AMOS 1 - Cho Bible Common Language 2016

¹ Shin cu Amos ah thu ah kyak ci, ani cu Tekoa gawnu ah ka htoshäm ah kyak ci. Shihpi kä a thüng pha kum goi yah ung Uzziah cu Judah ghangpughang ah kya ne, Jehoash ah hta Jeroboam cu Israel ghangpughang ah a kyak yah ung, Israel gui ah mawng shin gui avan cu, Khanpughi naw Amos ung a thumkhän ah kyak ci.

² Amos naw, Zion m’htung khan ah Bawipa ng’hawh ci; Jerusalem ungka ak aw cu hmumkyeek ci. Khulim gui chawng ci, Karmela m’htung khan ah khu m’kim gui ng’yaai yawp ci nei” cik ci.

Israel pei Ng’leng gui ah khan ah Am’khoicha nak Siria

³ Bawipa naw, “Damaskas chang gui cu leng ba ba ne shekak ci gui, acun ah phäh ah kei naw akcang ah ka m’kyuk gui khai. Ngami naw Kilead chang gui cu akshekha ah kyak na gui ci gui.

⁴ Cun ah kyasei kei naw ghangpughang Hazela ah cawh ah mang im ah khan ah mei ka yuk chah khai. Ghangpughang Benhadad ah mang paang cu ka m’khih khai.

⁵ Damaskas ah mang gaw m’kawt cu ka dep khai. Aven khaw nawi ung om ci gui la Betheden uktu gui cu ka m’hnawn gui khai. Siria chang gui cu Kira khaw ung thawng kyum ah kyak khai gui ah ka hteh püi gui khai.

Philistia

⁶ Bawipa naw, “Kaya chang gui cu leng ba ba ne shekak ci gui, a cun ah phäh ah kei naw akcang ah ka m’kyuk gui khai. Ngami naw pakhui apum ah yäk u ne, Edom chang gui ah khleihtein ah yoi ci gui.

⁷ Cun ah kyasei kei naw Kaza mang gaw paang ah khan ah mei yuk chah ne a mang paang cu ka m’khih khai.

⁸ Kei naw Ashdod la Ashkelon mang gaw uktu gui cu ka m’hnawn gui khai. Kei naw Akron mang gaw cu ka m’kyuk khai, ami k’pawih nak gui ah Philistin gui ami van sik khai gui.”

Tire

⁹ Bawipa naw, “Tire chang gui cu leng ba ba ne shekak ci gui, acun ah phäh ah kei naw akcang ah ka m’kyuk gui khai. Ngami naw pakhui apum ah yäk u ne, Edom khaw ah omktu ah hteh püi gui ci gui. Ami ng’khawt püi gui ung phi teihpüi ah kä ngai gui ci gui.

¹⁰ Cun ah kyasei kei naw Tire mang gaw paang ah khan ah mei yuk chah ne, amang paang cu ka m’khih khai.”

Edom

¹¹ Bawipa naw, “Edom chang gui cu leng ba ba ne shekak ci gui, acun ah phäh ah kei naw akcang ah ka m’kyuk gui khai. Ngami naw ami phäi nau Israel gui cu yäi gui ci gui. Israel gui cu Esau ah nau Jakob ah hta ng’shon ah kyak ci gui, ngami cu Edomit gui ah pupa gui ah kyak ci. Israel gui naw m’gein nak kä m’dang ci gui. Ami m’lungshe nak cu kä ng’chüt ci, kä sih sak ci gui.

¹² Cun ah kyasei kei naw Teman mang gaw khan ah mei yuk chah ne Bozrah mang paang cu ka m’khih khai.”

Ammon

¹³ Bawipa naw, “Ammon chang gui cu leng ba ba ne shekak ci gui, acun ah phäh ah kei naw akcang ah ka m’kyuk gui khai. Ami khaw ang shawng vai ah ng’tuk ami bi nak ung Kilead khaw ah käu mah ciah hnumi gui phi ami poi k’päh gui ci gui.

¹⁴ Cun ah kyasei kei naw Rabbah mang gaw paang ah khan ah mei ka yuk chah khai, amang paang cu ka m’khih khai. Ng’tuk nak ah khaw hnüüp ung m’lau pyaan nak om khai, ami ng’tawh cu pui khokhi ah mäih ah ng’hmum khai.

¹⁵ Ami ghangpughang la ami bawi gui cu omktu khaw ah hteit khai gui.”