2 SAMUEL 23 - Cho Bible Common Language 2016

David ah Akhnu ah Ang Thu

¹ Jesse ah htapa David cu Khanpughi naw a dämduh sak ah chang ah kyak ci, ani cu Jakob ah Khanpughi naw ghangpughang ah a ghü ah kyak ci, ani cu Israel chang gui ah phäh ah ng’äi k’kiom gui pyang ciah kyak ci. Shin gui cu David ah ak hnu ah angthu gui:

² Bawipa ah mümcha cu kei ung ng’thu pyen ci; Ani ah ng’thu cu kei ah m’lei ung om ci.

³ Israel Khanpughi naw ng’thu pyen ci; Israel gui shungvong ci naw ana pyen nak cu, “Taga khai ah uk ciah ghangpughang, Khanpughi ng’ngai neta uk ciah chang cu,

⁴ ng’mei kä om ciah khaw thaih hta ung, pyü ne sou ciah khaw hni ah mäih ah, khaw a aa thai ung khu m’sai m’kim sak ne, pyü ciah khaw hni ah mäih ah kyak ci nei.”

⁵ Shin cu Khanpughi naw ka hta ng’shon gui am a i cha ah hriham apek vai ah mawng ah kyak ci, a i ah kyasei ci ung ani naw ng’täi ciah thukhän cu kei ung bik ci nei, yum yawp nak cu kä ng’phyek khai, shai tak cu kä ng’thawng khai. Cun cu kei ah ng’yak hlü avan ah kyak ci; a cun cu kei ah näng nak ah kyak khai, Cun cu Khanpughi naw akcang ah law püi khai.

⁶ Khanpughi kä om ci cik ci gui cu ng’hling ah mäih ah kyak ci gui, cun gui cu ghawh ah kyak ci; a u naw phi awng ciah kut awn kä tawn gui ci.

⁷ Nang naw m’si likhim baw, htei tumat baw na mang vai; ngami cu pyäm khai ah ui gui khai.

David ah Mingthang ciah Gakap gui

⁸ Shin gui cu David ah mingthang ciah gakap gui ah kyak ci: a tumat nak cu Josheb Basshebeth, ani naw ak htei kawt sei chang phia cheit awn ng’tu u ne, ng’tuk nak tumat ung avan ngawn gui ci.

⁹ Ak hnih nak mingthang cicu Eleazar, Dodo ah hta, Ahoh pahta ah kyak ci. Hnüüp ät ung David la ani naw ng’tuk vai ah ng’bum ciah Philistin gui cu ghet ci goi. Israel gui ng’hlat ba ci gui,

¹⁰ cun ung phi ani cu khüi ne ng’düi ne, akhim kä chah ba hlawt khai ah a kutban a kha güt Philistin gui cu tu gui ci. Cu hnüüp ung Bawipa naw näng nak akdäm bik ci. Cun ang pyi kawn ah, Israel gui cu Eleazar ah om nak ah law ba u ne, sik ci gui ah awi k’bah gui cu lak ci gui.

¹¹ Ak thum ah mingthang ci cu, Agee ah hta Shammah, Harar ungka ah kyak ci. Philistin gui cu m’lui geit nak ah lo Lehi ung ng’bum ci gui. Israel gui cu Philistin gui ungka dawng ci gui.

¹² Cun ung phi Shammah cu khüi ne loma ah ng’düi ne, shung gui ne, Philistin gui cu ngawn gui ci. Cu hnüüp ung Bawipa naw näng nak akdäm bik ci.

¹³ Htang m’guh tün ne bi vai ah khin ng’et law khäta, gabawi thum kip ungka thum gui cu, David ah om nak, Adullam lung khui ah hteit ci gui, cun yah ung Philistin mak ät cu Rephaim khaw nawi ung ng’shui ci gui.

¹⁴ Cun yah ung David cu ng’mah nak ah kho gui ung om sei, Philistin bum ät naw Bethlehem cu khäm ci gui.

