2 SAMUEL 6 - Cho Bible Common Language 2016

Thukhän M’küm Jerusalem ah Hteh Püi ci gui

¹ David naw Israel ung ak bä pi gakap gui cu khü ne m’cawi gui ci, ami van phia phiathum lawk ci gui.

² Ngami cu Judah khaw, Baalah ah tüi gui ne, Khanpughi ah Thukhän M’küm cu lak sak gui ne, Cherubim gui ah khan ah ngo ciah Hlüngtai ciah Bawipa ah ming awn nami law püi vai cik ci.

³ Ngami naw m’htung khan ah Abinadab ah im ungka la u ne, ng’hle akthai ung taih ci gui. Abinadab ah hta goi Uzzah la Ahio naw ng’hle cu hteh püi ci goi,

⁴ Ahio cu ma ne hteit ci.

⁵ David la Israel chang van cu aktung ah ng’lam ne ng’äi ne Bawipa cu m’tamkhah ci gui. Ngami cu tingtäng, mawng cha, k’hting, k’phyung heng, ng’sheei gui cu tum ci gui.

⁶ Ngami cu Nakon lo kyan nak ung ami gawk law yah ung seipat gui hnün u khäta, Uzzah naw thukhän m’küm cu la ne k’pang ci.

⁷ A cun vai am Bawipa Khanpughi cu m’lungshe neta, kä ak chang m’sui ah phäh ah m’kyuk sei, Uzzah cu sik ci. Uzzah cu Thukhän M’küm ah pei ah sik ci,

⁸ Cun ah kyasei cun ah hmun cu “Perez Uzzah” ah ami sui lä ah kyak ci. Bawipa naw m’lungshe ne Uzzah am kyuk ah phäh ah David cu am lung sou ci.

⁹ Cun kawn ah David naw Bawipa cu kyih neta, “A i hawkcha ah Thukhän M’küm cu tuhbäi ka hteh püi khai ang?” cik ci.

¹⁰ Cun ah kyasei, amät naw Jerusalem ah kä hteh püi khai ah k’bäi ci; cun nak vai sü ung lam ah ng’hlat ba ne, Gath mang gaw khaw mah Obed Edom ah im ung tha khai k’bäi ci.

¹¹ Cun cu cha thum a cu ah tha tu u sei, Obed Edom la akyong chang gui Bawipa naw hrilham pek ci.

¹² Obed Edom ah kyongchang la ani ung om ci avan, Thukhän M’küm ah phäh ah Bawipa naw hriham apek cu David ghangpughang naw ng’ya neta; Thukhän M’küm Obed ah im ungka va la ne, dämduh ciah pawi bi ne Jerusalem ah hteh püi ci.

¹³ Thukhän M’küm kawt ci gui cu m’khan chuk hteit u khäta, David naw ng’düm sak gui ne, seipat la sei k’plan awn khawihnah nak cu douthak ci.

¹⁴ David cu linen yih sui ne, ak tha gui avan awn Bawipa cu m’tam ne ng’lam ci.

¹⁵ Cun kawn ah ani la Israel chang avan naw thukhän m’küm cu yei ne m’lau ne, phyungheng tum ne Jerusalem ah hteh püi ci gui.

¹⁶ Thukhän M’küm cu mang gaw kyong ah law püi u sei, Michala, Saul ah hta hnumi naw m’kawt ung yuk teng ne, Ghangpughang David cu theing ciah ng’lam ah ng’lam ne yong ne ng’phiui sei hmu neta, ani cu päipih ci.

¹⁷ Ngami naw Thukhän M’küm cu law püi u ne, David naw tha nak vai ah a cawh ah phung, amät ah hmun ung tha ci gui. Cun kawn ah ani naw khawihnah nak la khawtsheng-douthak nak cu Bawipa am pek ci.

¹⁸ Ani naw khawihnah douthak nak a pyi kawn ah ani naw chang gui cu Hlüngtai ciah Bawipa ah ming awn hriham pe gui ci,

¹⁹ ami van am ei phi pe tak gui ci. Ani naw Israel hnumi pami päng am, m’htut pum ät, meh ket ng’zang ät la ak theih gui cu pe gui ci.

²⁰ Cun kawn ah David cu akyong chang gui yavaih khai ah a im ah hteit ba khäta, Michala naw law ne hmu lawk ci. Ani naw, “Israel ghangpughang naw tuh ngawi amät ah ming däm khai ah bik ci nei! Abawi gui ah changshäm-hnumi hta gui ma ah akgu ah mäih ah amät naw amät m’dang ci nei!” cik ci.

²¹ David naw, “Kei cu Bawipa m’tam ne ka ng’lam ci nei, ani naw na pa la akyong chang gui ah hnün ung na ghü ne, Israel chang gui ah matawn ciah na pyang ci nei.

²² Kei cu ng’lam ne Bawipa ka m’tam khah lä khai, kei ka mät cu ka gu law pi khai nei. Nang naw kei cu a kholä ah na na ngai khai, cun ung phi cun ah hnumi hta gui naw ak hlüngtai ah na ngai khai gui!” cik ci.

²³ Michala, Saul ah hta hnumi ung ak hmaw kä om ling ci.