ATÜNNAK 31 - Cho Bible Common Language 2016

Jakob Naw Laban Nawng Ne Dawng Ci

¹ Laban ah hta gui ah ami ng’thu Jakob naw ang yak ba cu, “Mi pa ah khawh gui nü cu Jakob naw la yawp ci nei. Ani ah khawh chaam gui avan cu mi pa ah kaa ungka ah kyak ci nei” ciah kyak ci.

² Laban naw phi ayan nä ah mäih ah kä a ng’khawt sheng püi ba cu Jakob naw hmuk ci.

³ Cun kawn ah Bawipa naw ani am, “Na pupa na khui khaw ah na hteh ba vai nei, kei naw ka ning om püi khai nei” cine pyen nak ci.

⁴ Cun ah kyasei Jakob naw, Rebekka la Leah ah om nak ah ng’thu m’shäk ne, htawme gui shäm ne ami om nak ah ami hmuh law vai ah pyen ci.

⁵ Ani naw ngami am, “Nami pa naw ayan kaa ah mäih ah kä a na m’hni ba cu ka hmat pyi ci, Cun ung phi kapa Khanpughi naw na om püi ci nei.

⁶ Nami pa ah hmawk ah kei naw ka thagui avan awn bii ka bi cu nami hmat ci nei.

⁷ Ani naw kei cu na thei leh na ne, ka gah vai ah ng’cheng cu gha vei na m’thawng pek ci nei. Cun ung phi ani naw kä a na m’di vai ah Khanpughi naw bik ci nei.

⁸ Laban naw, a pyawk gui cu nang ah ng’cheng nak vai nei, a ci ung, me gui cu a pyawk bäng bäng ah hta ci gui. Ang khan gui cu nang ah ng’cheng nak vai nei, a ci ung ang khan bäng bäng ah hta ci gui.

⁹ Khanpughi naw nami pa ah htawme gui cu la ne, kei awn na pe pyi ci nei.

¹⁰ Me ang ghui khin ung ng’ghui ciah me akhla gui cu, a pyawk ni, ang khan ni bäng ah kyasei, ka ih mang ung ka hmuk ci nei.

¹¹ Ka ih mang ung Khanpughi ah khanchang naw, “Jakob” cine na khü sei, “äi” ci ngäta, ani naw,

¹² “Teng ä, ng’ghui ciah me gui phung cu a pyawk ni, ang khan ni bäng ah kyak ci gui nei. Cun cu kei naw, Laban naw akshe a bi gui cu hmu neta ka bi ah kyak ci nei.

¹³ Kei cu Bethela ung nang ma ah ng’dang ciah Khanpughi ah ka kyak ci nei, a cun ung nang naw shüm nak vai ah lung ling ne, oliv-situi awn shawi ne, ap ne, kei ung thukhän na bi nak ah kyak ci nei. Tuhbäi pawng ne ng’düi ne, na ng’tüi nak ah khaw ah hteit ba ä” cine pyen nak ci.

¹⁴ Rachela la Leah naw, Jakob am, “Keini ung kani pa ah im ung kani om vai, a khawh kani mang vai ah mawng kä om ba ci nei.

¹⁵ Ani naw chang khuihei ah mäih ah na om püi goi ci. Ani naw na yoi goi ci, kani phu phi mang pyi ci nei.

¹⁶ Khanpughi naw kani pa ungka a lak ah khawh avan cu, keini la kani hta gui naw kami mang vai ah kyak ci nei. Khanpughi naw a ning m’cäi ah mäih ah na bi vai cu na bi vai nei” cik ci goi.

¹⁷ Cun ah kyasei Jakob cu tho law ne a chu, a hta gui cu kalauk ung m’kai gui ci.

¹⁸ Mesopotamia khaw ah a gah ah seime gui la a khawh avan cu pawng püi ne apa Isaak ah om nak Kanaan khaw ah hteit ci gui.

¹⁹ Laban cu htawme ah mu k’teiu khai ah a hei ah a hteh yah ung Rachelah naw apa ah khanpughi a gup gui cu m’gu ne hteh püi ci.

