ATÜNNAK 15 - Cho Bible Common Language 2016

Abram Am Khanpughi Ah Thukhän

¹ Cun kawn ah ang muimang ung Bawipa naw ng’thu püi sei Abram naw a hmuh ng’yak cu, “Abram, kä na kyih vai, kei naw nang cu ka ning shungvong khai, m’cümhnah aktung ka ning pek khai” ciah kyak ci.

² Abram naw, “Uk ciah Bawipa, a i m’cümhnah ang, kei am na na pek kaw, kei cu ka hta kä om sei, Damaskas ah kaa Eliezer naw ka pakhui m’düng ci nei.

³ Nang naw ka htapa vai kä na pek ci sei, ka changshäm naw ka pakhui m’düng khai kyak ci nei” cik ci.

⁴ Cun kawn ah Bawipa ah ng’thu angyak bamä cu, “Shin ah changshäm naw pakhui kä m’düng khai, na mät ah na hta naw na pakhui m’düng khai nei” ci neta,

⁵ Bawipa naw akpung ah luh law püi neta, “Khankhawmik dan ne, aisi gui cu khei shüm ä, na htangshon cu shin ah aisi chü lawk khai nei” ciah kyak ci.

⁶ Abram cu Bawipa yum ci kya ne, a yum nak cu Bawipa naw yei ne dou pek ci.

⁷ Cun kawn ah Bawipa naw, “Kei cu, nang naw shin ah khaw na khäm vai ah, Babilonia khaw, Ura gawnu ungka ning law püi ciah Bawipa ah ka kyak ci nei” cik ci.

⁸ Abram naw, “Uk ciah Bawipa, shin ah khaw ka khäm ah mawng cu a i cha ah ka hmat khai ang?” cine ng’shik ci.

⁹ Ani naw, “Kum thum ci kum nak ciah seipat tumat, me tumat, htawme hta akhla tumat, la müm bawk tumat, müm tumat cu kei ah law püi vä” ci sei,

¹⁰ Abram naw a cun gui cu Khanpughi ah law püi neta, a cawih cawih ciah m’chün ne, vangtäng ciah k’bum ci. Cun ung phi kha gui cu kä m’chün tuk ci.

¹¹ A ngawn ah pumsa gui cu langta gui naw ei khai gui ah yawng law u sei Abram naw k’täm gui ci.

¹² Khawhni a hang kiaak kawn ah Abram cu ip hniim ne ip neta, khaw mü ne hmüp law khätah kyikyawk ci.

¹³ Bawipa naw, “Na htangshon gui cu chang ah khaw ah omktu ah kya ne om tu u ne, chang ah changshäm ah kya ne, chang ah shedam nak cu khawkum phia phli ung bui awt khai gui nei.

¹⁴ Cun ung phi ngami shäm gui ciah pakhui cu kei naw ka m’kyuk khai nei. Ngami cu cun ah khaw nawng shüt ne ami law ba hnüüp ung khawh angpeeih law püi khai gui nei.

¹⁵ Nang na mät cu ghi ne na ghing khai, na sih ung phi ding gei sei htüm tha nak na gah khai nei.

¹⁶ Ng’shon phli a lüng kawn ah na ng’shon gui cu shin ah khaw ung law ba khai gui. Amorit chang gui cu cheishoh ci gui, cun ah kyasei kei naw ka k’täm gui khai, ami katnak nü ah phäh ah m’kyuk nak gah khai gui.

¹⁷ Khawhni hang kyasei khaw hmüp law khätah, khu ciah shei k’am la däi ciah mei im cu ang ghit ah dang law ne, khisa meh gui cu khan gui ci.

¹⁸ Cun kawn ah Bawipa naw Abram ung thukhän bik ci. Ani naw, “Kei naw shai ka taak cu, shin ah khaw avan na htangshon gui am ka pe gui khai, cun cu Egypt khawgii ungka naw Euphratis tuinu ung khüt khai;

¹⁹ Kenit gui, Kenizzit gui, Kadmonit gui,

²⁰ Hitit gui, Perizzit gui, la Rephaim gui,

²¹ Amorit gui, Kanaanit gui, Kirkashit gui la Jebusit chang gui phi, nang ah htangshon gui am ka ap gui khai nei.