ATÜNNAK 48 - Cho Bible Common Language 2016

Jakob naw Ephraim la Manasseh Hrilham Pek ci

¹ Api shou hta khäta, Joseph cu apa ah gaw ng’ya neta, a hta goi Manasseh la Ephraim cu hteh püi goi ne Jakob hmuh vai ah hteit ci.

² Jakob cu a hta Joseph a law m’thein u khäta, ang yän nak ungka khüi ne tho ne ngok ci.

³ Jakob naw Joseph am, “A hlüngtai säih Khanpughi naw Kanaan khaw Luza hmun ung dang neta hrilham ana pek cu,

⁴ Ani naw kei am, “Kei naw nang am hta akda ka ning pek khai, cun ah kyasei na ng’shon cu pakhui akda ah kya lawk khai. Shin ah khaw cu na hta ng’shon am ka pek khai. Ngami naw ngawi yä ami khaw nak vai nei” cik ci.

⁵ Joseph naw pyen ba ne, “Joseph aw, na hta hnih om ci, Ngani cu Egypt khaw ah kä ka law pha ung na hta nak goi ah Ephraim la Manasseh ah kyak ci. Ngani cu Reuben la Simeon ah mäih ah kei ah kaa goi ah kyak khai goi nei.

⁶ Cun kawn ah na hta gui cu kei ung kä ng’pan khai, ngami ah pakhui m’düng tu vai cu Ephraim la Manasseh ungka lawk khai.

⁷ Shin ah ka bi cu na nu Rachela ah hmawk ah kyak ci. Ani cu Kanaan khaw Ephrath gawnu pei ah si sei anghtei ah ka thüi ci. Cun cu Mesopotamia ah kaa law ba lam ah kyak ci. Ephrath cu lam pei ah ka m’ciim ci. Ephrath cu tuhbäi Bethlehem ah kyak ci.

⁸ Jakob naw Joseph ah hta goi cu hmu neta, “Shin ah a hmaw goi a u goi ang?” cine ng’shik ci.

⁹ Joseph naw, “Shin cu kei ah hta goi, Egypt khaw ah Khanpughi naw ana pek nei” cik ci. Jakob naw, “Law püi goi ä, hrilham ka pe goi khai nei” cik ci.

¹⁰ Jakob cu ghi lawk ci kya ne, a mik mü sei akni ah kä hmu ba ci.

¹¹ Jakob naw Joseph am, “Nang phi kä ka ning hmu ba hlawt khai ah ka ngai te ci, Khanpughi naw na hta goi hngaw na hmuh sak ci nei” cik ci. Joseph naw Jakob ah akcoi ungka

¹² ak hmaw goi cu la ba goi ne, m’dek ung a hmai gawk khai ah ama ah kawp ci.

¹³ Joseph naw Ephraim cu Jakob ah ak eng lam, Manasseh cu ak pat lam ah ng’düih sak goi ci.

¹⁴ Cun ung phi Jakob naw a kut m’kang ne, akpat lam cu a hmawpi Ephraim ah lu khan ah, ak eng lam cu ang vaipi Manasseh ah lu khan ah taih ci.

¹⁵ Cun kawn ah Joseph am hrilham a pek cu; “Kapa Abraham la kapa Isaak ah khawihnah ah Khanpughi naw, Shin ah a hmaw goi cu hriham pe goi sä. Tuh ngawi lam na m’shüm ciah Khanpughi naw hrilham pe goi sä!

¹⁶ Khüikha nak avan ung na gung ciah khankho chang naw hrilham k’be goi sä. Kei ah ming la kapa Abraham la kapa Isaak ah ming cu shin goi awn ghing ne om sä! Ani htapa k’pyiing ne ani pakhui k’phiaa sä.

¹⁷ Joseph naw apa naw akpat lam a kut Ephraim ah lu khan ah a taih cu hmu ne, kä yei neta, apa ah kut cu la ne Ephraim ah lu ungka Manasseh ah lu khan ah tai sak ci.

¹⁸ Joseph naw apa am, “Pa aw, kä cäkcha ah nei, shin ah hmaw cu ang vaipi, ani ah lu ah khan ah na k’pat lam kut na taih vai” cik ci.

¹⁹ Apa naw ma neta, “Ka hta aw, ka hmat ci nei, ka hmat ci, Manasseh ah hta ng’shon cun phi chang kuikyang ah kyak khai nei. Cun ung phi anau cu cun ah däm pi ne, ani ah ng’shon cu pakhui küi ah kyak khai nei” cik ci.

²⁰ Cun ah kyasei a cu hnüüp ung hrilham a pek goi cu, ani naw, “Israel chang gui naw nangni ah ming awn hrilham pe u sä. Ngani naw ani pek ung Khanpughi naw Ephraim la Manasseh ah mäih ah ning pyang gui sä, cine taigü u sä” cik ci. Jakob naw Ephraim cu k’hma ne, Manasseh cu m’hnu ne cu cha ah pe goi ci.

²¹ Cun kawn ah Jakob naw Joseph am, “Na hmuh ah mäih ah kei cu ka si law vai ci, cun ung phi Khanpughi naw ning m’htei gui ne nami pupa gui ah khaw ah ning hteh püi ba gui khai nei.

²² Nang ah chaw, na phäi gui ah chaw ah kä kyak ciah Shekhem khohmun cu ka ning pek nei. Cun ah hmun cu ang lei nik ci, Amorit gui ah kut ungka ka li la ka khim awn ka gah ah kyak ci” cine m’cäi ci.