2 SAMUEL 3 - Cho Bible Common Language 2016

¹ Saul ah kyongchang gui naw ami ng’düih püi gui la David naw ang düih püi gui ah gakap gui cu akshou ng’tuk ci gui. David cu khüi ghat law pi pi sei, ang tuk püi gui cu ami tha ken law pi pi ci.

David ah Hta gui

² A hta chuk, ami ng’tüi nak ah ang tän cu, Hebron ung ng’tüi ciah David ah hta gui ah kyak ci: Ammon, anu cu Ahinoam, Jezreela ah ka;

³ Chileab, anu cu Abigail, Nabala ah chu hmei, Karmelaa ah ka; Absalom, anu cu Maakah Keshura Ghangpughang Talmai ah hta;

⁴ Adonijah, anu cu Haggith; Shephatiah, anu cu Abital;

⁵ Ithneam, anu cu Eklah. Shin ah a htapa gui ami van cu Hebron ah ami hta nak gui ah kyak ci.

Abner cu David ung Ng’dawn ci

⁶ David ah chang gui la Saul ah kyongchang ung bekhüt ci gui cu ng’tu laih laih u neta, Saul ah hnu läk ci gui ungka, Abner cu huham mah law pi k’täi ci.

⁷ A hnüüp ät ung Saul ah hta Ishbosheth naw, Saul ah chu hmaw, Aiah ah hta Rezpah awn nani ip ci, cine Abner cu ng’gu k’bün ci.

⁸ A cun naw Abner cu m’lung she sak ci. “Kei naw Saul kä ka bekhüt ciah na ngai ne ma? Judah gui ah phäh ah bi ka bik ciah na ngai ne ma?” cine pyen nak ci. Cun kawn ah kei cu ak htük ge ung napa Saul la a phäi nau gui, a teihpüi gui ung ka bekhüt ci, David naw a ning hnim vai süte ka ning hun ci; cun ung phi tuk ngawi, hnumi awn na k’puk ne, katnak na na shui ci!

^9-10 Bawipa naw David am shaitak ci, ani naw Saul la a hta ng’shon ah kut ungka, uknak cu lak khai, David cu Israel la Judah ah ghangpughang ah ng’hmoh khai, kho vangtäng khaw cawi ungka naw vangtäng khaw cawi ung khüt khai. Shin ah ng’thu cu akcang ah kä ka bi ung Khanpughi naw ka sik khai ah na ci sä!” cik ci.

¹¹ Ishbosheth cu Abner kyih aih neta, thu m’kha ät phi kä pyen ne om ci.

¹² Abner naw David ah ng’shä tüi ci, ani cu cun yah ung Hebron ah om ci. Ani naw ng’shä am cäi cu, “Shin ah khaw a u naw uk khai ang? Kei awn ngün kyük nak na bi vai nei, Israel khaw avan na näng vai ah nang täng ah om ne ka ning bawm khai nei,” ciah kyak ci.

¹³ David naw, “Bä khai, kei naw nang awn mawng ät awn ngünkyük nak ak bik khai: nang naw kei ah na law ah a kyak ung Saul ah hta hnumi Michala cu na law püi vai.”

¹⁴ David naw phi Ishbosheth ah ng’shä tüi ci, “Ka chu Michala cu na na pek ba vai. Kei naw Philistin chang phia ah vun nawn khleih ne ka chu nak nei,” cine pyen ci.

¹⁵ Ishbosheth naw Michala cu acei Paltiela laiah a hta ung ka la ba ci.

¹⁶ Paltiela naw Michala cu Bahurim gawnu ah khüt ne kyap ne läk lawk ci. Cun ung phi Abner naw, “Na im ah hteit ba ä” ci sei, hteit ba ci.

¹⁷ Abner naw Israel ng’vai gui ah hteit neta a pyen nak gui cu, “David cu nami ghangpughang vai ah nami ng’yak nak hlü shou lawk ci nei.

¹⁸ Tuhbäi, shin cu nangmi ah hmawk ah kyak ci. Bawipa ah ng’thu pyen cu nami shüm ba vai ‘Kei naw ka chang David cu, ka chang Israel gui Philistin gui la a hei ga avan ah kut ungka gung gui khai ah ka mang khai nei” cik ci.

¹⁹ Abner naw Benjamin pakhui gui am phi acun ah pyen na gui neta, Benjamin pakhui la Israel chang gui naw ami yum ah mawng cu David am m’thein khai ah Hebron ah hteit ci.

²⁰ Abner cu akchang m’ku khah püi ne David ah om nak Hebron ah law khäta, David naw akbä ah khin na güi ci.

