah chang akda ah ghin nak vai ah bi pyi ci nei.

²¹ Kä nami kyih vai, nami mät la nami hta gui avan ka ning m’htei gui khai, cine ami m’lung ung gawk khai ah m’hni nak ah ng’thu awn pyen na gui ci.

Joseph a Sih ah Mawng

²² Joseph cu apa ni kyong awn a täng ah Egypt khaw ah om tu lä ci gui. Ani cu a khokum phia la gha ung sik ci.

²³ Ani naw Ephraim ah hta gui la tu gui cu ghing ne hmu gui ci. Manasseh ah hta Machira ah hta gui phi kyong khui ami pyan güt om püi gui ci.

²⁴ Ani naw a phäinau gui am, “Kei cu ka si law vai ci nei, cun ung phi Khanpughi naw akcang ah ning m’htei gui khai nei. Ani naw shin ah khaw ungka naw Abraham, Isaak la Jakob ni ah ma ah, ak htük bäih ah ng’thu akhän nak ah khaw ah, lam ning m’shüm ba gui khai nei.

²⁵ Cun kawn ah Joseph naw a chang gui cu ng’thu ami khän vai ah m’cäi gui ci. Ani naw, “Thukhäm na pe vä, Khanpughi naw mi khaw ah a ning hteh püi ba gui hnüüp ung ka pumsa cu nami hteh püi ba vai nei” ciah kyak ci.

²⁶ Joseph cu a khokum phia la gha ung Egypt khaw ah sik ci. A pumsa cu kä thuk khai ah pyang u neta, guh-am ung chum ci gui.