2 TIMOTHI 4 - Cho Bible Common Language 2016

¹ Khanpughi ah ma la aksi ak ghing avan ng’thumcha khai ah Bawi Khrit Jesuh ah ma ah kei naw khen ne ka ning m’thein cu, Bawipa cu Ghangpughang ah kya ci, kya ne uk khai ah kyum lawk ci nei.

² Cun ah kyasei akhin a om ung phi, kä a om ung phi Thu Ni cu na pyein vai nei. Na thu ngai yak ci gui cu ami katnak dang sak gui ä, m’cäi gui ä, thagui pe gui ä, hnimgein nak awn m’theithang gui ä.

³ Chang gui naw düng ciah yum nak cu kä ngai ya hlü ne, amät ah ng’yak hlü düt läk ne, ami mät ah ng’yak hlü bä bä ah thu m’gawng khai ah, m’theithang ci gui cu k’tä ne ami shui nak ah akhin gawk lawk khai nei.

⁴ Ngahmi cu Thucim kä ngai u ne, pumah awi düt ngai lawk khai gui nei.

⁵ Cun ung phi nang läi cu, a i chü ah a mawng ama na buiaut ung phi, na mät ngaihmah ne na om vai, geinvai nak na näng vai, Thu Ni cu ng’shäu ne na pyein vai, Khanpughi ah changshäm ah kya ne bi vai phung cu m’khüt näng ne na bi vai.

⁶ Kei läi cu ng’ghuthaa nak ah ka kyak nak vai ah akhin gawk law pyi ci nei, shin ah ghin nak kang kawn taak vai ah a khin phi ng’et lawk ci nei.

⁷ Kei cu ng’küükneet ne dawng nak ung ak ni pi bäih ah ka bi pyi ci nei, m’hnüt nak ung khüt sei ka dawng pyi ci nei, yum nak phi ka shum pyi ci nei.

⁸ Tuhbäi ung Khanpughi ung düng ciah chang gui am ap vai ah näng nak lukhu naw kei cu na ngäng ci nei. Cun cu düng nak awn m’khoichak ciah Bawipa naw, m’khoichaa nak Hnüüp ung kei am na ap khai nei. Kei bäng ah kä kyak ciah, Bawipa a kyum law ba m’hni ne ngäng ciah chang gui phung am, cun na lukhu cu ap gui khai nei.

Amät Changsing Am Cäi Nak

⁹ Kei ah na law ge vai ah nak tha nak vai nei.

¹⁰ Demas cu m’dek khan am hni nak awn, kei na nawng ne, Thessalonika ah hteit ci nei. Creseens cu Kalatia ah, Titus cu Dalmatia ah hteit ci gui nei.

¹¹ Luka bäng kei awn kani om ci nei. Makuh cu khü ne khah law püi baä, Ani cu kei ah bi nak ung na hun shawih hning khai nei.

¹² Tichikus cu Ephasus ah ka tüih nei.

¹³ Nang na law ung Troas gawnu ah Karpus am ka ap shüt ah suinu la cauk gui, ak tung pi ah mehvun ung guk ah ca k’chaw gui cu na law püi vai nei.

¹⁴ Kyeei sheh ciah Alexander naw kei cu ak kaa ah na kyak na tuk ci nei, amät ah bi ah khan ah Khanpughi naw a gah vai cu pek khai nei.

¹⁵ Nang naw phi ani cu na ngaih nak vai nei, ani cu mikmi ah thu pyein, hlinghling ah hnu ng’tuk püi ne, thu pyein ciah chang ah kiak ci nei.

¹⁶ Kei cet ne ami na ng’shi sang ung, kei na hunshawih khai ah a u phi kä ng’düi lawk ci, van naw kei cu na nawng ci gui nei. Khanpughi naw ngami ah bi nak cu kä ngaihdam men pe gui sä!

¹⁷ Cun ung phi Bawipa cu kei ung om ne k’thagui na pe sei, chang pakhui hei gui am Thu Ni cu ng’shäu ne kam thein gui hning ci, sih vai ah ami na k’bäi nak ungka phi ka phyawng ci nei.

¹⁸ Bawipa naw kei cu shetkat nak phung ung nak phiawn ne, amät ah Khan mawpi uknak ah ngaih gep vai ah na hteh püi khai nei. Ani ung bämang nak cu ngawiyä khäng ne om sä! Amen.

Ak Hnu Yavaih Nak

¹⁹ Priscilla la Akuila ni, Onesiphorus ah kyongkhui ni gui cu ka yavaih na gui ci nei.

²⁰ Erastus cu Korin ah om shüt ci, Trophimus cu Miletus ah gaw sei ka nawng shüt nei.

²¹ Kho kä ak sik pha ung na law vai ah nak tha nak vai nei. Eubulus, Pudens, Linus, la Klaudia ni gui la Krihta phäi nau avan cu ka yavaih na gui ci nei.

²² Bawipa cu na mümcha awn a täng ah om sä, Khanpughi ah chimgein nak cu nami van ah khan ah om sä.