¹⁵ David naw a im ah khaih neta a pyen cu, “Bethlehem m’kawt pei tuishawk ungka, chang tumat mat naw awk vai tui ana thak law vai cu ka ng’ya hlü aih ci nei.”

¹⁶ Mingthang ciah gakap thum naw ng’güt ne, Philistin phung güt ah hteit u ne, tui shawk ungka tui than u ne, David am thak lawk ci gui. Cun ung phi ani naw kä awk ci, ani naw cun ah tui cu Bawipa am douthak ah k’phyuh neta,

¹⁷ ani naw “Bawipa, Shin cu kei naw kä ka awk cik nei! Shin awk cu ami hnun gui pek ciah chang gui ah si awk awn täng khai nei!” cik ci. Cun ah kyasei cun awk vai cu ani naw mak ci. Shin gui cu mingthang ciah gakap thum naw m’gäi ne ami bi lawh gui ah kyak ci.

¹⁸ Joab ah phäi Abishai (ani nu Zeruiah) cu “Mingthang ciah thum kip ung ang vai pi ah kyak ci.” Ani naw ak htei awn chang phia thum cu ng’tuk püi gui ne, ngawn gui neta “Thum Kip” ung ang mingthang pi ah kya lawk ci.

¹⁹ Ani cu “Thum Kip” ung ang mingthang pi k’bäih ah kyak ci, cun kawn ah ami ng’vai pi ah kya lawk ci, cun ung phi ani cu “Thum gui” hlawk ah kä mingthang ci.

²⁰ Benaiah, Jehoiada ah hta, Kabzeela ah ka cun phi mingthang ciah gakap tumat ah kyak ci; ani naw m’gäi ne akda bik ci, cun ung dämduh ci goi ah Moabit gakap hnih a ngawn nak phi mingthang ci. Hnü ät ung khüi bawk ciah khaw ngawi ung khui ung yu lut ne phongkawng yu ngawn ci.

²¹ Ani naw k’htei kawt ne sui awi ciah Egypt chang ang kawm phi ngawn ci. Benaiah naw ang sho pawng awn ani cu tuk ci. Egypt chang ah kut ung ka ak htei guh pe neta, a cun awn ngawn ci.

²² Cun gui cu Benaiah naw m’gäi ne abi gui ah kyak ci, ani cu “Thum Kip” ungka tumat ah kyak ci.

²³ Ani cu ngami ung bä pi ciah kyak ci, cun ung phi “Thum gui” hlawk ah kä mingthang ci. David naw ani cu, amät ngäng ci gui ah gakap ung bawi ah tha ci.

^24-39 “Thum Kip” ungka gui cu: Asahela, Joab ah nau Elhanan, Dodo ah hta, Bethlehem ungka Shammah la Elika, Harod ungka goi Helez, Pelet ungka Ira, Ikkesh ah hta, Tekoa ungka Abiezer, Anathoth ungka Mebunnai, Hushah ungka Zalmon, Ahoh ungka Maharai, Netophah ungka Heleb, Baanah ah hta, Netophah ungka Ittai, Ribai ah hta, Benjamin khaw Gibeah ungka Benaiah, Pirathon ungka Hiddai, Gaash pei khaw nawi ungka Abialbon, Arabah ungka Azmaveth, Bahurim ungka Eliahba, Shaalbon ungka Jashen ah hta gui ungka Jonathan Shammah, Harar ungka Ahiam, Sharar ah hta, Harar ungka Eliphelet, Ahasbai ah hta, Maacah ungka Eliam, Ahithophela ah hta, Gilo ungka Hezro, Karmelaah ungka Paarai, Arab ungka Igal, Nathan ah hta, Zobah ungka Bani, Gad ungka Zelek, Ammon ungka Naharai, Beeroth ungka, Joab ah awi bah kawt ci Ira la Gareb, Jattir ungka goi Uriah, Hittit chang. Mingthang ciah gakap avan thum-kip lei-chih lawk ci gui.