AMOS 8 - Cho Bible Common Language 2016

Sing theih Dawn A Hmuh nak

¹ Uktu Bawipa ungka kei naw ahei ka mik hmu ba ci. Acun ung sing theih dawn tumat cu ka hmuk ci.

² Bawipa naw, “Amos, a i ang na hmuh?” cik ci. Kei naw, “Sing theih dawn tumat” ka cik ci. Bawipa naw kei am, “Ka chang Israel gui ah phäh ah ak hnu bäih akhin cu gawk lawk ci nei. M “Kyuk nak gui vai ah mawng ung kei naw ka m’lung kä ka m’thawng ba khai.

³ Cun ah hnüüp ung mang im ah ng’äi gui cu, kyah l’lau nak ah kyak khai. A hmun päng ung chang si gui ng’yaih khai. Cun gui cu chang gui naw a düm ah ghawt gui khai gui.”

Israel ah Ng’yiin nak

⁴ Ngai vä, dukhaih ci shedam na ne, pyamtham ciah khaw m’di ciah chang gui.

⁵ Nangmi nami mät ng’thu u ne, “Theingciim ciah hnüüp ang pyi vai cu, keimi naw aktung ah kami ngäng ci nei, cun ung keimi naw kami htang cu kami yoi hlawt khai. Kyiin nak hnüüp cu a i yah ung ng’pyi khai ang? Cun ung kami yoihtuk vai kami tün ba khai nei. Cun kawn ah keimi naw kami shum khai, kä hman ciah nän nak gui, kä düng ciah khin nak gui.

⁶ Kä nik ciah htang cu aküi ah kami yoi hning khai. Aphu kä thung hlawt ciah chang pyaam cu keimi naw kami hmuk khai, ani cu a phahnak phi kä thung hlawt ci, cun cu mikmi naw changshäm vai ah mik khleih khai” nami cik ci.

⁷ Bawipa Israel gui ah Khanpughi naw, ng’taam ne a pyen cu, “Ngami naw akshe ami b i gui cu kei naw kä ka m’hnih phung khai nei.

⁸ Cun ah kyasei m’dek cu thüng khai. Khaw ung chang päng cu ng’hlaw ei khai. Khopäng avan thüng khai, cun cu tho ne Nile tuinu ah mäih ah kyeim ba khai.

⁹ Hnüüp lung ung khohni hang kyak khai, k’awi nu ung khomdek mü khai ah ka bi nak vai ah akhin cu gawk lawk ci nei. Kei Uktu Bawipa naw ng’thu ka pyen nei.

¹⁰ Nami yungkawi cu sih htüm ah ka lat khai, nami yei nak ng’äi cu kyah m’lau ah ka lat khai. Nami lu ning ah sak gui ne, thüisei suinu ka ning sui sak gui khai. Nangmi cu a hta tumat bäng ah phäh ah thüikyap ciah nupa gui ah mäih nami kyap khai. Cun ah hnüüp cu akha ah ng’pyi khai.

¹¹ “Nami khaw ung khaw a shet nak, ka chah law nak vai ah akhin cu gawk lawk ci nei. Chang gui cu cawi khai gui, ei ah cawi ah kä kyak ci, gha khai gui, tui ah gha ah kä kyak ci, ngami cu Bawipa ah ng’thu ah cawi gha khai gui. Kei Uktu Bawipa naw ka pyen nei.

¹² Tuiksi tuinu ungka naw Mediteranean tuinu, asiip ungka naw akiang ung khüt sei, chang gui cu ng’vaak khai gui. Ngami naw khaw päng ung Bawipa ah ng’thu cu shuiyap khai gui, cun ung phi kä hmuk khai gui.

¹³ Cun ah hnüüp ung gaigawng ciah changnong hnumi pami gui phi tui ah gha ne yai khai gui.

¹⁴ Samaria ah agup gui awn ng’phyun ciah chang gui, ‘Dan khanpughi ung, Beersheba khanpughi ung’ cik ciah chang gui cu — kiuk khai gui, kä tho ba khai gui.”