AMOS 5 - Cho Bible Common Language 2016

Ng’yuu ba vai ah Ng’khü nak

¹ Ngai vä, Israel chang gui, shin cu kei naw ka ning ng’äi gui ah gook kyah ng’äi ah kyak ci.

² Lamihta Israel cu kyu ne ng’yän ci nei. Kä tho law ba hlawt ci! Ani cu khomdek ung amät bäng ng’yän ci, a u naw kä m’tho tuba ci.

³ Uktu Bawipa naw, “Israel mang gaw tumat naw gakap phya gha tüi sei, phya bäng ng’hlat law ba ci, ahei mang gaw naw phya tüi sei gha bäng hlat law ba ci.”

⁴ Bawipa naw Israel chang gui am, “Kei ah law vä, nami ghing khai.

⁵ Beersheba khawihnah vai ah kä nami hteh vai, Bethela ung kei nami na hmuh vai ah kä nami tha nak vai, Bethela cu akholä ah kia lawk khai. Kikal ah kä nami hteh vai — ani ah chang gui cu omktu ah ng’yiin khai gui.”

⁶ Bawipa ah hteit vä, nami ghing khai nei. Kä nami hteh ung ani naw Israel chang gui cu mei ah mäih ah ui gui khai. Bethela chang gui cu mei naw ui gui khai, cun cu a u naw kä m’diim hlawt khai.

⁷ Nangmi cu nami ng’yiin ci, taga nak cu nami k’phiui ci, chang gui ah ami chaw cu nami m’hleei ci.

⁸ Bawipa naw aisi gui pyang ci, müke la thaihke phi pyang ci. Ani naw mühmüp cu hnüüpdei ah ng’lat sak ci hnüüp cu mü ah ng’lat sak ci. Ani naw tuinu tui cu khä ne khomdek khan ah lon sak ci. Ani ah ming cu Bawipa nei.

⁹ Ani naw m’gäi ci gui la ami thamah nak gui m’di nak cu law püi ci.

¹⁰ Nangmi chang gui naw kä taga ci m’taga ne, mang ah m’kawt ung düng sei ng’thu cicu nami thüi nak ci.

¹¹ Nangmi naw dukhaih ci gui nami yawshe na gui ci, ami geit phi nami guh pe gui ci. Cun ah kyasei nangmi cu lung awn nami cawh ah im akni ung kä nami om khai. Nami geit ah sapyit akni ungka a tui phi kä nami awk khai.

¹² Shah aih ciah nami katnak gui la leng ba ba ne nami katnak gui cu kei naw ka hmat ci. Chang k’ni nami dukdeiu nak ci, ng’mü khawh nami lak ci, mang ah m’kawt ung dukhaih ci ghui ah gah vai ah taga nak gui cu nami shung ci.

¹³ Cun ah kya sei, cun ah akshekha ah khin ung düm ah om cu akbä ah bii bi ah kyak ci.

¹⁴ Ngaih na ne akni nak bi vai, akshe kä nami bi vai, cun ung nami ghing khai. Nami pyen nak ah mäih ah Bawipa Khanpughi naw akcang ah ning om püi gui khai.

¹⁵ Akshe gen vai, akni m’hni vai, man m’kawt ung dangh ciah taga nak nami hmuh vai. Pawih ba ne ghing ne ciah pakhui chang gui cu Bawipa naw chimgein nei gui hman khai nei.

¹⁶ Cun ah kyasei m’gäi ciah Uktu Bawipa naw, “Mang gaw lam gui ung m’lau ne thüikyah nak om khai nei. Sih nak ng’län sei thüikyap ci gui awn, thüikyap tuk khai ah lai bik ci gui phi khü gui khai gui nei.

¹⁷ Sapyit lo gui avan ung kyah m’lau nak om khai. Shin gui avan cu kia lawk khai, a i ah kyasei ci ung kei naw law ne ka ning m’kyuk gui khai” cine Bawipa naw pyen ci.

¹⁸ Bawipa ah hnüüp ngäng ciah nangmi ah phäh ah a i hlawk ah khüikha vai kyak khai aw! Cun ah hnüüp ung akni a i nami bik khai aw? Cun ah hnüüp cu nangmi ah phäh ah hmüp khui ah kyak khai, akdei ah kä kyak khai.

¹⁹ Cun cu kawng kyih ne dawng neta khawm awn ng’awt ciah chang ah mäih ah kyak khai. Im ah lut ba ne paang ung akut taih khäta phyu naw akdawh ah mäih ah kyak khai.

²⁰ Bawipa ah hnüüp naw hmüp khui law püi khai, akdei kä law püi khai. Cun cu m’thaan nu ah kyak khai, api ah phi kä dei khai.

²¹ Bawipa naw, “Zumnak ah nami pawi gui cu kei naw ka thüi nak ci, kei naw kä ka m’düih gui hlawt khai!

²² Nangmi naw m’khih ne douthak la htang-douthak nak nami law püi ung, kei naw kä ka dou khai. Plan ciah seime douthak vai nami law pü phi kä ka dou khai.

²³ Pamcai ciah nami ng’äi cu düm sak vä, nami tingtäng cu kä ka ng’ya hlük ci nei.

²⁴ Cun nak vaisü ung taga ciah tuihta ah mäih ah long vä, kä ket hlawt ciah tuinu ah mäih ah ng’düng vä.

²⁵ “Israel chang gui, kei naw bungpuk ung ka ning law püi ba gui yah ung, kum phlikip ah kyong ung, khawihnah nak la douthak nak cu kä ka ning thäh gui ci.

²⁶ Cun ung phi tuhbäi nangmi naw nami ghangpughang khanpughi Sakkuth ah gup la Kaiwan, nami aisi khanpughi cu nami khawihnah ci. Acun ah gup gui cu nangmi naw nami m’kawn khai.

²⁷ Kei naw omktu khaw, Damaskas ah hnun täng khaw ung ka ning hteh püi gui yah ung” cine m’gäi ciah Khanpughi ming nak ciah Bawipa naw pyen ci.