ATÜNNAK 47 - Cho Bible Common Language 2016

¹ Cun kawn ah Joseph cu a phäi gui sing hma hteh püi gui ne ghanpughang ah hteit ci. Ani naw, kapa la ka phäi gui cu Kanaan khaw ah ka, ami sei me khawh chaam avan law püi ne lawk ci gui nei. Ngami tuhbäi Koshen khaw ung om ci gui nei.

² Cun kawn ah a phäi gui cu ghanpughang am ap gui ci.

³ Ghangpughang naw ngami am, “A i nami biman ci ang?” cine ng’shi gui ci. Ngami naw, “Bawi aw, keimi cu kami pupa gui ah mäih ah htome shäm gui ah kami kyak ci nei” cik ci gui. Kanaan khaw ah khaw she aih sei kami me gui ah ei vai khaw hmun phi kä om ba ci.

⁴ Shin ah khaw ah om tu vai ah kami lawk ci nei. Na bä ni, Koshen khaw hmun ung na om tu sak gui ä” cik ci.

⁵ Ghangpughang naw Joseph am, “Tuhbäi napa la na phäinau gui gawk law pyi ci gui,

⁶ Egypt khaw cu ngami ah khaw ah kyak ci nei, a hmun ni pi Koshen khaw ung om sak gui ä. Ngami ungka khüighat ci a om ah a kyak ung ka htome gui shäm khai ah tängpang sak ä” cine m’cäi ci.

⁷ Joseph naw apa Jakob cu ghangpughang ah hteh püi ne ap khäta, Jakob naw ghangpughang cu hrilham pek ci.

⁸ Ghangpughang naw, “Na khawkum a i chü ang?” cine ng’shik ci.

⁹ Jakob naw, “Khin ah kya ne ka om nak khawkum phia la thuimkip lawk ci. Cun ah khawkum gui cu ken sei phi cümbawng nak ah kyak ci, pupa gui ah ghin sho ah mäih ah kä kyak ci.

¹⁰ Jakob naw ghangpughang cu hrilham pe shüt neta hteit ba ci.

¹¹ Ghangpughang naw a pyen ah mäih ah Joseph naw apa la a phäinau gui cu Egypt khaw ung om sak gui ne, ang lei nipi khaw hmun Ramese mang gaw pei cu pe gui ci.

¹² Joseph naw, apa la a phäinau gui, apa ah kyong ungka gui ami van, a hmaw pi ung khüt khai ah tu m’bei gui ci.

Khaw Shek ci

¹³ Khaw she aih ne khaw päng ung ei vai kä om ba ci. Egypt khaw la Kanaan khaw ung chang gui ei cawi geinvai law pi ci gui.

¹⁴ Ngami naw htang ami hleih ah kya ne ngui avan cu Joseph naw gah neta mang im ung giim ci.

¹⁵ Egypt la Kanaan khaw ung ngui avan ng’pyi khäta, Egypt chang gui cu Joseph ah law u ne, “Ei vai na pe gui ä, kä kami sih vai ah na m’gein gui ä, kami ngui avan ng’pyi ci nei” cik ci gui,

¹⁶ Joseph naw, “Nami ngui ang pyi ah a kyak ung, nami seime gui law püi vä, ei awn ka ning thawng tu gui khai nei” cik ci.

¹⁷ Ngami naw ami seime gui Joseph ah law püi u sei, ng’sela ni, seime ni, htome ni gui cu Joseph naw ei awn m’thawng tu gui ci. Cun ah kum ung ami seime gui avan ah phu ah ei cu tu m’bei gui ci.

¹⁸ A hngeng kum ung chang gui law ba u neta, “Bawi aw, na ma ah a i kä kami m’yih khai, kami ngui avan ng’pyi pyi ci, kami seime avan phi nang ung gawk yawp ci, kami pumsa la kami khomdek bäng ka mi ning pek vai om ba ci.

¹⁹ Kä kami sih vai ah na bi pe gui ä, kami khaw kä kami nawng vai ah na bi na bi pe gui ä. Kami mät la kami khaw ei awn na thawng gui ä. Ghangpughang ah changshäm ah kami kyak khai nei, kami khaw phi ani naw khäm sä. Kami ghin nak vai htang, lolai ung kami geit vai m’shi na pe gui ä.

²⁰ Joseph naw ghangpughang ah phäh ah Egypt khaw avan hleih ci. Khaw she aih khäta Egypt chang avan naw ami khaw cu yoi u sei, khaw avan cu ghangpughang ah khaw ah kya lawk ci.

²¹ Joseph naw Egypt khaw acawi ah khüt khai ah, chang avan cu changshäm ah kyak sak ci.

²² Ani ah kä hleih tu cu taigüpa gui ah khaw bäng om ba ci. Ngami naw ami khaw kä yoi ci gui, a i ah kyasei ci ung ghangpughang naw akphlüt ah ami ei vai a pek gui ah phäh ah kyak ci.

²³ Joseph naw chang gui am, “Teng vä, kei naw nangmi la nami khaw avan cu, ghangpughang ah phäh ah ka hleih pyi ci nei. Geit m’shi cu la vä, nami lolai ung nami geit vai.

²⁴ Nami khäm law ung bum hma ung bum ät cu ghangpughang am nami pek vai nei. Ak pawih ba cu amshi vai la nami hmawk la nami kyong ung nami ei vai ah kyak khai nei.

²⁵ Chang gui naw, “Bawi aw, kami hnun gui na na hun gui ci, na bä ci nei, kami van ghangpughang ah changshäm ah kami kyak khai nei” cik ci gui.

²⁶ Cun ah kyasei Egypt khaw ung Joseph naw thukhän a pyan cu, geit ami khäm ah bum hma bum ät cu ghangpughang ah kaa vai nei” ciah kyak ci. Cun ah thukhän cu tuh güt ghing ci. Taigüpa gui ah khaw bäng cu ghangpughang naw kä khäm tuk ci.

Jakob ah Ng’Cäi nak

²⁷ Israel chang gui cu Egypt khaw Koshen ng’lei ung om u ne mang ne k’pyiing ci gui.

²⁸ Jakob cu Egypt khaw ah kum gha lei chih om ci. Khawkum phia la phli kip lei chih a law güt ghing ci.

²⁹ Asih nak vai ng’et law khäta, a hta Joseph cu khü neta ang thu püi cu, “Ka phei goi ah ng’lak ung na kut k’thoi neta, “Egypt khaw ung kä ka ning m’ciim khai nei” cine thukhän aküi na bi vai.

³⁰ Kapa gui ah ng’cim nak ung ka ng’cim hlük ci, Egypt khaw ungka na hteh püi ba ne, ngami ah ng’cim nak ung na na m’cim vai nei” cik ci. Joseph naw, “Na pyen ah ka bik khai nei” cik ci.

³¹ Jakob naw na bi vai ah ng’thu na khän vai ci sei, Joseph naw ng’thui khän khäta, Jakob naw a ih nak ah khan ung yeikyai nak pek ci.