ATÜNNAK 28 - Cho Bible Common Language 2016

¹ Isaak naw Jakob cu khü neta, “Kanaan hnumi kä na chu en nak vai.

² Mesopotamia khaw ah na pughi Bethuela ah hteit ne, a cu ah hnumi na chu nak vai, na pukhaw Laban ah hta gui ungka na chu nak vai.

³ Hlüngtai ciah Khanpughi naw, na chu na hta vai hriham ning pe sei, chang pakhui akda ah pa ah na kyak khai.

⁴ Khanpughi naw Abraham am a pek ah shin ah na om nak ah khaw cu, na khäm vai ah Abraham am hriham pek ci naw, nang la na htangshon cu hriham pe sä” cine taigü pe ne tüi ci.

⁵ Isaak naw Jakob cu Mesopotamia khaw Laban ah tüi ci. Laban cu Aramean chang, Bethuela ah hta, Jakob la Esau ah nu Rebekka ah be ah kyak ci.

Esau Naw Ahei Chu Na Ba Ci

⁶ Isaak naw Jakob cu hriham pe neta, Mesopotamia khaw ah, chumah khai ah a tüih cu Esau naw hmat ci. Isaak naw hriham a pek yah ung Kanaan hnumi kä a chu en nak vai ah, am cäi cun phi hmat ci.

⁷ Jakob naw anu la apa ah m’cäi ngai ne, Mesopotamia khaw ah a hteh phi ani naw hmuk ci.

⁸ Apa Isaak naw Kanaan hnumi kä a m’hni cun phi Esau naw hmat ci.

⁹ Cun ah kya khäta Esau cu, Abraham ah hta Ishmaela ah hteit neta, a hta hnumi Mahalath, Nebaioth ah be cu chu na tu ba ci.

Bethela Ung Jakob Ah Ng’Mang

¹⁰ Jakob cu Beersheba ungka pawng ne, Haran khaw ah hteit ci.

¹¹ A hteh lam ah khaw mü law khäta, hmun theing tumat ung gawk ne ng’düm ci. Ani cu a cun ung lung ung ng’khum ne ip ci.

¹² Ani naw ang mang ung a hmuh cu, “M’dek ungka naw khankhaw ah gawk sei hlaak ng’dawn ci. A cun ung khankhaw chang gui kyum kai ci gui.

¹³ Bawipa cu a pei ah ng’düi neta, “Kei cu Bawipa, Abraham la Isaak ah Khanpughi nei, Nang la na htangshon am tuhbäi na ng’yän nak ah khaw cu ka ning pek khai nei.

¹⁴ Na htangshon gui cu m’dek khui ah mäih ah khli khai gui. Ngami cu a htum, a siip, akhei, ak kyang ung pi ne om khai gui. Chang pakhui avan naw nang la na htangshon ung hriham gah khai gui.

¹⁵ Na shüm vai, kei naw na hteh nak päng ah ning om püi ne ka ning m’htei khai, shin ah khaw ung ka ning law püi ba khai. Ka shaitak kä a khüm pha ah chuih kä ka ning hteh tak khai” ciah kyak ci.

¹⁶ Jakob cu tho law ba neta, “Akcang ah Bawipa cu shin ah hmun ung om ci — cun ung phi kei naw kä ka hmat ci” cik ci.

¹⁷ Ani cu kyi neta, “A i hlawk ah kyih vai ah kyak ciah hmun ang? Shin cu Khanpughi ah im, khankhaw ah kai nak ah m’kawt ah kyak khai nei” cik ci.

¹⁸ Jakob cu khawngawi hta ah tho ne, ang khum nak ah lung cu la ne, shüm hmat nak vai ah ng’ling neta, ak chuung ah situi awn yuk shawi ci, cun cu Khanpughi m’tam nak vai ah kyak ci.

¹⁹ Cun ah hmun cu Bethela ah a ming sui ci (cun ah gawnu ah aming phyim cu Luz ah kyak ci.)

²⁰ Cun kawn ah Jakob naw Bawipa ung thukhän a bi cu, “Ka hteh nak ah lam ung na ngäng ne, na m’htei ne, sui la ei na na pek ah a kyak ung,

²¹ kapa ah im ah phyawng gai ne ka gawk ba ah a kyak ung, nang cu kei ah Khanpughi ah na kyak khai.

²² Shin ah shüm ba vai ah lung, kei naw ka ng’lin cu, nang ning khawihnah nak ah hmun ah kyak khai nei. Kei naw phi na na pek gui phung ungka bum gha bum ät cu ka ning pek khai.”