ATÜNNAK 40 - Cho Bible Common Language 2016

Thawng Kyum ci gui ah Ng’Mang Joseph naw k’Phlan ci

¹ Cun sang ung Egypt ghangpughang ah yu cung bawi la ei tei bawi naw ghangpughang cu ng’küknet püi ne m’lungshe sak ci goi.

² Ghangpughang cu cun ah ang vai goi ah khan ah m’lungshe neta,

³ cun goi cu pha goi ne, Joseph ami chum nak ah gabawi ah im ung chum tu goi ci.

⁴ Ngani cu akshou thawng ung kyum lawk ci goi, gabawi naw Joseph cu ami changshäm ah kyak sak ci.

⁵ Khomü ät ung yu cuung bawi la ei tei bawi cu ani ng’mang shek ci, cun cu a mawng a hei hei ah kyak ci.

⁶ Joseph naw khongawi ah law ngawi neta, ngani cu kä yei ni sei hmu goi ci.

⁷ Ani naw, “A i ah kyasei tuh ngawi nani thüi ang?” cine ng’shi goi ci.

⁸ Ngani naw, “Keini kani mang shek ci, cun ah mang k’phlan khai shin ung a u kä om ci nei” cik ci goi. Joseph naw, “Ng’mang cu cüivai nak pek ciah Khanpughi naw vah phlan hning ci, nani mang cu na m’thein ä” cik ci.

⁹ Yu cuung bawi naw, “Kei ah mang cu ka ma ah sapyit shun om ci.

¹⁰ Cun ung ang ban thum om ci. Cun ah ang ban gui cu hnah law u ne, m’guh ne pai ne up ci gui.

¹¹ Kei cu ghangpughang ah khap ka kawt ci, sapyit up gui cu k’bit ne sui neta, ani am ka pek ci” cine m’thein ci.

¹² Joseph naw, “Cun ah a mawng cu, ang ban thum cu hnüüp thum ah kyak ci.

¹³ Hnüüp thum ah kyong ung ghangpughang naw ning chah ba ne ning m’taam ne, na ngoh nak te ung ning hmoh ba khai. Zu cuung bawi ah na kyak man ah kya ba ne, ghangpughang am na tu ba khai nei.

¹⁴ Cun ung phi phyawng ne na bä ba hnüüp ung kei cu na na shüm ba vai nei. Na m’gein nak awn ghangpughang ah na na pyen pek vai, ka phyawn vai ah phi na na tha nak tu pek vai nei.

¹⁵ Kei cu Hebru kho ah ami na hton ah kyak ci, Egypt khaw ung phi thawng kyum nak vai ka katnak kä om ci nei” cine pyen ci.

¹⁶ Cun ah nik khai ah ng’mang ak phlan cu ei tei bawi naw ng’ya neta, Joseph am, “Kei phi ka mang shek ci; cun cu, m’htut dawn thum kalu ung ka tüng ci.

¹⁷ Ak khan bäih dawn ung ghangpughang ah hmawk ah ei awk vai akda om ci, cun cu kha gui naw ei ci gui” cine m’thein ci.

¹⁸ Joseph naw, “Cun ah a mawng cu, dawn thum cu hnüüp thum ah kyak ci.

¹⁹ A hnüüp thum hnüüp ung ghangpughang naw ning chah ba khai, na lu ning m’chün khai. Cun kawn ah tung ung na pum ning tai u khäta, kha gui naw na sa cu ei khai gui nei” cine pyen nak ci.

²⁰ A hnüüp thum hnüüp ung ghangpughang naw angtüi nak hnüüp ah pawi cu a bawi gui avan awn bi püi gui ci. Zu cuung bawi la ei tei bawi cu chah ba goi ne a bawi gui ah ma ah law püi sak gui ci.

²¹ Zu cuung bawi cu a ngoh nak ung hmoh ba ci,

²² ei tei bawi cu tai ne ngawn ci. Joseph ah a pyen ah mäih ah kyak ci.

²³ Cun ung phi yu cuung bawi naw Joseph cu kä shüm ba ne m’hnih ci.