2 SAMUEL 7 - Cho Bible Common Language 2016

David am Nathan ah Thu m’khäh

¹ Ghangpughang David cu amang im ung om sei, Bawipa naw aga avan ung gung ci.

² Cun kawn ah ghangpughang naw prophet Nathan am, “Shin ung cedar k’pen awn cawh ah im ung kei ka om ci, cun ung phi Khanpughi Thukhän M’küm cu phung ung gim ah kyak ci!” cik ci.

³ Nathan naw, “Na m’lung kyong ah om ci phung na bi vai, a i ah kyasei ci ung Bawipa cu nang awn a täng ah om ci,” cik ci.

⁴ Cun ung phi cu mü Bawipa naw Nathan a pyen nak cu,

⁵ Kei naw ka pyen nak cu ka changshäm David am hteit ne m’thein ä, “Nang cu kei ah om nak vai, kei ah phäh ah pum im co khai ah chang ah kä na kyak ci.

⁶ Israel chang gui Egypt khaw ungka, ka k’phiawn gui ungka naw tuhbäi ung khüt khai ah, kei cu pum im ung kä ka om phung ci; phung laih laih ung ng’hleh ne ka om ci.

⁷ Israel chang gui awn ka ng’hleh nak avan ung, a i ah kyasei cedar sing awn pum im kä ami na cawh pek cu a u ng’vai phi kei naw kä ka ng’shi phung man ci.

⁸ Kei A hlüngtai Bawipa naw ka pyen nak cu, ka changshäm David am m’thein ä, “Lo ah hto na shäm nak ungka kei naw ka ning lak ci, ka chang Israel gui uktu ah ka ning pyang ci.

⁹ Kei naw na hteh nak phung ah ka ning om püi ci, na ma ah na ga gui avan kei naw ka hnim ci, kei naw nang cu khomdek khan ung däm pi ciah ng’vai gui ah mäih ah ng’mingthang khai ah ka ning pyang khai.

^10-11 Kei naw ka chang Israel gui ah phäh ah khaw hmun ghü ne, a cu ah ka om sak gui ci, a cu ah ngami cu shedam nak kä om ba sei om khai gui. Ngami shin ah khaw ung ami luh law ung tün ne, ngami cu chang omshe gui naw tu gui ci gui, cun ung phi cun ah mäih kä om ba khai. Na ga avan ung ning gung ne, na hta ng’shon vai ka ning pek khai cine, kei naw shai ka tak ci.

¹² Nang na sih ung na pupa gui awn a täng ah ning m’cim ne, na hta gui ungka tumat cu ghangpughang ah ka pyang khai, ani ah uknak khaw cu khüi ghat khai.

¹³ Ani cu kei ah phäh ah pum im co ciah chang tumat ah kyak khai, ani ah uknak khaw cu ng’täi ne om khai ah kei naw akcang ah ka pyang khai.

¹⁴ Kei cu ani ah pa ah ka kyak khai, ani cu kei ah hta ah kyak khai. Ani hma nak abi ung apa naw a hta am kyuk ah mäih ah kei naw ka m’kyuk khai.

¹⁵ Cun ung phi kei naw ani ka m’düih nak cu, Saul m’hnawn ne ka bi ah mäih ah kä ka la ba khai, cun ah kyasei nang cu ghangpughang ah na kyak ci.

¹⁶ Nang ung angtäi sei na hta ng’shon om khai, nang ah uknak khaw cu kä ng’pyi hlawt khai ah kei naw ka pyang khai. Nang ah uknak ng’shon cu kä ng’pyi hlawt khai!” cik ci.

¹⁷ Khanpughi naw ani ung am thein phung cu Nathan naw David am m’thein ci.

M’hlüngtai ne David ah Taigü

¹⁸ Cun kawn ah ghangpughang David cu Bawipa ah om nak phung kyong ah lut ne, ngo ne taigü ci, “Kei ah phäh ah na bi pyi gui cu kei awn kä khin kha ci nei, uktu Bawipa, ka kyongchang awn phi kä khin kha ci nei.

¹⁹ Cun ung phi uktu Bawipa, tuhbäi phi nang naw na bi lä ci nei; lawk ciah kho kum gui ung kei ah hta ng’shon vai gui cu nang naw shaitak na bi pyi ci nei. Cun cu nang naw chang am na hmuh sak ci nei, uktu Bawipa!

²⁰ Kei naw a i ang ka ning pyen nak ba mä kaw! Nang naw na na hmat ci, na na changshäm.

²¹ Cun cu bi vai ah nang ah na ng’yakhlü la na ng’bii nak ah kyak ci. Nang naw shin ah dämduh ci avan na bi cu kei na na m’thein nak vai ah kyak ci.

²² A i hlawk ah na dämduh ci ang, uktu Bawipa! Nang ah mäih a u kä om ci; keimi naw angtäi sei kami hmat ci, nang bäng Khanpughi ah na kyak ci.

²³ Khomdek khan ung Israel ah mäih a hei pakhui kä om ci, na mät ah chang ah na pyan gui vai ah khleihtein ungka, na gun gui ah kyak ci. Küikyang ci la cäicat vai gui, ngami ah phäh ah na bi gui cu khomdek khan avan ung püi ne gawk ci nei. Na mät ah chang gui vai ah Egypt ungka na m’hlawt ah chang gui ah ma ah, a hei pakhui gui la ami khanpughi gui cu nang naw na k’täm gui pyi ci nei.

²⁴ Nang naw Israel gui cu ngawi yä na chang ah na pyang gui ci nei, Nang, Bawipa cu ami Khanpughi ah na kyak ci nei.

²⁵ Tuh bäi, Bawipa Khanpughi naw, kei la ka hta ng’shon ah mawng na shaitak cu ak phlüt ah na be sak ci, na pyen ah mäih ah na bik ci nei.

²⁶ Nang ming cu dämduh khai, chang gui naw ngawi yä pyen khai gui, ‘Hlüngtai ciah Bawipa cu Israel avan ah Khanpughi nei! Nang naw kei ah hta ng’shon cu ak phlüt ah na ngäng khai.

²⁷ Hlüngtai ciah Bawipa, Israel gui ah Khanpughi! Kei naw nang ah shin ah taigü ka taigü vai ah tha gui om ci nei, a i ah kyasei ci ung nang naw shin gui avan cu kei, na changshäm ung na m’dang ci, ka hta ng’shon gui ghangpughang ah na pyang gui khai ah phi na na m’thein ci nei.

²⁸ “Tuh bäi uktu Bawipa, nang cu Khanpughi nei; nang naw angtäi sei na shaitak cu na k’pang ci, nang naw shin ah cäicat vai ah shaitak cu kei ung na bik ci.

²⁹ Ka hta ng’shon gui hriham na pek vai ah ka ning thäh ci nei, cun ung ngami cu däih ne, nang ah hmai kiang nak ung yei khai gui nei. Nang, uktu Bawipa naw, na shai tak cu shin ah kyak ci, nang ah hriham cu ka hta ng’shon ung ngawi yä be khai nei” cik ci.