ATÜNNAK 13 - Cho Bible Common Language 2016

Abram La Lotah Ah Ng’pai Nak

¹ Abram la a chu ni, Lotah ni cu ami khawh cham avan hteh püi ne, Egypt khaw ah ka naw Kanaan khaw a htumtäng ah gawk ci gui.

² Abram cu htawme, me, seipat la ghui ngui gui awn büh mang ci.

³ Cun ungka ani cu ng’plon ba shüi shüi neta, Bethela khaw täng ah hteit ba ci. Ani ayan a om nak man te ah kyak ciah Bethela lah Ai ah ng’lak ah gawk ba ne,

⁴ acun ung sonkiang co ci. Acun ung ani naw Bawipa khawihnah ci.

⁵ Lotah cun phi htome ni, me ni, seipat gui ni, amät ah kyong khui naw angbüh nak vai om ci.

⁶ Ngani cu ani seime gui da aih sei, a täng ah ani om nak vai ah ng’büh khai ah khaw hmun kä om ci.

⁷ Abram ah sei shäm ci gui la Lotah ah sei shäm ci gui phi a shäng shäng ng’gen ne ng’tuk ci gui. (Cun sang ung Kanaan chang gui la Perissit chang gui phi acun ah khaw ung om yah ci gui.)

⁸ Abram naw Lotah am, “Nik ni cu ng’mätzah goi ah ni kyak ci. Nang ah chang gui la kei ah chang gui ah ng’lak ah ng’tuk gen nak kä om men sä.)

⁹ Cun ah kyasei khaw ni ng’pai khai. Khaw avan ungka na m’hni nak täng ghü ne na hteh vai, kei cu vangtäng ung ka hteit khai” cine pyen ci.

¹⁰ Lotah naw dan shüi neta, Jordan khaw ng’nawi avan cu hmuk ci. Cun cu Zoar gawnu ah hteh nak lam, tui ah da nak, Bawipa ah chaam ah mäih, Egypt khaw ah mäih ah kyak ci. (Cun cu Bawipa naw, Sodom la Komorrah kä a m’di pha ung ah kyak ci.)

¹¹ Cun ah kyasei Lotah naw Jordon khaw ng’nawi avan cu amät ah hmawk ah ghü neta, hni law lam ah ng’plon ne hteit ci. Cun cu ngani ah ani ng’pai nak ah kyak ci.

¹² Abram cu Kanaan khaw ung om ci. Lotah cu mang gaw gui ah ng’lung khaw ng’nawi ung om ne, Sodom mang gaw pei ah phung k’süm ci.

¹³ Sodom gawnu ung chang gui cu, chang shekha gui, Bawipa hnu na ne cheishoh ci gui ah kyak ci.

Abram Cu Hebron Khaw Ah Ng’plon Ci

¹⁴ Lotah a hteh kawn ah Bawipa naw Abram am, “Na om nak ungka naw khaw avan m’htei ne na teng vai nei.

¹⁵ Na hmuh bäät ah khaw avan cu nang la na htangshon am ka ning ap khai nei. Cun cu khawnglän ung na khaw ah kyak khai nei.

¹⁶ Nang cu chang akchün ah ka ning pungpiah sak khai. M’dek khui cu chang naw kä a khei hlawt yawp ah mäih ah nang ah htangshon cu chang naw kä khei yawp hlawt khai nei.

¹⁷ Tuhbäi hteit ne khaw hmun avan na teng vai. Shin ah khaw avan cu tuhbäi ka ning pe lawk khai nei” cine pyen ci.

¹⁸ Abram cu a phung gui k’plon ne, theing ciah Mamre sing ghing hmu ah pei ah ng’lei leh ci. A cu ah ani naw Bawipa ah khawih kiang co ci.