²¹ Abner naw David am, “Kei tuhbäi hteit ba ne, Israel avan cu, näng ne, nang ka bawi ung ka ap lawk khai nei. Ngami naw ghangpughang ah ning dou khai gui, cun kawn ah nang naw na ng’yak hlü cu na gah khai, khaw avan cu na uk khai” cik ci. David naw Abner cu a phyawn htein vai ah ng’thushai ta shüüt neta, hteh ba sak ci.

Abner Ami Ngawn

²² Cun kawn ah Joab la David ah bawi gui cu ang ghit ah gawk law ba ci gui, ami guh tep ah khawh akda law püi ci gui. Cun yah ung Abner cu David ah pei, Hebron ah kä om ba ci, David naw a phyawn vai ah shüüt neta a tüih ba pyi ah kyak ci.

²³ Joab la achang gui gawk law ba u khäta, Abner cu ghangpughang David ah law sei, ani naw ng’thu shüüt ne a tüih ba ah mawng cu m’thein ci gui.

²⁴ Cun ah kyasei Joab naw ghangpughang ah hteit neta a pyen nak cu, “A i ah kyasei cu cha düt ah na hteh ba sak ang?

²⁵ Ani shin ung ning theileh nak khai ah lawk ci, na bi päng la na hteh nak päng ning k’tä khai. Akcang ah na hmat khai!” cik ci.

²⁶ David ungka hteit ba neta Joab naw chang tüi ne, Abner cu pha sak ci, ngami naw Sirah tui shawk ungka naw khü law ba ci gui; cun ung phi David naw cun ah mawng kä hmat ci.

²⁷ Abner cu Hebron ah gawk law ba khäta, Joab naw amät m’kawt law pei ah khü neta, amät a düm ah ng’htau püi hlük ciah pyen ci, acu ah ani naw a poi ung htei awn shun ci. Cun ah Abner cu ami ngawn, cun cu Joab ah phäi a ngawn ah phäh ah kyak ci.

²⁸ David naw cun ah a mawng cu ng’ya neta, “Kei ah chang gui la Abner ngawn nak ung kei changni ah ka kyak cu Bawipa naw hmat ci nei.

²⁹ Cun ah phäh ah m’kyuk nak cu Joab la akyongchang van ah khan ah ng’kya sä! Ang shon päng ung ani ah kyongchang m’neh ung gaw sä, kheilei ung gaw sä, hnumi bi bäng bi hning sä, ng’tuk nak ung ngawn u sä, kä tui ei hning sä!” cik ci.

³⁰ Cun ah kyasei Kibeon ng’tuk nak ung Abner naw ani phäi Asahela a ngawn ah phäh ah Joab la a phäi Abishai naw phu ani tuk ah kyak ci.

Abner M’cim ci gui

³¹ Cun kawn ah David naw Joab la achang gui cu, ami sui k’teek ne, ng’yu nak sui sui ne, Abner ah phäh ah ami thüi kyah vai ah k’bäi gui ci. Gook ami htüm nak ung David amät phi gook tom nak pei ah hteit shüi ci.

³² Abner cu Hebron ung m’cim ci gui, ghangpughang cu phu hmun pei ung m’lau ne kyap ci, chang gui ami van acun ah kyap ci gui.

³³ David naw Abner am shin ah ng’äi kyah ci: A i ah kyasei Abner cu akgu ang ah mäih ah a sih ang?

³⁴ A kut gui cu kä khih, A khaw gui cu kä k’pawn; Ani cu cheishoh ciah chang gui naw ami ngawn ah mäih ah sik ci nei!” Cun kawn ah chang gui cu ani ah phäh ah kyap ba mä ci gui.

³⁵ A hnüüp pum ung David naw ei a ei vai ah chang gui naw tha nak ci gui, cun ung phi ani naw thuuk ciah shaita ne, “Shin ah hnüüp kä ang pyi pha ung ei ka ei läi ngä sei, Khanpughi naw ka sik khai ah na ci sä!” cik ci.

³⁶ Ngami naw cun cu m’hnüt u neta, yei ci gui. Akcang ah ghangpughang naw abi phung cu chang gui naw yei nak ci gui.

³⁷ David ah chang gui avan la Israel chang gui avan naw Abner ngawn nak ung ghangpughang cu api ah phi kä ng’gui pha tuk ci, ciah hmat ci gui.

³⁸ Ghangpughang naw a bawi gui am, “Tuh ngawi dämduh ciah Israel ng’vai sik ci, cicu kä nami ngaih-tüh ne ma?

³⁹ Kei cu Khanpughi naw a ghü ah ghangpughang ah ka kyak ung phi, tuh ngawi ka tha ken ci nei. Shin ah Zeruiah ah hta gui cu kei ah phäh ah ta, m’gäi m’cik aih ci gui nei. Shin ah chang chei yeeih gui cu ami katnak ah ciah Bawipa naw m’kyuk gui sä” cik ci.