ATÜNNAK 49 - Cho Bible Common Language 2016

Jakob ah Ng’Cäi Shüt

¹ Jakob naw a hta gui cu khü gui neta, “Ka pei ah law vä, nangmi ah khan ah ngawi ah a i ah kya lawk khai cicu ka ning m’thein gui khai:

² Jakob ah hta gui law ne ngai law vä. Nami pa Israel ah ng’thu cu ngai vä.

³ Reuben, nang cu ka hta htük, ka thagui ah na kyak ci. Ka gai sang ung ka hta htük ah na kyak ci. Ka hta gui avan ung m’gäi pi ci la gai pi ciah na kyak ci.

⁴ Nang cu tuiklaw ah mäih ah na kyak ci. Cun ung phi nang cu aküikyang pi ah kä na kyak khai, A i ah kyasei ci ung kei ah ka chuba ih püi ne, na pa ah ihphak cu na shetkat sak ciah kyak ci.

⁵ Simeon la Levi cu ng’phäi nau goi, Nget ne m’gäi nak cu ngani ah likhim.

⁶ Ngani ah ng’zih thuh nak ung kei kä ka ng’pang khai. Ani chang bum ung phi kä ka ng’päng tuk khai. Ngani cu m’lungshe ne chang ngawn ci goi. Sei khaw ng’dääk sak ne gü ng’lah ci goi.

⁷ Ani m’lungshe nak ung plah nak om khai, a i ah kyasei ci ung cun cu ng’hüüt ci. Ani m’lungso nak ung plah nak om khai, a i ah kyasei ci ung cun cu shekhak ci. Israel khaw avan ung ka püi sak gui khai. Ami chang gui ah ng’lung ah ka pawng sak gui khai.

⁸ Judah, nang cu na phäi gui naw ning m’hlüngtai khai gui, Na ga gui ami gawn ung na k’pang gui khai. Na phäinau gui na ma ah kawp khai gui.

⁹ Judah cu phawngkawng ah mäih ah kyak ci. Sa gui lo ne a hta gui ah law ba ci. Ng’zeet ne ng’baw ne ng’yän ci. A u naw kä aw-am ci.

¹⁰ Mang ah hteipawng cu Judah naw kawt khai. A hta ng’shon naw khonglän ung uk khai. Pakhui gui naw khawh pe lawk khai gui. Ani kyih aa ne ama ah kawp khai gui.

¹¹ Ani naw angsela nong cu sapyit shun ung pawng khai, cun cu sapyit akni pi ah kyak khai. A suisak gui cu si ah sen ciah sapyit tui ung m’si khai.

¹² Amik cu sapyit tui awn sen ne, a ha cu suktui awn bawk ci.

¹³ Zebulun cu tuinu kem pei ah om khai. Atui kem cu htinpaw gui ah ng’düm nak ah khaw ah kyak khai. Ani ah khopäng cu Sidon khaw ah khüt khai.

¹⁴ Issakha cu ng’sela ah kä bä tuba ci, Cun cu a khaw goi zawn ne ng’yän ciah kyak ci.

¹⁵ Cun ung phi ani naw ng’düm nak vai ah hmun ni hmuk ci, cun cu khaw kyäp ah kyak ci. Cun ah kyasei ak phleing ung phuih gih phui ne, changshäm ah güt ne täk khai gui.

¹⁶ Dan cu a chang gui uktu ah kyak khai. Ngami cu a hei Israel pakhui ah mäih ah kyak khai gui.

¹⁷ Dan cu lam pei ah phyu nget ah kya ne, lam leng ah phyu m’äm mah ah kyak khai. Cun naw ng’se ah khaw cu k’dawk sei, Ng’se ung cun cicu ng’lat ne kya lawk khai.

¹⁸ Na hun nak cu ka ging ci nei, Bawipa.

¹⁹ Kad cu m’guk-ei gui naw tuk khai gui, Cun ung phi ani naw ng’lat ne tu ne k’täm gui khai.

²⁰ Asher ah khaw ung ei vai m’thawk khai. Ani naw ghangpughang ah ei vai ng’büh khai ah pek khai.

²¹ Naphtali cu ng’hlü ne dawng ciah kigang ah kyak ci. Ani cu m’hni vai hta ci.

²² Joseph cu tuihta kem ah ng’sela k’zäng ah kyak ci. Khogui nawi ah m’shing sing ah kyak ci.

²³ A ga gui naw aknui ah tuk ci gui. Ami li gui la m’la gui awn k’täm ci gui.

²⁴ Cun ung phi ali cu m’htung ge ci. Akut phi khüi ghat ci. Jakob ah m’gäi ciah Khanpughi ah huham awn la Israel ngäng ciah Htome shäm awn ah kyak ci.

²⁵ Nang ning m’htei cicu napa ah Khanpughi ah kyak ci, M’gäi ciah Khanpughi ah kya ne hrilham ning pek ci, khan ah ka khaw aa awn hrilham ning pek ci, m’dek ah ka ah thuuk ciah tuinu ning pek ci, sei ah pung nak la chang ah da nak ah hrilham ah kyak ci.

²⁶ Hrilham ah kyak ciah püm htang la cheipai gui, Hrilham ah kyak ciah cau khomhtung gui, Khonglän ung om ciah khogui gui ungka bämang nak gui, Shin ah hrilham gui cu Joseph ah lu khan ah gawk sä. Cun cu a phäi gui ung a hnga nak ah kyak ci nei.

²⁷ Benjamin cu hnei kiung ah kyak ci. A khongawi tä, a mühun tä lo ne ei ba ba ci.

²⁸ Shin gui cu Israel pakhui gha lei goi ah kyak ci. Shin cu ami pa naw a hta gui tumat ci ung ng’müi khai ah ng’thu pyen ne am cäi nak gui ah kyak ci.

Jakob Asih la Ami m’Cim nak

²⁹ Jakob naw a hta gui thumkhän gui ne, “Tuhbäi ka chang gui ah sih nak khaw ah ka hteit lawk khai, Hittite chang Ephron ah lo kapa ah phuh hmun ung nami na m’ciim vai nei.

³⁰ Cun cu Kanaan khaw Mamre a kiang lam Makpelah ung om ci. Abraham naw Ephron ah ka te ng’cim hmun vai ah a thon ba ah kyak ci nei.

³¹ Cun cu Abraham la akchu Sarah ni, Isaak la a chu Rebekka ni, kei naw Leah ni ka m’cim nak ah kyak ci nei.

³² Cun ah lai la khui cu Hittit chang gui ah thon ba nei, acun ung nami na m’cim vai nei” cine m’cäi gui ci.

³³ Jakob cu a hta gui m’cäi gui yawp neta a ih phak ung ng’yän ba ne sik ci.