3 JOHAN 1 - Cho Bible Common Language 2016

¹ Ang vaihta kei naw akcang ah kam hni ah Kaius-am ca ka guk lawk ci nei.

² Kam hni ah ka püi, a päng avan ung na bämang vai la na gaigawng vai ah ka ning taigü pek ci nei. Nang cu Mumcha ung na k’thamah ciah ka ning hmat ci nei.

³ Am shah khritha gui ami law päng ung, nang cu thu thuuk ung na bekhüt ah mawng pyein law u sei, ang htei ah ka yei ci, nang cu thudüng ung akcang ah na ghing ciah kyak ci nei.

⁴ Ka hta gui thudüng ung nami ghin ah mawng cu ng’ya ne ka yei ah kawn ah, kei na yei sak ci a i kä om ba ci nei.

Kaius Am Hlüngtai Nak

⁵ Kam hni ah ka püi, nang naw kä ng’hmuhmat pang man ah Khritha gui ah khan ah bekhüt ne bi na bi cu bä ci nei.

⁶ Ngahmi naw nang ah m’hni nak ah mawng cu khrithabum ung pyein lawk ci gui nei. Ngami naw Khanpughi naw a yei nak ah, a khuut cu ma lam ah ami bi lä thei vai ah, nam theithang gui vai nei.

⁷ Ngahmi cu kä yum ci gui ah m’theithang nak kä dou u ne, Bawi Khrit ah khuut bi vai ah ng’düi lawk ci gui ah kyak ci nei.

⁸ Mikmi khritha gui naw cun ah mäih chang gui cu mi m’htei gui vai ah kyak ci nei. Cun ung vah ngami ah thudüng ah mawng bilawh nak cu mi hunshawih gui ciah kyak khai.

Diotrephes La Demetrius

⁹ Kei naw khrithabum-am ca gu ne ka pek ci, cun ung phi ami ng’vaihta Diotrephes naw kei ah thu cu kä ngai ci nei.

¹⁰ Kei ka law ung ani ah bilawh gui phung cu ka ning m’thein gui khai nei. Ani naw mikmi cu kä na yei nah gui ne, nam hleei gui ne thu pyein ci nei. Cun bäng ah kä kyak ciah, Khritha phäi nau gui ami law ung kä dou gui ci, dou gui hlük ciah chang gui phi maa nah gui ne, khrithabum ungka k’täm gui vai ah phi k’tha nak ci nei.

¹¹ Ka püi gui aw, akshe cu kä nami thei tu vai, akni cu nami thei tu vai nei. Akni bilo ciah chang ung Khanpughi om ci, akshe bilo ciah chang naw Khanpughi kä hmuk ci.

¹² Chang nüng naw Demetrius ah ni nak cu pyein ci nei, thudüng mät naw phi ani ah ni nak cu dang sak ci nei. Keimi naw ani ah ni nak cu kami be sak hlük ci, Keimi ah thu ang düng ah mawng cu, nangmi naw nami hmat ci nei.

Khüm Nak ah Yavaih Nak

¹³ Kei naw ka ning m’thein gui vai akda om pang sei phi, ca awn kä ka gu ba hlük ci nei.

¹⁴ Kei cu kä shou pha sei gawk law ngäh sei, nangmi awn ng’hmuh ne mi ng’thu khai ah ka ngai ci nei.

¹⁵ Nangmi ung dimdeeih nak om sä, na teih püi gui ami van naw ning yavaih nak ci gui nei. Na teihpüi gui ami van m’thein tu ba gui ä.