2 TIMOTHI 2 - Cho Bible Common Language 2016

Bawi Khrit Jesuh ah Bekhüt Ciah Gakaap

¹ Ka hta, Bawi Khrit Jesuh ung kawng ät nak awn mi gah ah m’geinsei nak awn k’thamah ne om ä.

² Saksi gui akda ah ma ah kei naw ka ng’shäu ah m’theithang nak gui cu, nang naw na ng’ya pyi ci nei, cun cu la netah, chang hei gui m’theithang tu ba hning khai ah ngaih gep ah chang gui am, nam thei tu ba gui vai nei.

³ Bawi Khrit Jesuh ah bekhüt ciah gakaap ah kya ne geinvai nak cu na dou vai nei.

⁴ A bilawh mawng ung hnüntho ciah gakaap tumat cu, a bawi naw ayum vai ah bilo ciah kyak ci, a hei a mawng ama ung käng cawngcam, kä hnün tho ci.

⁵ Thu m’hnüt kä läk ah günglah ciah chang phung naw, a i yah ung phi günglah nak ung näng nak ng’chuh kä gah khai.

⁶ Khüghaat ne kholo ciah chang naw väi lawk ciah geit cu, khäm ba ma khai ah kyak ci.

⁷ Kang thu pyein cu nangaih tüh kheng vai nei, cun ung Bawipa naw hmuhmat nak thei ning pak khai nei.

⁸ David ah ng’shon, sih nak näng ne tho ba ciah Bawi khrit Jesuh cu na shüm kheng vai nei, cun cu kam theithang nak ah Thu Ni ung ka pyein ah kyak ci nei.

⁹ Kei cu Thu Ni ka pyein ah phäh ah ka geinvai ci, m’si gui awn phi ami na khih nak ah kyak ci. Cun ung phi Khanpughi ah Thu läi cu khih pawn nak kä om ci.

¹⁰ Cun ah kyasei kei cu, Khanpughi ah a ghü ah chang gui ah hmawk ah a i phi ka buiaut ci nei. Cun cu ngami naw phi Bawi Khrit Jesuh ung hun nak ami gah tu vai la angtäi ah bäkhäk nak a gawk law vai ah hmawk ah kyak ci.

¹¹ Shin cu thu düng ah kyak ci: “Ani awn a täng ah mi sih ah a kyak ung, Ani awn a täng ah mi ghing ba khai.

¹² Mikmi ung khüighaat nak a om ah a kyak ung, Mikmi phi ani ung uknak mi gah tuk khai.

¹³ Mikmi kä mi bekhüt ung phi, Bawipa cu bekhüt ci, a i ah kyasei ci ung Ani cu amät naw amät cu käm shet phung ci.

M’lung-am Law ciah Bik’bi

¹⁴ Shin ah a mawng ung nak chang gui nam cäi gui vai nei, thu awn ng’vawngshang küütneet ne kä ami kyak vai ah, Khanpughi ah ma ah akheng ah khän ne nam cäi gui vai nei. Cun ah mäih naw ni nak kä pyang ci, yak ciah chang gui ah ngaihdam ah kya ne shetkat nak ah kyak ci.

¹⁵ Bi bi ah hmawk ah kä lü ng’aa ciah khuutbi la Khanpughi ah thu thuuk düng khaiah m’thei ciah nang cu, Khanpughi ah ng’yak hlü vai ah k’tha na pi bäih ne na bi vai nei.

¹⁶ Zum nak kä om ciah hmühma ne thu shai cu na hlawi vai, Cun ah mäih thushai naw chang cu Khanpughi awn ng’shawng sak pi ci nei.

¹⁷ Cun ah mäih m’theithang nak cu pumsa keing khai ah ei ciah kheipung awn täng ci. Himenaeus la Philetus cun phi acun ah mäih ah m’theithang ci goi nei.

¹⁸ Ngahmi cu cacim ah düng nak ungka lam hma u ne, ‘Sih nak ung ka mi thawh nak ba cu gawk law pyi ci nei,’ ci u ne yum ciah chang gui ah yum nak cu ng’lat sak ci gui.

¹⁹ Cun ung phi Khanpughi naw ak khäng ah ling ne ak süm cu kä thüng hlawt ci nei. Cun ah khan ah, “Khanpughi naw a mät ah chang gui cu hmat gui ci nei”, ci la “Bawipa ung khäng pyi ciah pyein ciah chang phung naw cheishoh nak cu a phiawn nak vai nei,” ciah ca cu guk ah kyak ci nei.

²⁰ Mang im ng’ki ah kyong ah ghui la ngui awn pyan ni, Sing la m’dek la m’dek awn pyan ni ah khlüng la k’am gui om ci. Amshah cu aküi kyang ah kyak ci, amshah cu ang neng düt ah kyak ci.

²¹ Cun ah ak shekha gui phung ungka theingcim ciah chang cu a bawi ah hmawk ah bä ne, ak ni phung bi ge khai ah om ciah kya ne, ak küikyang ah kyak ci, a küi kyang nak ung mang hlü vai ah kiak ci.

²² Ak hmaw chang gui ah hüithaw nak cu hlawi ne, Bawipa ah m’lungtheing awn taigü ci gui awn a täng ah düngdau nak, yum nak, m’hni nak la dimdeih nak gui cu na shui vai nei.

²³ Hmühma nak la ak ang ah ng’cuhcan nak gui cu na hlawi vai, Cun gui naw ng’tukvook nak a pyan cu na hmat ci nei.

²⁴ Bawipa ah bik’bi cu ng’tukvook lup ciah kä a kyak en vai, chang ng’nü m’gein ne, hniimgei thei ciah saya k’ni ah a kyak vai.

²⁵ Ani hnu ng’tuk püi ciah chang gui cu ang awi gi ah m’cäi thei ciah kiak khai. Cun ah chang gui cu ng’ya ba u ne, thu thuuk ami hmat tu vai ah Khanpughi naw akhin k’ni pe gui khai nei.

²⁶ Cun ung ngami cu düng nak hmu law u ne, ang yak hlü phung läk khai gui ah pha ne shum gui ciah khoshe ah kut ungka phiawng khai gui nei.