²⁰ Jakob naw a hteh ba vai ah mawng cu Laban am kä m’thein ne am yih ah kyak ci.

²¹ Ani naw a khawh avan la ne, ang ghit ah hteit ne Euphratis tuinu kat ne, Kilead m’htung täng ah hteit ci.

Laban Naw Jakob Akpha Vai Ah Buuk Ci

²² Hnüüp thum a law kawn ah Jakob ah dawng cu Laban naw hmat tuk ci.

²³ Laban naw a chang gui khah püi gui ne, Jakob cu hnüüp chih ung k’täm neta, Kilead khomhtung ah k’pha ci.

²⁴ A cun ah mü ung Khanpughi cu Laban ah ih mang ung law neta, “Na geing nak vai nei, Jakob cu a i ah kä na ci en vai nei” cine pyen nak ci.

²⁵ Jakob cu Kilead m’htung ah phung tu ne om sei, Laban phi a chang gui awn a täng ah a cu ah phung tu ne om tuk ci gui.

²⁶ Laban naw Jakob am, “A i ah kyasei kei ah kä hmat ah ka hta hnumi gui cu chang ami pha ah mäih ah na dawng püi gui ang?

²⁷ A i ah kyasei kei am na m’zih ne düm ah na dawng ang? Kei na na m’thein vai sü ung, yeikyai ne, ng’äi awm ne, tumkhawng ne, ka ning tha ba khai sü te nei.

²⁸ Ka hta hnumi gui la ka tu gui ng’ui ne ka gidam nak gui vai ah a khin phi kä na na pek ci nei. Cun cu akshe ah na bi ah kyak ci nei.

²⁹ Kei naw nang cu ka ning m’di hning ci, cun ung phi zan mü napa ah Khanpughi law ne, a i ah kä ka ning bi en vai ah pyen sei, ka ning nawng nei.

³⁰ Nang cu na im ah hteit ba hlü aih neta na hteh ba cu ka hmat ci. Cun ung phi a i ah kyasei ka khanpughi cu m’gu ne na hteh püi ang?” cine ng’shik ci.

³¹ Nang naw na hta hnumi goi cu na na guh ba vai ah ka ng’ä te ci nei.

³² Cun ung phi na khanpughi gui lak ci läi cu na hmuh ah a kyak ung na ngawn vai nei. Ka chang gui cu saksi vai nei. Ami van zap ne shui gui neta, na kaa a om ah a kyak ung na lak ba vai nei” cine pyen nak ci. Rachelah naw Laban ah khanpughi gui am guk cu Jakob naw kä hmat ci.

³³ Laban naw Jakob ah phung ni, Leah ah phung ni, changshäm hnumi goi ah phung ni gui cu shui ne phi a khanpughi gui cu kä hmuk ci. Cun kawn ah Rachelah ah phung ung lut ci.

³⁴ Rachelah naw khanpughi gui cu la ne, kalauk ung taih ah ng’ip ung thun neta ngoh nak ci. Laban naw kyong khui avan ung shui ne phi a gup gui cu kä hmuk ci.

³⁵ Rachelah naw apa am, “Na ma ah kä ka ng’düih law cu kä na na gen vai nei, kei cu ka cha shui om yah ci nei” cine pyen nak ci. Laban naw a i ah shui ne phi a khanpughi cu kä hmuk ci.

³⁶ Jakob naw m’lungshe neta Laban akshe nak cu, “Kei naw a i katnak bi ngä sei ang, a i thukhän ka m’shet ah phäh ah ang, shin hlawk ah nget ne, na na k’täm law ve?

³⁷ Tuhbäi nang naw ka kyong avan na shui pyi ci, a i phi na kaa a om ah a kyak ung law püi ne, kei ah chang gui la nang ah chang gui ah ma ah m’shän ä, ngami naw m’khoi cha u sä.

