2 SAMUEL 5 - Cho Bible Common Language 2016

David cu Israel la Judah Ghangpughang ah Kia lawk ci

¹ Cun kawn ah Israel pakhui ami van David ah om nak Hebron ah law neta ng’thu ami pyen cu, “Keimi cu namät ah si la sa ah kami kyak ci.

² Ayanä, Saul cu kami ghangpughang ah akiak yah ung phi, ng’tuk nak ung Israel chang gui ah ma na tawn ci, Bawipa ah a shaitak cu, nang naw achang gui cu na chuiso gui khai, ami uktu ah na kyak khai.”

³ Cun ah kyasei Israel gui ah ami ng’vai gui ami van cu David Ghangpughang ah om nak Hebron ah lawk ci gui. Ani naw theing ciah hmuh ng’gei nak cu bi püi gui ci, ngami naw ani cu m’shumphyuk u sei, ani cu Israel ghangpughang ah kya lawk ci.

⁴ David cu ghangpughang ah akiak law yah ung a khaw kum thum kip lawk ci, ani naw khawkum phli kip uk ci.

⁵ Ani naw Hebron ung om ne Judah cu khaw kum chih la avang ung uk ci, Jerusalem ung om ne Israel la Judah cu khaw kum thumkip-lei thum ung uk ci.

⁶ Ghangpughang David la ak chang gui naw Jerusalem ami tuk nak vai ah akhin cu gawk lawk ci. A cu ah om ciah Jebusit chang gui naw, mang gaw cu David naw tu ne kä m’khüt khai ah ngai ci gui, cun ah kyasei ngami naw ani am “Shin ah mang gaw ung nang kä na lawk khai: amik m’dauh la akshum gui naw phi ning ma nak khai gui” cik ci gui.

⁷ (Cun ung phi David naw Zion mangpang cu tu ne näng sei, “David mang gaw” ah kya lawk ci.)

⁸ Cu hnüüp ung David naw ak chang gui am, “Kei ah mäih ah Jebusit chang gui thüi na gui ci om ne ang? Ngami cu ngawn gui vai nei! Cun kawn ah tui m’hlawng ung hteit ne, am dauh la akshum gui cu tuk gui vai nei.” (“Cun ah mawng thu om cicu am dauh la akshum gui cu Bawipa ah im ung kä lut tu hlawt khai gui nei.”)

⁹ Mangpang ami khäm kawn ah David cu a cun ung om neta, “David Mang Gaw” ah aming sui ci. Ani naw mang gaw cu veing ne cokyang ci, khomhtung ah a kiangtäng khaw dou cu k’be ne cokyang ci.

¹⁰ Ani cu ang täih ah ng’ghaw tai lawk ci, a i ah kyasei ci ung hlüngtai ciah Bawipa Khanpughi naw om püi ci.

¹¹ Tire ghangpughang Hiram naw sumlei vai ah chang tüi law ne, cedar k’pen gui la sing im k’co gui lung im k’co gui cu mang im co khai gui ah tüi law gui ci.

¹² Cun ah kyasei David naw, ani cu Israel ghangpughang ah Bawipa naw am düih ah hmat ci, ani naw ak chang gui ah phäh ah a uknak cu bühmang khai ah pyang ci.

¹³ Ani cu Hebron ungka naw Jerusalem ah ang plon kawn ah, David cu akchudüt, chulüngda sei, hnumi pami akda ah hta ba ci.

¹⁴ Shin ah ak hmaw gui cu Jerusalem ung a hta nak gui ah kyak ci: Shammua, Shobab, Nathan, Solomon gui ah kyak ci: Shammua, Shobab, Nathan, Solomon,

¹⁵ Ibhar, Elishua, Nephek, Japhia,

¹⁶ Elishama, Eliada, la Eliphelet ah kyak ci.

Philistin Gui Anäng ah mawng

¹⁷ Israel ghangpughang ah David a kyak law cu Philistin gui am m’thein gui ci gui, cun ah kyasei ami gakap m’cääp ne ani tuk vai ah pawng ci gui. David naw cun cu ng’ya neta, khäng ciah ng’shung nak ung hteit ne om ci.

¹⁸ Philistin gui cu Rephaim khaw nawi ung gawk law u neta, a cun cu khäm ci gui.

¹⁹ David naw Bawipa ng’shi ne, “Philistin gui ka tuk gui vai aw? Näng nak na na pek khai aw?” cik ci. Bawipa naw, “Ä, na tuk gui vai nei, kei naw näng nak ka ning pek khai nei” cik ci.

²⁰ Cun ah kyasei David cu Baala Perazim ah hteit ne Philistin gui cu hnim gui ci. Ani naw, “Bawipa naw ka ga gui cu tui ng’güt ah mäih ah m’di gui ci nei” cik ci. Cun ah kyasei cun ah hmun cu “Baala Perazim” ah ami sui ah kyak ci.

²¹ Philistin gui cu dawng u ne, a gup gui cu nawng shüt u sei, David la ak chang gui naw a hei ah hteh püi ci gui.

²² Cun kawn ah Philistin gui cu Rephaim khaw nawi ah hteit ba u ne, khäm ba mä ci gui.

²³ Hnü ät ung David naw Bawipa ng’shi thäh ba ci, Bawipa naw, “Shin ungka naw kä na tuk en gui vai, cun ung phi hteit ne khaai gawi neta, a hei lam täng, kian shing gui ah pei ungka naw tuk gui ge vai ah nami om vai.

²⁴ Sing ghing pam ah ka naw ami kaan law ah k’aw nami ng’yak ah a kyak ung, cun kawn ah nami tuk gui vai, kei cu nangmi ah ma ung ma ne hteit ne Philistin gakap gui cu ka hnim gui khai” cik ci.

²⁵ David naw Bawipa ah pyen ah mäih ah bik ci, ani naw Philistin gui cu Keba ka naw Keyera ung khüt sei k’täm gui ci.