2 SAMUEL 8 - Cho Bible Common Language 2016

David ah Ng’Tuk Näng nak

¹ Api shou hta khäta Ghangpughang David naw Philistin gui cu tuba gui mä ci, ani naw hnim gui ne, khaw ami uknak cu ng’pyi sak ci.

² Cun kawn ah Moab chang gui hnim gui ci. Ani naw thawng kyum gui cu m’dek ung ng’yän sak gui neta thum ungka hnih ci laih laih ngawn gui ci. Cun ah kyasei Moab chang gui cu ak chang ah kya u ne, phlam phi ani am pek ci gui.

³ Syrian khawpäng Zobah ghangpughang, Rehob ah hta Hadadezer cu Euphratis khaw a siip lam tu ne uk khai ah law khäta, David naw tu ne hnim ci.

⁴ David naw ng’se cum gakap phia gha leichih la gakap phia phia goi cu tu ne khäm ci. Ani naw yatha phia ung ng’büh khai ah ng’se gui cu la neta, k’pawih ba ci avan cu ami khaw tuhnget ne m’di gui ci.

⁵ Damaskas ungka Syrian chang gui naw Ghangpughang Hadadezer kuram khai ah gakap gui tüi law u sei, David naw tu gui ne chang phia phia goi la m’ku cu ngawn gui ci.

⁶ Cun kawn ah ani naw ami khaw ung gakap hmun k’süm ci, ngami cu ani ah chang ah kya law u ne, phlam phi ani am pek ci gui. Bawipa naw David am a khawpäng ung näng nak pek ci.

⁷ David naw Hadadezer ah bawi gui ah kawh ah ghui shawi gui cu khäm neta, Jerusalem ah hteh püi ci.

⁸ Hadadezer ah uk ah Betah la Berothai mang gaw ungka küikyang ciah kyei akni gui phi David naw khäm ne law püi ci.

⁹ Hadadezer ah gakap gui avan David naw a hnim cu Hamath ghangpughang Toi naw ng’yak ci.

¹⁰ Cun ah kyasei ani naw a hta Joram cu Ghangpughang David yavaih khai ah tüi law ne, Hadadezer ah khan ah ang näng ah phäh ah yeikyai nak pyen lawk ci. Hadadezer cu Toi awn akda vei ng’tu man ci goi ah kyak ci. Joram naw David am ghui ni, ngui ni, kyei ni awn pyan ah m’cümhnah gui pe lawk ci.

¹¹ Ghangpughang David naw cun ung cu khawihnah nak ung mang vai ah ap ci. A hei pakhui gui näng ne a gah ah ghui ngui gui phi khawihnah nak ung ap ci, cun ah pakhui gui cu —

¹² Edom, Moab, Ammon, Philistia la Amalek ah kyak ci — a cun ah mäih ah Hadadezer ah ka a guh ah amshah phi ap ci.

¹³ Salt khaw nawi ung Edom chang phia phia la cheit-kip ngawn ne law ba khäta David cu aming thang law pi k’täi ci.

¹⁴ Ani naw gakap phung gui Edom khaw avan ung m’düih sei, cun ung chang gui cu ani ah chang ah kya lawk ci gui. Bawipa naw David cu khaw nü ung näng nak pek ci.

¹⁵ David naw Israel khaw avan uk ci, ak chang gui cu ng’cim htaih ne taga khai ah ng’htei ne bik ci.

¹⁶ Zeruiah nu nak ciah Joab cu gakap ah gabawi ah kyak ci; Ahilud ah hta Johoshaphat cu yung bawi ah kyak ci;

¹⁷ Ahitub ah hta Zadok la Abiatha ah hta Ahimelek cu taigü ah kyak ci goi; Seraiah ca-gu ng’vai pi ah kyak ci;

¹⁸ Jehoiada ah hta Benaiah cu David ngäng ciah bawi ng’vai pi ah kyak ci, David ah hta gui cu taigü ah kyak ci gui.