ATÜNNAK 46 - Cho Bible Common Language 2016

Jakob la Akyong ungka gui Egypt Khaw ah Hteit ci gui

¹ Jakob cu a khawh gui m’khäp sen neta, Beerasheba ah hteit ne apa Isaak ah Khanpughi cu khawihnah ci.

² Khanpughi naw mü ah a muimang ung, “Jakob, Jakob” cine khü sei, Jakob naw, “äi, sha ka om ci nei” cik ci.

³ Ani naw, “Kei Khanpughi, napa ah Khanpughi nei, Egypt khaw ah na hteh vai ah kä na kyih en vai nei. Cun ah khaw ah na hta ng’shon gui cu pakhui dämduh ah ka pyang khai nei.

⁴ Kei naw Egypt khaw ah ka ning khah püi khai nei. Kei naw na hta ng’shon gui cu shin ah khaw ung ka law püi ba gui khai nei. Joseph naw nang cu na sih güt ning om püi khai nei” cik ci.

⁵ Jakob cu Beerasheba ungka naw ng’düi ba ci. Egypt ghangpughang ah tüih law ah ng’sela ng’hle gui ung a hta gui naw amät la ami chu hta gui cu m’kai ci gui.

⁶ Kanaan khaw ah ka ami seime khawh chaam gui avan hteh püi u ne Egypt khaw ah hteit ci gui. Jakob naw a hta ng’shon gui ami van hteh püi gui ci.

⁷ A hta hnumi pami gui, atu hnumi pami gui ami van hteh püi gui ci.

⁸ Jakob ah kyong ungka Egypt khaw ah hteit tuk ci gui cu, a hta ng’vaipi Reuben,

⁹ la Reuben ah hta gui; Hanok, Pallu, Herron la Karami.

¹⁰ Simeon la a hta gui; Jemuela, Jamin, Ohada, Jachin, Zohara, la Kanaan hnumi ah hta Shuela.

¹¹ Levi la a hta gui; Kershon, Kohath, la Merari.

¹² Judah la a hta gui; Shelah, Perez, la Zerah. (Judah ah a hta hei goi Era la Onan cu Kanaan khaw ah si pyi ci goi.) Perey ah hta goi cu Hezron la Hamula.

¹³ Iskha la a hta gui; Tola, Puah, Jashuh la Shimron.

¹⁴ Zebulun la a hta gui; Sered, Elon la Jahleela.

¹⁵ Shin gui cu Jakob ah chu Leah ah hta gui ah kyak ci, ngami cu Mesopotamia ah ami hta nak gui ah kyak ci. A hta hnumi Dinah phi om ci. Leah awn ani hta ng’shon avan cu thum kip lei thum lawk ci.

¹⁶ Kad la a hta gui; Zephon, Haggi, Shuni, Ezbon, Eri, Arod, la Areli.

¹⁷ Ashera la a hta gui; Imnah, Ishvah, Ishvi, Beriah, la mi be Serah. Beriah ah hta goi cu Hebera la Malachiela.

¹⁸ Shin ah gha lei chuk gui cu Laban naw a hta hnumi Leah am a pek tu ah changshäm Zilapah ah hta ng’shon gui ah kyak ci.

¹⁹ Jakob ah a chu Rachela naw hnih ah hta pek ci; Joseph la Benjamin ah kyak ci.

²⁰ Egypt khaw ah Joseph ah hta goi cu Manasseh la Ephraim ah kyak ci. Achu Ashenath cu Heliopolis taigüpa Potipha ah hta hnumi ah kyak ci.

²¹ Benjamin ah hta gui cu; Bela, Becher, Ashbela, Kera, Naaman, Ehi, Rosh, Muppim, Huppim la Ard ah kyak ci.

²² (Shin ah gha lei phli cu Jakob ah hta ng’shon gui, Rachela awn ani hta gui ah kyak ci.)

²³ Dan la a hta Hushim.

²⁴ Naphtali la a hta gui; Jazeela, Kuni, Jezera la Shillem.

²⁵ Shin ah chih cu Jakob ah hta ng’shon gui, Bilhah awn ani hta gui ah kyak ci. Bilhah cu Laban naw a hta hnumi Rachela am a pek ah changshäm ah kyak ci.

²⁶ Egypt khaw ah hteit ciah Jakob ah hta ng’shon ami van cu, a hta gui ah chu gui kä khei tu ah chuk kip la chuk lawk ci gui.

²⁷ Egypt khaw ah Jakob cu hnih ah hta ba ci kya ne, acu ah hteit ciah Jakob ni kyong avan cu chih kip lawk ci.

Egypt Khaw ah Jakob ni Kyong

²⁸ Jakob naw Judah cu Joseph ah tüi ma ne, Koshen ung a hmuh law gui vai ah m’thein sak ci. Ngami ami gawk ung

²⁹ Joseph cu ng’sehle ng’cum ne apa hmuk khai ah Koshen ah lawk ci. Ng’hmu law ni neta, Joseph naw apa cu a hnü ung kyawp ne aksho kyap ci.

³⁰ Jakob naw Joseph am, “Kei ka si dat ci nei, tuhbäi ka ning hmu pyi ci, nang na ghin phi ka hmat pyi ci nei” cine pyen nak ci.

³¹ Joseph naw a phäinau gui la apa ni kyong avan am, “Kei naw hteit ne ghangpughang am ka m’thein khai, ka phäinau gui la kapa ni kyong avan cu Kanaan khaw ah ka lawk ci gui nei.

³² Kei naw ka pyen khai, ngami cu htome shäm gui, seime vuh ci gui, ami me, ami sei gui, la ami khawh avan law püi ne lawk ci gui nei.

³³ Ghangpughang naw ning khü gui ne nami bilawh a mawng a ning shi gui ah a kyak ung,

³⁴ geing na ne nami pyen vai, keimi kami ghin ah chuih seime kami vuh ci, kami pupa ah bi ah kyak ci, nami ci vai, cun ung Koshen hmun ung ning om sak gui khai. Joseph naw cun ah a pyen cu Egypt chang gui naw htome shäm gui awn a täng ah a i kä ami bi hlü ah hmawk ah kyak ci.