2 SAMUEL 9 - Cho Bible Common Language 2016

David la Mephibosheth

¹ Hnüüp ät ung David naw, “Saul ah kyongchang tumat mat om ba ne ang? A om ba ah akiak ung Jonathan ah phäh ah kei naw m’gein nak ka m’dang hlük ci nei” cik ci.

² Saul ni kyong ah ami changshäm, Ziba ming nak ci om ci, ani cu David ah a hteh vai ah pyen nak ci gui. Nang Ziba ang?” cine ghangpughang naw ng’shik ci. Ani naw, “Ä, bawi mang aw!” cik ci.

³ Ghangpughang naw ng’shi ne, “Saul ah kyongchang pawih ba ci tumat mat om ne ang, ka bi vai ah Khanpughi ah ka shaitak ah mäih ah ka bekhüt nak la ka m’hni nak cu ani am ka m’dang hlük ci nei” cik ci. Ziba naw, “Jonathan ah hta gui ungka tumat om ba ci, ani cu shum ci” cine m’thein ci.

⁴ Ghangpughang naw, “A hawi ang ani?” cik ci. Ziba naw, “Lodebar ah Ammiela ah hta Machira ah im ung om ci nei” cine m’thein ci.

⁵ Ghangpughang David naw chang tüi ci.

⁶ Saul ah tu, Jonathan ah hta Mephibosheth cu gawk law neta, David ah ma ah m’khukdong ne chang m’sui ci. David naw, “Mephibosheth cine khü sei, ani naw, “Ä, bawi mang aw” cik ci.

⁷ David naw, “Kä na kyih vai, na pa Jonathan ah phäh ah kei naw nang cu ka ning m’gein khai nei. Na pughi Saul ah päng ah khaw avan ka ning pe ba khai, nang cu ka tawnglang ung angtäi sei ka ning dou khai nei” cik ci.

⁸ Mephibosheth naw m’khukdong ba neta, “Bawi aw, kei cu ui k’si hlawk ah phi kä ka kyak ci ne! A i ah kyasei kei ah khan ah nang na ni aih ang?” cik ci.

⁹ Cun kawn ah ghangpughang naw Saul ah changshäm Ziba cu khü neta, “Kei naw na bawi ah tu Mephibosheth am Saul la akyongchang ah ka te phung avan ka pek ci nei.

¹⁰ Nang, na hta gui la na chang gui naw khawlo cu bi u ne, na bawi Saul ah kyongchang gui ah phäh ah khäm tawng ne, ei nami tu m’bei gui vai nei. Cun ung phi Mephibosheth läi cu angtäi sei kei ah tawnglang ung khin ah kyak khai nei” cik ci. (Ziba ung a htapa gha lei hma la a changshäm m’ku om ci.)

¹¹ Ziba naw, “Nang bawi mang ah ng’thu k’bäi cu avan ka bik khai nei” cik ci. Cun ah kyasei Mephibosheth cu ghangpughang ah tawnglang ung ghangpughang ah hta ah mäih ah ei awk ci.

¹² Mephibosheth ung a hta ak hmaw Mika om ci. Ziba ah kyongchang avan cu Mephibosheth ah changshäm ah kya lawk ci gui.

¹³ Cun ah kyasei Mephibosheth, a khaw vang goi vei shum ciah chang cu, Jerusalem ah om ne, ghangpughang ah tawnglang ung angtäi sei ei awk ci.