³⁸ Kei cu nang ah khaw kum m’ku ung ka om lawk ci. Htawme a i phi kä shum shäuh ci, Kei naw phi a i phi cun ungka kä ka ei awk ci.

³⁹ Htawme k’ei hngei naw a lawh ung phi kä ka ning m’hnuh man ci, kä ka chaw nak khai, kä ka ci man ci. Mü ah phi, hnüüp ah phi chang naw am guk ung na na m’thung sak man ci.

⁴⁰ Hnüüp ah khawhni na ng’ling sei, mü ah k’daam na ui sei ka bik ci, ih ah phi akni ah kä ka ip ci.

⁴¹ Kei cu nang ah khaw kum m’ku ka om ci. Na hta hnumi goi ah phäh ah kum gha lei phli, htawme gui shäm ne kum chuk bii ka bik ci. Cun ung phi nang naw ka ng’cheng cu gha vei na na m’thawng pek ci.

⁴² Kapa ah Khanpughi, Abraham la Isaak ah Khanpughi naw, kei kä a na om püi vai sü ung nang naw kei cu ka k’plui ah na na gawt ba khai süte nei. Khanpughi naw ka bilawh la ka yaica cu hmuh neta, zanmü nang cu a ning k’dee ah kyak ci nei.

Jakob la Laban Ah Thukhän

⁴³ Laban naw Jakob am, “Shin ah hnumi gui cu kei ah hta gui, a hmaw gui cu kei ah tu gui, htawme gui cu kei ah khawh gui ah kyak ci, shin ung om ci phung kei ah kaa ah kyak ci.

⁴⁴ Tuhbäi nang la kei thukhän ni bik khai. Thukhän m’hnüt nak ah lung mi k’süm khai” cine pyen nak ci.

⁴⁵ Cun ah kyasei Jakob naw lung k’tung k’süm nak vai cu la ne k’süm ci.

⁴⁶ A chang gui naw a cun ung lung ami plu tu vai ah pyen sei, a cun ah plu tuk ci gui. Cun kawn ah a cun ah lung pum pei ah ng’ei ng’awk ci gui.

⁴⁷ Laban naw cun ah lung pum cu Jekar Sahadutha ah aming sui sei, Jakob naw Kaleed ah sui ci.

⁴⁸ Laban naw Jakob am, “Shin ah lung k’süm cu mi van ah shüm ba nak vai ah kyak ci nei” cine pyen nak ci. Cun ah kyasei cun ah hmun cu Kaleed ah ami sui ah kyak ci.

⁴⁹ Laban naw, “Shin ung mi ng’pai law ung Bawipa naw na m’htei gui sä” cine pyen ci. Cun ah kyasei cun ah hmun cu Mizpah ah sui ci gui.

⁵⁰ Laban naw pyen ba mä ne, “Ka hta hnumi goi na k’shedam nak ung, a hei na chu nak tuba ung, kei naw kä ka ning hmat ung phi Khanpughi naw ning teng khai nei.

⁵¹ Shin ung ni ng’lak ah lung pum la lung k’süm cu ni ng’gii ah kyak khai nei.

⁵² Shin ah lung pum la lung k’süm cu saksi ah kyak ci. Shin ah shüm vai ah lung phlu cu phlän ne, kei naw kä ka ning a tuk khai, nang naw phi shin ah shüm vai ah lung phlu cu phlän ne kä na na tuk en law vai.

⁵³ Abraham ah Khanpughi la Nahor ah Khanpughi cu ni ng’lak ung om khai nei” cik ci. Apa Isaak ah khawihnah ah Khanpughi ah ming ung Jakob naw akyäp nep ah thukhän cu bik ci.

⁵⁴ Ani naw m’htung khan ah a khawihnah nak cu ngawn neta, a chang gui cu ei aw tuk khai gui ah khü gui ci. Ngami cu ami ei awk kawn ah acu mü, mü lung ne m’htung khan ah om ci gui.

⁵⁵ A ngawi ung khawngawi hta Laban naw a hta hnumi goi la, atu gui cu ng’ui ne gidam neta, a im ah hteit ba ci.