ATÜNNAK 27 - Cho Bible Common Language 2016

Isaak Naw Jakob Am Hriham Pek Ci

¹ Isaak cu ghi law ne a mik phi mü lawk ci. A hta ng’vaipi Esau cu khü neta, “Ka hta awi” cik ci. Esau naw, “äi” cik ci.

² Isaak naw, “Na hmuh ah mäih ah kei cu ka ghi lawk ci, ka si law yäk khai.

³ Na li la na m’la la ne, bung ah hteit ne sa ngawn neta,

⁴ ka m’hni man ah akni ah shong ne na thak law ä. Cun ka ei kawn ah kä ka sih pha ung akbä pi ah hriham cu nang am ka ning pek khai nei” cik ci.

⁵ Cun ah Isaak naw Esau ang thu püi cu Rebekka naw ng’ya neta, Esau naw sa yüh ne ngawn ne law püi khai ah a hteh yah ung,

⁶ ani naw Jakob am, “Napa naw Esau a ng’thu pui cu ka ng’yak ci,

⁷ “Sa ngawn neta shong ne na na m’bei law vai, cun ka ei kawn ah kä ka sih pha ung, Bawipa ah ma ah hriham akbä pi ka ning pek khai” cik ci.

⁸ Rebekka naw, “Tuhbäi ka hta aw, ka ng’thu ngai ne, ka pyen ah na bi vai.

⁹ Ng’vong kyong ah hteit ne me akplan, azüt hnih na law püi vai. Napa naw a m’hni pi man ah, kei naw akni pi ah ka shong khai.

¹⁰ Cun hteh püi ne na m’bei vai, kä a sih pha ung hriham ning pek khai” cine pyen nak ci.

¹¹ Jakob naw anu am, “Esau cu mu ci, kei cu kä ka mu ci.

¹² Kapa naw na m’tham neta kei cu ka hleei ciah a hmat ung, kei cu hriham kä gah ne plah tam nak ka gah khai nei” cik ci.

¹³ Anu naw, “Plah tam nak a gawk law ung kei ah khan ah law sä, ka pyen ah mäih ah hteit ne me hnih cu law püi ä” cik ci.

¹⁴ Ani naw hteit ne me hnih law püi sei, anu naw apa ah m’hni pi vai ah shong ci.

¹⁵ Cun kawn ah anu naw a gim ah a hta ng’vaipi Esau ah suisak akni pi gui cu la neta Jakob am m’sui m’sak ci.

¹⁶ Me ah vun cu la neta Jakob ah a kut la alumu ah kä shung nak, a awng nak ah ak hngü yung ah ng’vai sak ci.

¹⁷ Cun kawn ah hlim khai ah a shon ah meh antui la m’htut cu Jakob am pek ci.

¹⁸ Jakob naw a pa ah om nak ah hteit neta, “Pa awi” cine khü ci. “Äi, nang a u ang?” cine ng’shik ci.

¹⁹ Jakob naw, “Kei cu na hta angvai pi Esau nei, na na m’cäi ah mäih ah ka bi pyi ci nei. Tho law ne ka law püi ah sa meh cu ei neta, hriham phi na pe ä” cik ci.

²⁰ Isaak naw, “A i hawkcha ah shin ah ng’ghit ah na gah law ang, ka hta aw?” cik ci. Jakob naw, “Na Khanpughi Bawipa naw ka hmuh vai ah na m’htei ci nei” cik ci.

²¹ Isaak naw Jakob am, “Ka pei ah law ä, ka ning m’tham shüm khai nei, nang cu Esau akcang ang?” cik ci.

²² Jakob cu apa ah pei ah hteit khäta, apa naw m’tham neta, “Na k’aw cu Jakob ah k’aw, na kut cu Esau ah kut ah kyak ci nei” cik ci.

²³ Akut cu Esau ah kut ah mäih ah mu khäta apa naw Jakob ah kä hmat kheng ne hriham pe law vai neta,

²⁴ Cun ung phi, “Nang cu Esau akcang ang?” cine ng’shi ba mä sei, “Ä, kei nei” cik ci.

²⁵ Isaak naw, “Sa meh cu law püi ä, ei ka ei kawn ah hriham ka ning pek khai nei” cik ci. Jakob naw meh cu pe sei ei ci, sapyit tui phi pe sei awk ci.

²⁶ Cun kawn ah apa naw, “Ka hta awi, law ne na ng’ui law ä” cik ci.

²⁷ Jakob naw law ne ng’ui khäta, a hta ah sui cu m’hnam neta, hriham cu pek ci. Ani naw, “Ka hta ah ng’ui cu Bawipa naw hriham a pek ah laima ah ng’ui ah mäih ah kyak ci nei.

