2 SAMUEL 4 - Cho Bible Common Language 2016

Ishbosheth Ami Ngawn

¹ Saul ah hta Ishbosheth naw Hebron ung Abner ami ngawn cu ng’ya ne, ani cu kyi neta, Israel chang avan cu m’tho let gui ci.

² Ishbosheth ung a bawi hnih om ci, ngani cu ng’mün ciah parti ung ang vai goi ah kyak ci, ngani cu Rimmon ah hta goi Baanah la Rechab, Beeroth kyong, Benjamin pakhui ah kyak ci goi. (Beeroth cu Benjamin ah ng’pai ah kyak ci.

³ A cun ah ng’shon gui Kittaim gawk u ne, tuh güt a cun ung om ci gui.)

⁴ A hei Saul ah angshon tumat cu Jonathan ah hta Mephibosheth ah kyak ci, ani cu Saul la Jonathan ami ngawn goi yah ung kum hma lawk ci. Ngani ah sih ah mawng cu Jezreelaa mang gaw ungka gawk law khäta, ani m’htei ci naw chang ne dawng püi ci; cun ung phi cun ah hnumi cu ang htei ah tawt aih neta, lam ah chah pah sei, a khaw shum ci.

⁵ Rechab la Baanah cu Ishbosheth ah im ah hteit ne, hnüüp lung ung gawk ci goi, cun yah ung ani cu ng’düm ne ip ci.

⁶ M’kawt pei ah hnumi cu htang m’chaap te ci, ngam ne, ip ci. Cun ah kyasei Rechab la Baanah cu adümah lut ci goi.

⁷ Vangtäng ah ngani cu Ishbosheth ah ih khan ah lut ci goi, acu ah ani cu hniim ne ip sei ngawn ci goi. Ngani naw alu m’chün ne, hteh püi ni ne, amü pum hteit ne Jordan khaw nawi kaan ci goi.

⁸ Ngani naw alu cu Hebron ah ghangpughang David am pe ni neta ani pyen nak cu, “Shin cu nang ning ngawn hlük ciah na ga Saul ah hta Ishbosheth ah lu nei. Tuh ngawi Saul la a hta ng’shon ah khan ah nang bawi naw phu na tuk vai ah Bawipa naw ning bi sak ci nei” cik ci goi.

⁹ David naw ngani am, “Kyihkyawk nak avan ung na hun ciah ghing ciah Bawipa ung kei ka ng’gun ci nei!

¹⁰ Chang tumat cu Ziklag ka law ne, Saul ah sih ah mawng na m’thein law ne, ng’thu ni pyen lawk ciah ng’ngai ci. Kei naw ani cu kaih ne ka ngawn sak gui ci. Cun cu ani naw a nam thein law ah phäh ah kei naw m’cümhnah nak ka pek ah kyak ci!

¹¹ Amät ah im kyong ah ip ciah chang k’ni ngawn ciah changshe gui cu a i hlawk ah shetkat nak om ci ang? Ani nani ngawn ah phäh ah nangni ah khan ah tuhbäi kei naw phu ka tuk khai, m’dek khan ungka, ka ning täm goi khai,” cik ci.

¹² David naw a gakap gui am Rechab la Baanah cu ngawn sak gui ci, ngami naw ani kut la ani khaw gui cu m’chün u ne, Hebron tui shawk pei ah tai ci gui. Ngami naw Ishbosheth ah lu cu la u ne, Hebron gawnu Abner ah phuh hmun ung m’ciim ci gui.