AMOS 4 - Cho Bible Common Language 2016

¹ Shin cu ngai vä, Samaria hnumi gui, Bashan seipat nu ah plan ah mäih ah plan ciah chang gui, ak tha ken ci k’she nak ci gui, dukhaih ci yaw ynak ci gui, nami cei ah yuu nami thäh ci gui!

² Uktu Bawipa cu theingciim ci kya ne, ani ah shaitak cu, “Nga m’kaih awn kaih ne ami ning ghawh nak gui vai ah hnüüp gawk lawk khai, nami chang sing cu nga ah mäih ah nga m’kaih ung nami ng’bat khai.

³ Nangmi cu ning yäk gui une, paang ning thah na gui ne, ning ghawt gui khai gui,” ciah kyak ci.

Israel ah Yungkyak nak Ng’theinak vai

⁴ Uktu BAWIPA naw, “Israel chang gui, Bethela khaw theingciim ciah hmun ah hteit ne, shetkat nak bi vä! Kikal ah hteit ne shetkat nak bi pi k’hteh vä! Ma ne hteit ne khawihnah nak vai ah seime cu a ngawi tä sei law püi vä, a hnüüp thum päng ung nami bum gha bum ät cu law püi vä.

⁵ Hteit ma u ne nami m’htut cu Khanpughi am yeikyai nak ah nami douthak vai nei. Akdäm nami law püi ah khawihnah nak ah mawng cu nami shäu vai. Cun cu nangmi naw m’hni ne nami bi hlü ah kyak ci.

⁶ “Kei cu nami mang gaw gui avan ah khan ah leigai ka law püi ciah kyak ci. Cun ung phi nangmi cu kei ah kä nami law ba ci.

⁷ Nami geit naw khawtui ang yak hlü yah pi ung kei naw khaw aa ka m’hlat ci. Mang gaw tumat ah khan ah khaw ka aa sak ci, ahei ah khan ah kä ka aa sak ci. Lo tumat ah khan ah khaw yuk aa ci, ahei tumat cu chawng ne ket ci.

⁸ Tui ah gha ci gui, mang gaw akda ung chang gui cu, tui om khai ah ami ngaih nak ah mang gaw ah hteit ci gui. Cun ung phi awk ng’büh vai tui kä om ci. Cun güt ung nangmi kei ah kä nami law ba ci.

⁹ “Kei naw nami geit chawng sak khai ah ng’hüüt ciah khokhi cu ka tüi lawk ci. Khanpeh gui naw nami loma avan, nami geit a vuipai avan, nami thei ghing gui, olive sing gui ei yawp ci gui. Cun güt ung nangmi kei ah kä nami law ba ci.

¹⁰ “Kei naw leigai tumat cu Egypt gui ah khan ah ka chah ah mäih ah ka yuk chah ci. Kei naw nami chang nong gui ng’tuk nak ung ngawn gui ne, nami ng’se gui cu ka k’täm ci. Nami hmun ung sik ciah ak thu gui awn nami hna cu ka be sak ci. Cun güt ung nangmi kei ah kä nami law ba ci.

¹¹ “Kei naw nangmi am shah gui cu ka ning m’di gui khai, Sodom la Komorrah ah mäih ah nangmi ungka pawih ba cicu mei k’däi ungka lak ah htung ciuh ah mäih ah kyak khai. Cun ung phi nangmi kei ah kä nami law ba ci” cine Bawipa naw pyen ci.

¹² “Cun ah kyasei Israel chang gui, kei naw nangmi cu ka ning m’kyuk law gui khai, A i kyasei ci ung kei naw cun cu ka bi law ge khai, kei ah ka m’khoicha nak nami awt ge khai ah om vä!”

¹³ Khanpughi cu khomhtung gui piang ne, khokhi tüisho ciah kyak ci. Ani naw a m’lung ngaih cu chang gui am hmat sak ci; ani naw khaw hnüüp cu mü ah ng’lat sak ci. Ani cu m’dek khan ahlüng nak pi ung hteit ci. Ani ah ming cu Bawipa, m’Gäi ciah Khanpughi ah kyak ci.