ATÜNNAK 21 - Cho Bible Common Language 2016

Isaak Ah Ng’Tüi Nak

¹ Bawipa naw a shaitak ah mäih ah Sarah cu hriham pe sei,

² ani cu kä mah ne, ghi law pyi ciah Abraham ah htapami ah hta lawk ci. A hmaw cu Khanpughi naw akbäi nak khin ung ng’tüi lawk ciah kyak ci.

³ Abraham naw Isaak ah a ming sui ci.

⁴ Isaak cu hnüüp cheit lüng pha sei, Khanpughi ah thukhän ah mäih ah Abraham naw vun-ah nak bi pek ci.

⁵ Isaak a hta nak yah ung Abraham cu a khawkum phia lawk ci.

⁶ Sarah naw, “Khanpughi naw yei vai, gaih vai na pek ci nei. Kei ah mawng ng’ya tuk ciah chang phung gaih tuk khai gui nei” ci neta,

⁷ “Sarah naw a hta am suuk tuu khai nei, cine Abraham ah ma ah a u naw ang a pyen? A ni a ghi law kawn ah ani ah phäh ah kei ka hta ci nei” cine pyen ci.

⁸ A hmaw Isaak cu däm ng’vai law ne, suuk a chah hnüüp ung Abraham naw pawi aktung ah bik ci.

Hakarah la Ishmaela Cu Ami k’Täm Goi

⁹ Hnüüp ät ung Egypt hnumi Hakarah awn ani hta Ishmaela la Sarah awn ani hta Isaak cu ng’gen tuk ci goi.

¹⁰ Acun cu Sarah naw hmu neta, Abraham am, “Shin ah changshäm la a hta cu a hei ah na k’täm goi vai nei. Shin ah hnumi ah hta la kei ah hta naw a täng ah pakhui kä m’düng khai goi nei” cine pyen ci.

¹¹ Ishmaela cun phi a hta ah kya khäta Abraham cu ang htei ah yaica ci.

¹² Cun ung phi Khanpughi naw Abraham am, “Hakarah la a hmaw ah phäh ah kä na ng’ä vai, Sarah ah pyen ah mäih ah na bi vai, a i ah kyasei ci ung Isaak awn vah na ng’shon vai ah kei naw ng’thu ka m’khän ah kyak ci.

¹³ Shin ah changshäm ah hta phi akda ah ka ng’shon sak khai, cun gui phi pakhui na ne om khai gui, ani phi na hta ah kyak ci.

¹⁴ A ngawi ung khawngawi hta Abraham naw, Hakarah am m’htut la tui um pe ne, a hta cu mäm sak neta, a hei ah hteh sak ci. Ani cu ng’düi law ne hteit ne, Beerasheba bung ah hteit shüi shüi ci.

¹⁵ Ngani cu ani tui shaw ng’pyi sei, a hmaw cu k’pluup ka ah m’shän neta,

¹⁶ likah vai hlawk ung hteit ne ngaw ne ngäng ci. Cun kawn ah amät ng’htau ne, “Ka hta a sih cu kä ka hmu hlük ci nei” ci neta, a ngawh nak ung kyap ne m’lau ci.

¹⁷ Khanpughi naw a hmaw a kyah cu ng’ya neta, Khanpughi ah khankho chang naw Hakarah am, “Hakarah, a i ah na kyak ci ang? Kä na kyih vai, Khanpughi naw a hmaw ah kyah ng’yak ci nei.

¹⁸ Ng’düi law ne, hteit ne, a hmaw m’tho ba ne m’htei ä. Shin ah a hmaw ah htangshon cu pakhui küi ah ka pyang khai” cine pyen nak ci.

¹⁹ Cun kawn ah Khanpughi naw a mik yuk m’dei sak khäta, ani naw tui k’büüm cu hmuk ci. Hteit ne tui um ung tui than neta a hmaw am tu ci.

²⁰ A hmaw cu Khanpughi naw m’htei sei, Param bung ah om ne, däm ng’vai law ne, li kaap k’ni ah kya lawk ci.

²¹ Anu naw Egypt hnumi lak pe ne k’chu na sak ci.

Abraham la Abimelek Ah Thukhän

²² Cun sang ung Abimelek la a gakap bawi Phikol cu Abraham ah law ni neta, “Na bilawh nak päng ung Khanpughi naw ning om püi ci.

²³ Cun ah kyasei tuhbäi nang naw, kei, ka hta la ka htangshon ah khan ah kä na hleeihlak khai ah pyen ne, Khanpughi ah ma ah na ng’phyun vai. Kei naw nang ka ning m’htei ah mäih ah kei la na om nak ah khaw cu na m’htei vai ah shai na taak vai” cine pyen nak ci.

²⁴ Abraham naw, “Shai ka tak ci nei” cik ci.

²⁵ Abimelek ah changshäm gui naw, ami ng’cuh ah tui shawk ah mawng pyen ne, Abimelek cu Abraham naw k’she nak ci.

²⁶ Abimelek naw, “Cun cu a u naw a ciah kä ka hmat ci. Nang naw kä na na m’thein man ci. Tuhbäi vah ka ng’ya htük ci” cik ci.

²⁷ Abraham naw htome ni, seipat ni cu Abimelek am pe sei, ngani cu ng’thukhän ci goi.

²⁸ Abraham naw htome akhik chih cu a htome ng’bum ungka k’pai khäta,

²⁹ Abimelek naw, “A i ah na ci tu khan ang?” cine ng’shik ci.

³⁰ Abraham naw, “Shin ah htome gui cu na dou vai, cun ung shin ah tui shawk cu kei naw ka shawk ah na na k’bäi nak ah kyak khai.

³¹ Cun ah hmun cu ngani ah ani ng’phyun nak ah kyasei, Beerasheba ah pyen ci gui.

³² Beerasheba ung cun ah ng’thu ami khan kawn ah Abimelek la Phikol cu Philistia khaw ah hteit ba ci goi.

³³ Abraham naw Beerasheba ah mangken geit neta, angtäi ghing ciah Bawipa Khanpughi cu khawihnah ci.

³⁴ Abraham cu Philistia khaw ah akshou om tuk ci.