2 SAMUEL 24 - Cho Bible Common Language 2016

David naw Ming K’tä nak Bik ci

¹ Bawipa cu Israel gui ah khan ah m’lungshe ba mä ci, ani naw David cu, ami khan ah yaica nak abi vai ah bik ci. Bawipa naw ani am, “Hteit ne Israel gui la Judah chang gui cu khei gui ä” cik ci.

² Cun ah kyasei David naw a gabawi, Joab am, “Na bawi gui awn a täng ah, vang khaw cawi ungka naw vang khaw cawi ung khüt khai ah, Israel pakhui avan ung, chang gui na khei vai. Chang a i chü a law ah kei naw ka hmat hlük ci.

³ Cun ung phi Joab naw ghangpughang am, “Ka Bawipa mang, Bawipa na Khanpughi naw Israel chang gui cu tuhbäi ya ta, aphia ah däm ne da khai gui ah pyang khai nei, nang naw na ghin yah ung cun ah bik ciah ani cu na hmuk khai. Cun ung phi a i ah kyasei nang Bawi mang naw shin na bi hlü ang?” cik ci.

⁴ Cun ung phi Joab la a bawi gui naw ang thu ami ng’yak vai ah ghangpughang naw bik ci; ngami cu a hmuh ge ah pawng ne Israel chang gui khei khai gui ah hteit ci gui.

⁵ Ngami cu Jordan tuinu kat u ne, Gad khaw, khaw nawi ang lung ah mang gaw Aroer gawnu a htumtäng ung phung tu ne om ci gui. Cun ungka naw a siiptäng Jazer ah hteit u ne,

⁶ Hittit khaw Gilead la Kadesh ah phi hteit ci gui. Cun ungka naw Dan ah hteit u ne, Dan ungka naw akhei lam Sidon ah hteit ci gui.

⁷ Cun ungka naw a htum lam khäng ciah mang gaw Tire ah hteit ci gui, cun ungka naw Hivit gui la Kanaanit gui ah mang gaw avan ung hteit u ne, ak hnu ah Judah khaw a htum lam Beersheba ung khüt ne hteit ci gui.

⁸ Cun ah ngami cu cha kaw la hnüüp m’ku ung hteit u neta Jerusalem ah law ba ci gui, ngami cu khaw avan ung hteit ci gui.

⁹ Ngami naw chang ami khei cu ghangpughang am m’thein law u sei, gakap ung bi hning ciah pami: Israel chang 800, 000, Judah chang 500, 000 lawk ci.

¹⁰ David naw cun ah chang khei nak abi kawn ah am lung kyong ung yaica nak gawk lawk ci, cun ah kyasei ani naw Bawipa am, “Kei naw shin bi ne kyih aih vai ah katnak ka bik ci nei! Na bä ni na m’gein sei ä. Ak gu ang ah ka hnün tho pyi ci nei” cik ci.

^11-12 Bawipa naw, David ah prophet Gad am, “Hteit ne David am na m’thein vai cu, kei naw a ghü vai thum ka pek ci. Ani naw a ghü cu kei naw ka bik khai nei” cik ci. A ngawi ung khaw ngawi David a thawh law kawn ah,

¹³ Gad naw hteit ne, Bawipa ah ng’thu cu m’thein neta, ang shi cu, “Shin gui ungka a i ang a kyak kaw? Na khaw ung khaw kum thum ei khaw yaw khai, kä cung cha thum ung na ga gui kyih ne, na dawng khai, kä cung na khaw ung khaw hnüüp thum leigai sou khai? Tuhbäi ngai neta na m’hlan nak cu na m’thein ä, Bawipa ah a i pi hteh püi vai aw!” cik ci.

¹⁴ David naw, “Tuh bäi kei ung ng’cet lawk ci nei! Cun ung phi chang naw ana m’kyuk vai kä ka ng’ya hlük ci. Bawipa amät bäng naw mikmi na m’kyuk gui sä, ani cu chi m’gein ciah kyak ci.”

¹⁵ Cun ah kyasei Bawipa naw Israel gui ah khan ah leigai yuk chah ci, cun cu a khaw ngawi tün ne, ani naw a ghü nak ah akhin ung khüt ci. Ami khaw Israel chang phia phia chih sik ci gui.

¹⁶ Bawipa ah khanchang naw Jerusalem m’di khai ah pawng khäta, chang gui m’di nak vai ah mawng ung Bawipa naw am lung m’thawng neta, chang gui ngawn ciah khanchang am, “Ng’düm ä! Bä khai nei!” cik ci. Cun yah ung khanchang cu Jebusit chang Araunah htang khlang ung om ci.

¹⁷ David naw chang gui ngawn ciah khanchang cu hmu neta, Bawipa ah ma ah, “Kei cu hma ciah ka kyak ci, kei cu cheishoh ci bi ciah chang tumat ah ka kyak ci. Shin ah chang dukhaih gui naw a i ang ami bi? Nang naw kei la ka kyong khui cu na m’kyuk hning ci nei” cik ci.

¹⁸ A cu hnüüp Gad cu David ah hteit neta, ani ah ma ah, “Araunah htang khlang ah hteit neta, Bawipa ah sonkiang co vä” cik ci.

¹⁹ David naw Bawipa ah thumkhän cu ngai neta Gad naw am thein ah mäih ah hteit ci.

²⁰ Araunah naw yuk teng neta, ghangpughang la a bawi gui, ani ah ami law cu hmuk ci. Ani cu David ah ma ah m’dek ung va ng’phäi neta,

²¹ ang shi cu, “Ka bawi mang, a i ah kyasei shi ah na law ang?” ciah kyak ci. David naw, “Nang ah htang-khlang cu hleih neta Bawipa ah phäh ah sonkiang ka co khai, cun cu leigai ang düm nak vai ah phäh ah kyak ci” cik ci.

²² Araunah naw, “La ä, bawi mang aw, na sonkiang ung m’khih ne douthak vai ah sei pat gui nei. Shin cu ami phuih kawh nak gui la mei ah sih vai ah hlang sing gui nei” cik ci.

²³ Araunah naw cun gui avan cu ghangpughang am pe neta pyen nak cu, “Bawipa na Khanpughi naw na douthak nak cu ning dou pe sä.”

²⁴ Cun ung phi ghangpughang naw, “Ka, a phu ka ning pek khai nei, kei naw Bawipa ka Khanpughi cu aphu kä ka pek awn kä ka khawihnah khai” cik ci. Cun kawn ah ani naw htang khlawng la seipat cu ngui hma-kip pe ne khleih ci.

²⁵ Cun kawn ah ani naw Bawipa am sonkiang cu cawh neta, m’khih ne pek nak la hmuh-chum nak pek nak cu douthak ci. Ani ah taigü cu Bawipa naw ngai sei, Israel khaw ung leigai ng’düm ci.