AMOS 7 - Cho Bible Common Language 2016

Khanpeh ah mawng Muimang

¹ Uktu Bawipa ungka kei naw tumat ka hmuk ci. Ghangpughang ah ka khu m’sai ami ah pyi cu lim law ba u khäta, ani naw khanpeh ng’hlom ät cu tui pyang sei ka hmuk ci.

² Kei naw ka mang ung khaw a kyong ung khu am kim phung khanpeh gui naw ei yawp u sei ka hmuk ci. Cun kawn ah kei naw, “Uktu Bawipa na chang gui cu m’gein gui ä! A i hawkcha ah ngami pawih ba khai gui ang? Ngami cu yawken aih ci gui nei!”

³ Bawipa naw am lung m’thawng neta, “Na hmuh ah mäih ah kä kia hnga khai nei” cik ci.

Mei ah Mawng amik hmuh

⁴ Uktu Bawipa ungka, kei naw ahei ka hmu ba mä ci. Acun ung ani naw a chang gui cu mei awn m’kyuk gui vai ne pawng sei ka hmuk ci. Mei naw khomdek ah ka ah tuinu akdäm cu ui yawp ci, khaw ng’lei cu tün ne ui lawk ci.

⁵ Cun kawn ah kei naw, “Ng’düm ä, Uktu Bawipa! A i cha ah na chang gui om ba khai gui ang? Ngami cu yawken aih ci gui nei!” cik ci.

⁶ Bawipa naw am lung m’thawng bamä neta, “Cun ah kä kya hnga khai nei” cik ci.

Nüt nak Gui ah mawng amik hmuh

⁷ Bawipa ungka kei naw ahei ka hmu bamä ci. Ani cu paang ah pei ah ng’düi sei ka hmuk ci. Cun ah paang cu nüt gui awn nüt he ami cawh ah kyak ci. Cun ah nüt nak gui cu ani ah kut ung om ci.

⁸ Ani naw, “Amos, a i ang na hmuh?” cine na ng’shik ci. “Nüt nak gui nei” cine ka m’hlan ci. Cun kawn ah ani naw, “Gui awn kä nüt ne cawh ah paang ah mäih ah ka chang gui ami kyak cu m’dang vai ah kei naw shin cu ka mang ci nei. M’kyuk nak gui vai ung kei naw ka m’lung kä ka m’thawng ba khai.

⁹ Isaak ah hta ng’shon gui ah khawihnah nak ah hmun cu m’di vai nei. Israel gui ah theingciim ciah hmun gui cu ng’gäi ne di yawp khai nei. Kei naw ghangpughang Jeroboam ah ng’shon cu ka ng’pyi sak khai nei” cik ci.

Amos la Amaziah

¹⁰ Amaziah, Bethela ung taigü naw, Israel ghangpughang Jeroboam am ng’thu am thein law cu, “Amos naw chang gui ah ng’lung ah nang cu düm ah ning hnungtuk püi ci nei, ani ah ng’thu naw khaw cu di sak khai nei.

¹¹ Shin cu ani ah ng’thu nei, “Jeroboam cu ng’tuk nak ung sik khai, Israel chang gui cu ami khaw ungka omktu ah hteh püi gui khai gui’ ” cik ci.

¹² Cun kawn ah Amaziah naw, Amos am, “Prophet aw, na cängbang cu bä khai nei! Judah ah hteit ba ne ng’thu pyen ba ä. Acun ah phäh ah ning pe u sä.

¹³ Shin ah Bethela ung kä na ng’cängbang ba vai nei. Shin cu ghangpughang ah khawihnah nak hmun, pakhui k’tung ah Taigüim ah kyak ci nei” cik ci.

¹⁴ Amos naw, “Kei cu ng’cheng dou ne ng’cäbang ciah prophet ah mäih ah kä ka kyak ci. Kei cu sei shäm ciah ka kyak ci, theising gui ka m’htei ci.

¹⁵ Cun ung phi htoshäm bii ka bi nak ungka Bawipa naw na k’thäh ne, hteit ne a chang gui Israel gui ka k’cä gui vai ah na k’bäi ci.

¹⁶ Tuhbäi Bawipa naw a i a cicu ngai vä. Nangmi naw ka ng’cä nak ka ng’düm vai, Israel gui hnungtuk ne ng’thu cu ka ng’düm vai ah na mi pyen ci.

¹⁷ Cun ah kyasei Amaziah naw, Bawipa naw ng’thu ning pyen nak ci nei, ‘Na chu cu mang gaw ung chang plet ah kyak khai. Na hta gui cu ng’tuk nak ung ngawn gui khai gui. Na khaw k’bou ne chang hei gui am pe gui khai gui. Nang na mät cu khaw she khaw ah na sik khai. Israel chang gui cu ami khaw ungka, akcang ah k’täm gui u ne, omtu khaw ah gawt gui khai gui.’ ”