AMOS 2 - Cho Bible Common Language 2016

Moab

¹ Bawipa naw, “Moab chang gui cu leng ba ba ne shekak ci gui, acun ah phäh ah kei naw akcang ah ka m’kyuk gui khai. Ngami naw Edom ghangpughang ah guh cu m’vut ah kyak khai ah m’khih u ne, kä chang m’sui ci gui.

² Kei naw Moab khaw ah khan ah mei yuk chah ne, Kerioth ah mang paang cu ka m’khih khai. Ami ng’tuk nak ng’güt nak ung Moab chang gui cu sik khai gui. Cun yah ung gakap gui cu m’lau pyaang khai gui, phyungheng gui cu ng’shan khai.

³ Kei naw Moab uktu la cun khaw ung ami ng’vai gui avan ka ngawn gui khai.”

Judah

⁴ Bawipa naw, “Judah chang gui cu leng ba ba ne shekak ci gui, acu ah phäh ah kei naw akcang ah ka m’kyuk gui khai. Ngami naw kei ah m’theithang cu päipih ci gui, kei ah thumkhän cu kä kutshum ci gui. Ngami cu ami pupa gui ah khawihnah ah khanpughi she gui läk u ne, lam hma ci gui.

⁵ Cun ah kyasei kei naw Judah ah khan ah mei ka yuk chah khai, Jerusalem ah mang paang cu ka m’khih khai.”

Israel ah khan ah Am’khoicha nak

⁶ Bawipa naw, “Israel chang gui cu leng ba ba ne shekak ci gui, acun ah phäh ah kei naw akcang ah ka m’kyuk gui khai. Ngami naw ami pu kä thung hlawt ciah changnigui la ami phahnak phu phi kä thung hlawt ciah dukhaih ci gui cu, khleihtein vai ah yoi gui ci gui.

⁷ Ngami naw aktha ken ci la amgein kaa gui cu k’thüng gui u ne, dukhaih ci gui cu lam ungka buh tawn gui ci gui. Apa la ahta naw changshäm hnumi hta cu ng’lak na ne chu nak ci goi. Cun ah kya ne ka ming theing cu m’shet ci gui.

⁸ Khawihnah nak päng ah chang gui cu suisak ah khan ah ip ci gui, cun cu dukhaih ci gui ah kaa aphu ah ami lak ah kyak ci. Ami Khanpughi ah Taigüim ung ngami cu yu awk ci gui, cun cu ami ngui pu tuk ciah chang gui ah kaa ami lak ah kyak ci.

⁹ “Cun ung ka chang gui aw, nangmi ah hmawk ah Amorit chang gui cu ng’pyi khai gui ah ka m’di gui khai nei, ngami cu ceda sing güt law u ne, m’htai ghing hlawk ah khüi ci gui.

¹⁰ Kei naw Egypt khaw ah kaa ka ning law püi ba gui ci, khokum phlikip ung bung puk ka ning kaan sak gui ci, Amorit gui ah khaw cu nami kaa vai ah ka ning pe gui ci.

¹¹ Kei naw nami hta gui am shah cu prophet ah ka ghü gui ci, chang nong am shah cu Nazirit ah ka ghü gui ci. Israel chang gui aw, shin cu kä hman ne ang? Kei, Bawipa naw ng’thu ka pyen ci nei.

¹² Cun ung phi nangmi naw Nazirit gui cu yu nami awk sak gui ci, prophet gui naw ka ng’thu kä ami pyen vai ah nami k’bäi gui ci.

¹³ Tuhbäi kei naw m’dek ung ka ning deeng gui khai, Htang be sei m’khäh ah ng’hle ah ng’gin ah mäih ah nami ng’hlo ei khai.

¹⁴ Dawng ah gai ci gui phi kä phyawng khai gui, chang thamah gui phi ami ktha maih khai, gakap gui naw phi ami mät ah hnun gui kä hun hlawt khai gui.

¹⁵ Likaap gui cu ami ng’lei ung kä ng’düi hlawt khai gui, dawngah gai ci gui cu kä dawng hlawt khai gui. Ng’se cuum ciah chang gui naw ami hnun gui kä phyawn hlawt khai gui.

¹⁶ Cun ah hnüüp ung a nget pikbäih ah gakap gui naw ami likhim chah ne dawng khai gui.” Bawipa naw thu a pyen nei.