2 TIMOTHI 3 - Cho Bible Common Language 2016

Ak Hnubäih ah Hnüüp Gui

¹ Ak hnubäih ah hnüüp gui cu ang cet khengkheng ah kya lawk khai ci cu nami hmat vai nei.

² Chang gui cu ami mät hnga kä ngai u ne, ngui bäng ya hlü u ne, khäghah längtang ne, ng’hawhshaak m’ghämce ne kyak khai gui nei. Ngami cu ngetngawng u ne, nupa ah beit kä ngai ne, m’gein nak kä om ci, yum nak kä om ciah kyak khai gui nei.

³ Ngahmi cu m’gein nak kä om ci, chihna nak kä om ci, chang ah ming m’shet ci, m’gäi m’cik ci, hlawhlang ciah kyak khai gui nei; ak ni phung cu thüi nak khai gui nei.

⁴ Ngahmi cu ng’lihlak u ne, häipai u ne, ta-äh ne chang ah ng’shei khai gui nei: Khanpughi ah mä hlimtui nak düt cu m’hni pi khai gui nei.

⁵ Ngahmi cu ami khan shai awn ami yum tu ung phi, ak-cang ah hlüngtai nak ah mawng cu hnu ng’tuk püi khai gui nei. Cun ah mäih ah chang gui cu na hlawi gui vai nei.

⁶ Cun ah chang gui ungka amshah gui cu, chang gui ah im ung lut u ne, ami thuvi nak awn, ami shetkat nak ung geinvai u ne, ng’yak hlü nak nüng ah tüihtok nak ung om ciah hnumi gui cu, ami kut ung gawk khai ah cik ci gui nei.

⁷ Cun ah hnumi gui cu angtäi sei k’tha nah ne ng’thei tu u ne phi, thu thuuk cu kä hmat hlawt ci gui ah kyak ci.

⁸ Jannes la Jambres naw Moses cu ani hnu ng’tuk püi ah mäih ah, cun ah chang gui naw thu thuuk cu hnu ng’tuk püi ci gui nei. Ngahmi cu lulang cüivai nak kä om sei ami yum nak she pyi ciah chang gui ah kyak ci.

⁹ Ngahmi ah näng nak cu kä i güt khai, a i ah kyasei ci ung Jannes la Jambres ah mäih ah ngami ah shetkha m’thüikhang nak cu chang naw hmu lawk khai gui ah kyak ci nei.

Ak Hnu ah M’shümthein Nak Gui

¹⁰ Cun ung phi nang cu kei ah m’theithang om ih, la ka ghin nak ung kang bü nak gui cu hmat ne na läk ciah kyak ci nei. Ka yum nak, ka hnimgei nak, kam hni nak, ka khüighaat nak,

¹¹ ka dukdeiu nak, la ka geinvai nak gui cun phi nak shing pyi ci nei. Antioch, Iconium, Listra gawnu gui ung, kei naw a i hlawk ah dukdeiu nak ka buiaut gui cu na hmat ci nei. Cun ung phi Bawipa naw cun gui ungka nak phiawn pyi ci nei.

¹² Bawi Khrit Jesuh ung kawng ät ne yum nak ung lünlawi hlük ciah ah chang phung cu dukdeiu nak gah khai nei.

¹³ Chang shekha chang thuvi gui cu, shekha m’thüikhang law pi k’täi khai gui, chang naw phi phiui hnawk gui khai, chang phi phiui hnawk khai gui.

¹⁴ Cun ung phi nang läi cu theithang ne na dou ah thu thuuk cu ak kheng ah na yum vai. A u chang gui ah nang theithang tu te cun phi na hmat vai.

¹⁵ Na hmaw sang ung tün ne, cüivai nak ning pe ne, Bawi Khrit Jesuh yum nak awn hun nak gah vai ah lam shüm ciah, Cacim Theing na hmat ah mawng cu na shüm ba vai nei.

¹⁶ Cacim Theing avan cu Khanpughi naw Mumcha hlüngtai nak awn ak be ah kyasei, thu thuuk m’theithang nak, m’cäi m’ä nak, cheishoh m’dang nak, sheitkat pyan nak, la düng sei ghin nak vai ah m’shümthein nak gui ah mawng ah kyak ci.

¹⁷ Cun ah kyasei Khanpughi ah khuut bik ci cu, nikiom nak a hlühlü abi lawh nak vai ah ng’sheitawn vai cu hlü ci, hmuhhmat Lulang nak awn kümbe vai ah phi kyak ci nei.