ATÜNNAK 16 - Cho Bible Common Language 2016

Hakarah la Ishmaela

¹ Abram ah chu Sarai cu kä hta ci. Ani ung Hakarah ming nak ciah Egypt chang hnumi hta a changshäm om ci.

² Cun ah kyasei ani naw Abram am, “Bawipa naw ka hta vai kä na pek ci, changshäm hnumi hta cu na ih püi vai, ani ung a hmaw ng’tüi hman hngaw khai nei” cine pyen nak ci. Abram naw Sarai ah pyen cu yum ci.

³ Cun ah kyasei Sarai naw Hakarah cu a chu nak vai ah Abram am ap ci. Cun gui cu Abram Kanaan khaw ah kum gha a om kawn ah a mawng gui ah kyak ci.

⁴ Abram cu Hakarah awn ip ni neta, Hakarah cu kämah lawk ci. Hakarah naw a kämah hmat neta, amlung m’däm ne, bawinu cu shedam nak ci.

⁵ Cun kawn ah Sarai naw Abram am, “Hakarah ah na shedam nak cu, nang ah khan ah gawk sä. Ani cu kei naw ka ning ap nei, cun ung phi a kämah law hmat neta, kei cu na shedam nak ci nei. Bawipa naw nang la kei ung düng ci la kä düng cicu ng’thumcha sä” cine pyen ci.

⁶ Abram naw, “Ani cu nang ah changshäm ah kya ne, nang ah kut kyong ung om ci, ani ah khan ah na bi hlü na bi vai” cine Sarai am pyen nak ci. Cun kawn ah Hakarah cu Sarai naw shedam na khätah dawng ci.

⁷ Bawipa ah khankho chang naw, Hakarah cu Shura ah hteh nak lam tui pei ah hmu neta,

⁸ “Sarai ah changshäm Hakarah, a hawi kaa na lawk ci, a hawi lam ah na hteit khai” cine ng’shik ci. Ani naw, “Kei cu ka bawinu ah im ungka ka dawng ci nei” cik ci.

⁹ Khankho chang naw, “Na bawinu ah hteit ba ne a changshäm ah na kyak ba vai nei” cik ci.

¹⁰ Khankho chang naw pyen bamä ne, “Chang naw kä a khei tai vai ah da khai ah ka ning shon sak khai.

¹¹ Nang cu pami ah na hta khai, aming cu Ishmaela ah na sui khai, a i ah kyasei ci ung Bawipa naw yaica ne na kyah cu ng’ya pyi ci nei.

¹² Cun ung phi na hta cu ng’se k’yäng awn täng khai nei, chang avan cu hnungtuk püi khai, chang avan naw hnungtuk püi ba khai. Ani cu a mätyah gui avan awn ng’shawng ne om khai” cine pyen nak ci.

¹³ Hakarah cu amät ng’htau ne, “Kei na hmuk ciah Bawipa cu shin ung akcang ah ka hmuk ci nei” ci neta, ani ng’thu püi ciah Khanpughi cu ‘Elroi’ ah a ming sui ci.

¹⁴ Cun ah kyasei Kadesh la Bered ah ng’lak ah om ciah tui shawk cu, “Ghing ne kei na hmuk ciah tui shawk” ciah sui ci gui.

¹⁵ Hakarah cu pami ah hta law sei, Abram naw Ishmaela ah aming sui ci.

¹⁶ Cun yah ung Abram cu a khawkum 86 lawk ci.