²⁸ Khanpughi naw khankhaw ah khaw tui, m’dek khan ung ng’lei akni ning pe sä! Htang m’guh akda, sapyit akda phi ning pe sä!

²⁹ Chang pakhui päng cu na changshäm ah kya ne, chang sing päng naw ning ng’coi paa na u sä! Na ng’khaw chang gui phung avan uk ä, na nu ah hta gui cu ng’coipaa law u sä. Nang ning m’tam ci phung cu m’tam nak gah sä, nang am hriham ning pek ci phung naw hriham gah sä” cine m’shum phyuk ci.

Isaak ah Hriham ah Phäh ah Esau ng’Coipaa Ci

³⁰ Isaak naw hriham a pek nak ng’pyi sei, Jakob cu a hteh ba vai am, a phäi Esau cu sa yüh te ci law ba ci.

³¹ Ani naw phi akni ah ei vai shong neta apa ah law püi ci. Ani naw, “Pa aw, tho law ne, ka ning thak law ah sa meh cu ei ä. Cun kawn ah hriham cu na pe ä” cik ci.

³² Isaak naw, “Nang a u ang?” cine ng’shik ci. Ani naw, “Na hta ang vaipi Esau nei” cik ci.

³³ Isaak cu ang htei ah cäicat ne ng’thüng neta, “Sa ngawn ne shong ne na m’bei lawk cicu a u ang? Nang kä na law pha ung tuhbäi hta ng’lung ei yawp ne, hriham ka pe pyi ci nei, cun cu ngawi yä ani ah kaa ah kyak khai nei” cik ci.

³⁴ Cun a ci ng’ya neta Esau cu kyap ne m’lau ne, “Pa aw, kei am phi hriham na pe ä” cik ci.

³⁵ Isaak naw, “Na nau cu thuvi ne, law ne na m’hleei ne, nang ah hriham cu hteh püi pyi ci nei” cik ci.

³⁶ Esau naw, “Ana thuvi nak hnih vei law pyi ci, a ming cu Jakob ah akni ah sui ah kyak ci nei. Hta ng’vaipa ah kyak nak phi na gut ci, ka gah vai ah hriham mä na gut ba mä ci nei. Kei ah chaw vai hriham kä om ba khai ma?” cik ci.

³⁷ Isaak naw, “Ani cu nang ah bawi ah ka pyan pyi, mi ng’khaw chang gui avan ani ah changshäm ah ka k’bäi pyi, htang m’guh la sapyit avan ka ap pyi, tuhbäi nang ah phäh ah a i phi kä ka bi ba thei ci nei, ka hta aw” cine pyen nak ci.

³⁸ Esau naw, “Kapa aw, hriham tumat phi kä om ba ne ma? Kei phi hriham na pe tuä, kapa aw” cine kyap ne ng’zoi ci.

³⁹ Isaak naw ani am, “Nang ah hmawk ah khan ah khaw tui kä om ci, M’dek ung ng’lei k’ni kä om ci.

⁴⁰ Khim awn na hnun na m’ghin khai, Na nau ah changshäm ah na kyak khai, Na ng’küknet püi ung phi ani ah k’pan nak ungka a hei ah na gawk khai” cine pyen nak ci.

⁴¹ Esau naw Jakob cu thüi nak ci. Apa naw Jakob am hriham a pek ah hmawk ah kyak ci. “Kapa a sih nak vai ng’et lawk ci, cun ung Jakob ka ngawn khai” cine ngaih-tüh ci.

⁴² Cun ah Esau ah ng’bü cu anu Rebekka naw hmat neta, Jakob cu khü ne, “Ngai ä, na phäi Esau naw nang ning ngawn khai ah pawng ci nei.

⁴³ Ka hta aw, ka pyen ah om ä. Ka be Laban ah om nak Haran gawnu ah ang ghit ah na hteh vai nei.

⁴⁴ Na phäi a m’lung a gei ba ung khüt sei a cu ah na om tu cang vai,

⁴⁵ A m’lung gei ba sei, ani ah khan ah nang ah bi gui a m’hnih law kawn ah chang tüi ne ka ning khü law ba khai nei. Khaw hnüüp ät ung ka hta hnih kä di shum düt khai” cik ci.

Isaak naw Jakob cu Laban ah Tüi ci

⁴⁶ Rebekka naw Isaak am, “Esau ah chu Hittit hnumi gui ah phäh ah ka yaica, ka cümbawng aih ci. Jakob naw mä Hittit hnumi a chu nak läi ung kei cu ka sik khai ah kyak ci nei” cik ci.