ATÜNNAK 39 - Cho Bible Common Language 2016

Joseph la Potipha ah Chu

¹ Tuhbäi Ismaela chang gui naw Joseph cu Egypt khaw ah hteh püi u ne, Potipha ah yoi ci gui. Potipha cu ghangpughang ah bawi, mang im gakap ng’vai ah kyak ci.

² Joseph cu Bawipa naw m’htei ne m’khüt näng nak pek ci. Ani cu Egypt chang a bawi ah im ah om ci.

³ Joseph cu Bawipa naw om püi sei, a bi päng ung m’khüt näng nak om ci, cicu a bawi naw hmat ci.

⁴ Potipha naw Joseph cu yum neta, a changzum ah hmoh ne, im khawh avan ap ne m’htei sak ci.

⁵ Cun ung tün ne Joseph ah hmawk ah Bawipa naw Egypt chang ah kyongkhui la im khawh avan la lo lai gui cu hriham pek ci.

⁶ Potipha naw a khawh avan Joseph am a ap kawn ah, a ei awk ah kawn ah, a khawh a i chü a om ba cu kä hmat ba ci. Joseph cu khüighaat ne a müi phi kyom ci.

⁷ Cun ah kyasei a bawi ah chu naw Joseph cu m’hni law neta, ni pi khai cine khü ci.

⁸ Joseph naw ma neta, ani am, “Teng ä, ka bawi naw shing ah im ung khawh avan cu amät naw kä ma nak ci. Ani naw khawh avan cu kei am na m’htei sak ci nei.

⁹ Shin ah im ung kei cu ka bawi ah mäih ah huham om ci. Nang ah kawn ah a i phi kä bi vai ah ana maa nak kä om ci nei. Kei naw shin ah mäih ah akshe kä ka bik khai, katnak cu ka hnungtuk püi khai nei” cik ci.

¹⁰ A cun ah mäih ah a hnüüp tä sei ani naw Joseph cu khü sei phi, Joseph naw kä ih püi phung ci.

¹¹ Hnüüp ät ung Joseph cu im kyong ah bii bik khai ah lut lawk ci. Cun yah ung kyong ah a u kä om ci.

¹² Hnumi naw a suinu ung pha ne k’pang neta, “Ni ip khai nei” cik ci. Joseph naw a suinu cu hnumi ah kut ung suut shüt ne dawng ci.

¹³ A sui nawng shüt ne lut law ne a dawng cu cun ah hnumi naw hmu neta,

¹⁴ a changshäm gui cu khü ne, “Teng vä, ka cei ah law püi shin ah Hebru chang naw na yawshe na gui ci nei. Ani naw ka ih nak kyong ah lut law ne, na yaw hlük ci nei, cun ung phi kei cu nisei ka m’lau ci nei.

¹⁵ Cun ah m’lau ngäta, kei ah pei ah a sui nawng shut ne lut law ne dawng ci nei cik ci.

¹⁶ Hnumi naw Joseph ah suinu cu, a bawi ami im ah a law ba güt ung gim ci.

¹⁷ Acei law ba khäta a na m’thein ne, “Na law püi ah shin ah Hebru chang naw a khan kyong ah lut law ne na phye hlük ci nei.

¹⁸ Cun ung phi m’lau ngäta a suinu ka pei ah nawng shüt ne, lut law ne dawng ci nei” cik ci.

¹⁹ Joseph ah bawi cu m’lungshe neta,

²⁰ Joseph cu pha ne, ghangpughang naw chang gui a chum nak ah thawng ung chum u sei, thawng ung chuum ci.

²¹ Cun ung phi Bawipa naw Joseph cu om püi ne hriham pek ci, thawng bawi naw phi yei nak ci.

²² Ani naw Joseph cu thawng kyum ci gui avan uk sak ne, thawng kyong bi lawh nak avan ung phi khawng mang sak ci.

²³ Thawng bawi naw a i a bi ba vai kä hlü khai ah Joseph naw bik ci. Joseph cu Bawipa naw m’htei sei a bi nak päng ung m’khüt näng nak om ci.