ATÜNNAK 26 - Cho Bible Common Language 2016

Isaak Cu Kerara Gawnu Ah Om Ci

¹ Abraham ah om yah ung khaw a shet ah mäih ah khaw she ba khäta, Isaak cu Kerara gawnu Philistin ghangpughang Abimelek ah om nak ah hteit ci.

² Bawipa cu Isaak ah ma ah dang law neta, “Egypt khaw ah kä na hteh vai, kei naw na om nak vai ka pyen ah a shin ah khaw ung na om vai.

³ A shin ung na om vai, kei naw ka ning om püi khai, hriham ka ning pek khai. Nang la na htangshon am shin ah khaw avan ka ning pek khai. Na pa Abraham ung ka bi ah shaitak cu ka kümbe sak khai.

⁴ Khankhaw mik ung om ciah aisi chü ah ka ning pungpiah sak khai. Na htangshon gui am shin ah khaw avan ka ap gui khai. Nang ah htangshon ungka chang pakhui avan naw hriham gah khai gui.

⁵ Abraham cu ka pyen ah om ne ka ng’thukhän shaitak läk ciah kyasei, nang cu hriham ka ning pek khai.

⁶ Cun ah kyasei Isaak cu Kerara gawnu ung om ci.

⁷ Rebekka cu ang htei ah kyom ci kyasei, chang gui naw Rebekka cu ng’ya hlü u neta, acei Isaak cu ami ngawn vai ah ng’ä ne, chang gui naw ami ng’shi ung Isaak ah chu ah kä pyen ne, abe ah a pyen vai ah m’cäi ci.

⁸ Acu ah ami om tu sho hta shäng khäta, Abimelek ghangpughang cu a im kawt ung yu mang neta, Isaak la Rebekka cu ng’yumhni tu ni sei hmu goi ci.

⁹ Abimelek naw Isaak cu khü neta, “Ani cu na chu ah kyak ci maw, a i ah kyasei, ka be na ci ang?” cine ng’shik ci. Isaak naw, “Ka chu ah ka pyen ung chang gui naw ami na ngawn vai ah kyi ne ka pyen nei” cik ci.

¹⁰ Abimelek naw, “Nang naw a i hawkcha ah na bi ang? Kei ah chang tumat mat naw ang ghit ah a chu nak ah a kyak ung, nang naw keimi ah khan ah shetkat nak na gawk sak khai ah kyak ci nei” ci neta,

¹¹ Abimelek naw chang gui am, “Shin ah ng’chungla goi shetkat nak ciah chang cu sih nak gah khai nei” cine pyen na gui ci.

¹² Isaak naw cun ah khaw ung m’shi phu ci. Bawipa naw hriham pe sei a cun ah kum ung a phia ah däm khai ah khäm ba ci.

¹³ Ani cu khawh cham gah tang ne ang htei ah bühmang lawk ci.

¹⁴ Ani ung htawme gui, seipat gui, changshäm gui akda om ci. Cun ah phäh ah Philistin chang gui cu lamneng ci gui.

¹⁵ Ngami naw Abraham a ghin yah ung a changshäm gui naw ami cawh ah tuishawk gui cu, m’dek awn k’be yawp ci gui.

¹⁶ Abimelek naw Isaak am, “Nang cu keimi ah ta na hlüngtai law pi ci, kami khaw ung kä om tu ba ä” cine pyen nak ci.

¹⁷ Cun ah kyasei Isaak cu cun ungka tho ne hteit ne, Kerara khaw ng’nawi ah phung tu ne om shäng shäng ci.

¹⁸ Abraham naw a cawh ah tuishawk gui, Abraham a sih kawn ah Philistin chang gui naw m’dek awn ami k’be gui cu, Isaak naw avan co ba ci. Ang ming gui cun phi apa naw a sui te ah sui ba ci.

¹⁹ Isaak ah ak chang gui naw khaw ng’nawi cu shawk u neta tui hmuk ci gui.

²⁰ Kerara gawnu ah ka htawme shäm gui naw, Isaak ah htawme shäm ci gui am, “Shin cu keimi ah tui nei” cine ng’cuh püi gui u khäta, Isaak naw cun ah tuishawk cu “Esek” ah aming sui ci.

²¹ Isaak ah chang gui naw a hei ah tuishawk ba mä ci gui. Cun phi ng’cuh ba mä u sei, “Ng’Cuh nak” ah aming sui ba ci.

²² Cun ungka naw ng’plon ne a hei ah tuishawk ba mä ci. Cun ung ng’cuh nak a i phi kä om ba khäta, “Ng’päi ng’yee” ah aming sui ci. Ani naw, “Tuhbäi Bawipa naw shin ah khaw ung om vai ah ng’päi ng’zee nak na pe gui pyi ci. Shin ah khaw ung mi ng’bühmang khai nei” cik ci.

²³ Isaak cu cun ungka naw Beersheba ah ng’plon ba ci.

²⁴ A cu mü Bawipa naw ng’dang law neta, kei cu napa Abraham ah Khanpughi ah ka kyak ci nei. Kä na kyih vai, kei naw ka ning om püi ci. Ka chang Abraham ung ka shaitak ah mäih ah hriham ka ning pek khai. Chang chün ah ka ning pungpiah sak khai.

²⁵ Isaak naw a cun ung khawih kiang co ne, Bawipa cu khawihnah ci. A cun ung phung tu u ne a chang gui naw tui phi shawk ba ci gui.

Isaak la Abimelek Ah Thukhän

²⁶ Abimelek naw a chang vai Ahuzzath la gabawi Phikolah cu khah püi ne Isaak ah lawk ci.

²⁷ Isaak naw, “Kei cu kä na m’hni ne na khaw ungka na na k’täm ci, a i vai ah na na hmuh law ang?” cine ng’shik ci.

²⁸ Ngami naw, “Nang cu Bawipa naw ning om püi ciah tuhbäi kami hmat ci nei, mi ng’lak ung ng’gei nak thukhän mi bik khai ah kami ngai ci nei. Keimi naw shai kami tak hlü cu;

²⁹ Nang naw phi kä na na plawh kheih gui vai, keimi naw phi kä kami ning plawh kheih khai. Keimi naw kami ning m’hni ci nei, akding gei ah na hteh ba sak gui ä. Nang cu Bawipa naw hriham a pek ah na kyak ci nei” cik ci gui.

³⁰ Cun kawn ah Isaak naw aktung ah khin na gui ne ei awk ci gui.

³¹ A ngawi ung khawngawi thukhän ne shai ta u neta, Isaak naw yavaih na gui sei, ng’chidam tu u neta hteit ba ci gui.

³² A cu hnüüp ung Isaak ah chang gui cu law u ne, tui shawk ne tui ami hmuh ah mawng cu pyen lawk ci gui.

³³ Ani naw tuishawk cu “Shibah” ah sui ci. Cun ah kyasei gawnu ah ming phi Beerasheba ah ami sui ah kyak ci.

Esau Ah Khui Hei Akchu Gui

³⁴ Esau cu a khaw kum phlikip ung Hittit hnumi hnin chu nak ci. Cun goi cu Berriah ah hta Judith la Elon ah hta Basemath ah kyak ci.

³⁵ Ngami cu Isaak la Rebekka ah yaica nak vai ah kyak ci gui.