AMOS 6 - Cho Bible Common Language 2016

Israel ah Dishum nak

¹ Cun cu nangmi ah phäh ah a i hlawk ah kyih vai ah kyak khai aw, Zion ung yäi sei om ci gui, Samaria ung phiawng ne om ci gui — nangmi cu dämduh ciah Israel pakhui ah ng’vai gui, nangmi ah chang gui m’htei vai ah hteit ci gui.

² Hteit ne Kalaneh mang gaw cu teng vä. Cun kawn ah däm ciah Hamath mang gaw ah hteit vä, Philistin mang gaw Kath ah phi hteit vä. Ngami cu Judah la Israel ah uknak khaw ah mä bä tuba u ne ang? Ami khawpäng cu nangmi ah mä ng’shawng tuba ne ang?

³ Nangmi naw leigai a gawk law nak ah hnüüp cu nami maa nak ci, cun ung phi nami bi bäng naw cun ah hnüüp cu law püi ge ci nei.

⁴ Ih phak ak hnip ung ng’yän ne, sei hta la htome hta ah sa ei ne na om cu, a i hlawk ah kyih vai ah kyak ci ang?

⁵ Nang cu David ah mäih ah ng’äi pyan m’hni ne, tingtäng tum ne na ng’äi ci.

⁶ Nang cu sapyit tui k’am ung be ci aw ne, tui ng’ui akni pi na mang ci, cun ung phi Israel ah dishum ah phäh ah kä na thüisei ci.

⁷ Cun ah kyasei nang cu omktu ah na hteit ma khai. Na mang pawi la na ng’huutcam nak cu ng’pyi khai.

⁸ Uk ne m’gäi ciah Bawipa ah bä ciah ang cäi nak cu: “Israel gui chang ah ami ng’shei cu kei naw ka thüi nak ci, ami ng’päi im gui cu kei naw ka päipih ci. Kei naw ami mang gaw la akyong ah om ci nü cu ga am ka ap khai” cik ci.

⁹ Im kyong ät ung chang gha ami pawih ba ung phi ngami cu sik khai gui.

¹⁰ Sik ciah mätyah, sih htüm nak ung tängpang ci naw gook cu im ah k’pung ah luh law püi khai. Cun ah mätyah naw im kyong ah om ba cicu khü neta, “Nang awn atäng ah tumat mat om ba ne ang?” cine ng’shik khai, chang naw “Ka nei” cine m’shang khai. Cun kawn ah mätyah naw, “Düm ah om vä, mi geing nak khai, Bawipa ah ming phi kä mi pyen khai” cik ci.

¹¹ Bawipa naw ng’thu a pyen law ung im kawm, im yaw ng’phye ne maih khai.

¹² Ng’se cu lungpou ah khan ah dawng man ne ang? Chang naw tuinu ah khui ah seipat awn lai thawn man ne ang? Cun ung phi nangmi naw taga nak cu m’äm tui ah nami lat ci, gei cicu nami chei sak ci.

¹³ Nangmi naw Lodebar gawnu näng neta nami längtang ci. “Karnaim gawnu khäm vai ah kami khüighat ci nei,” cine nami khäh ghah ci.

¹⁴ M’gäi ciah Bawipa Khanpughi cu amät ng’htau ne, “Israel chang gui, kei naw nami khonglei tuk khai ah akhohei gakap gui cu ka tüi lawk khai. A cun naw asiip täng Hamath lam ung, ahtum täng Arabath tui ung khüt sei, ning khüt sei ning yawshe na gui khai.”