2 SAMUEL 22 - Cho Bible Common Language 2016

David ah Näng nak ng’äi

¹ Bawipa naw David cu Saul la a hei ga gu ah kut ung hun khäta, David naw shin ah ng’äi awn Bawipa ng’äi ci;

² Bawipa cu kei ah ka ng’shung nak; Ani cu khüighat ciah ka mangpang.

³ Ka Khanpughi cu ka ng’shung nak, Ani ung om ne, kei ka phyawng ci. Ani naw shawi ah mäih ah na shung vong ci; Ani naw na cham ne pang ne na hun ci, Ani cu ka hunbawi nei; Ani naw hung sai ung na shung vong ne, nak phyawn ci.

⁴ Bawipa cu ka khü ci, Ani naw ka ga gui ah kut ung na hun ci nei. Bawipa ka m’taam ci nei!

⁵ Sih nak tui hnawk naw avan ung na kyung ci; Dishum nak tui hnawk ka khan ah long ci nei.

⁶ Sih nak ah kyih nak naw na veing ci nei, Ng’cim hmun naw kei ah phäh ah m’hling bang ci.

⁷ Ka khüikha nak ungka naw Bawipa ka khü ci; Ana m’htei vai ah ka Khanpughi ka khü ci. Apum im ung kei ah k’aw cu ng’yak ci nei; Ana m’htei vai ah ka kyah cu ani naw ngai ci nei.

⁸ Cun kawn ah khomdek ng’thüng ne thüüng ci; Khomik ah aphung akung cu hnün ne ng’khäi ci, A i ah kyasei ci ung Khanpughi m’lungshe sei nei!

⁹ A hna khui ung meikhu khu lawk ci, Am gawng ung m’hleim ciah mei däi la ui ciah mei cak khu ci.

¹⁰ Ani naw khawmik m’auh ne kyum lawk ci, A khaw ka ah ng’mei le ah kyak ci.

¹¹ Ani cu Cherubim ah ng’phia ung ng’cum ne yong ne; Khawkhi ah ng’phia ung hteit ci.

¹² Amät cu khaw hmüüp awn ng’uk ci; ng’mei akshah, tui awn be ci naw kawi ci;

¹³ Ama ung ak däi ung meicak gui cu ui ne däi ci,

¹⁴ Cun kawn ah khawmik ung Bawipa cu hmum kyeek ci, Hlüngtai säih ciah Khanpughi ah k’aw cu ng’yak nei.

¹⁵ Ani naw am la kap ne a ga gui püi sak gui ci; Lailäp ne däi ci awn ani naw dawng sak gui ci.

¹⁶ Tuinu ah aka phah cu auh ci, Khomdek ah a phung a kung cu ng’hmawng ci. Cun cu Bawipa naw a ga gui m’kat gui ne, ami khan ah m’lungshe ne am ngaw yah ung ah kyak ci.

¹⁷ Bawipa cu akhan ah ka kyum law ne, kei na la ne na k’pang ci; Ani naw ak thuuk pi tui khui ungka na yuk la ba ci.

¹⁸ Huham ah ciah ka ga gui ung na gung ci, Na gen ci gui avan ungka na gung ci, Ngami cu kei ah phäh ah gai aih ci gui.

¹⁹ Kei yaica nak ung ka om yah ung, ngami naw na tuk ci gui, Cun ung phi Bawipa naw na shungvong ci.

²⁰ Ani naw kyihkyawk nak ungka na m’htei ci, Ani naw na hun ci, a i ah kyasei ci ung, ana m’hni ah hmawk ah kyak ci.

²¹ Bawipa naw na m’cümhnah ci, a i ah kyasei ci ung kei naw hman ci ka bik ci; Ani naw hriham na pek ci, a i ah kyasei ci ung kei changni ah ka kyak ci.

²² Kei naw Bawipa ah thukhän ka läk ci; Khanpughi kä ka ng’hlah tak ci.

²³ Kei naw a thukhän avan ka läk ci; Kei naw a thumkhän kä läk ne kä ka om ci.

²⁴ Ani naw hmat ci, kei ung katnak kä om ci. Cheishoh nak kä bi vai ah ka mät naw ka mät ka k’pang ci.

²⁵ Cun ah kyasei ani naw na m’cümhnah ci, a i ah kyasei ci ung, kei naw hma ci ka bik ci. A i ah kyasei ci ung, ani naw kei chang k’ni ah na hmat ci.

²⁶ O Bawipa, nang ung bekhüt ci gui ah khan ah, na bekhüt ci, Kümbe ci gui ah khan ah nang cu akbe ah na nik ci.

²⁷ Theing cim ci gui ah khan ah nang cu na theing cim ci, Cun ung phi shekat ci gui ah khan ah ng’tuk na bik ci.

²⁸ Amlung neim sak ci gui cu na hun gui ci, Chang om ci gui cu na neim sak gui ci.

²⁹ Nang, Bawipa, cu kei ah ka k’dei; Kei ah ka hmüp nak cu na dei sak ci.

³⁰ Nang naw ka ga gui ka tuk nak vai k’tha gui na na pek ci, Ami ng’vong näng nak vai ah huham na na pek ci.

³¹ Khanpughi ah bi lawh cu kümbe aih ci, ang thu cu khäng htek aih ci nei! Ani ah shungvong nak shui ci van ah phäh ah Ani cu shawi ah mäih ah kyak ci nei.

³² Bawipa amät bäng Khanpughi nei; Khanpughi bäng cu mi ng’shung nak nei.

³³ Shin ah Khanpughi cu khüighat ciah ka ng’yii nak, Ani naw ka lam düng khai ah bik ci.

³⁴ Ani naw ka khaw cu kigang ah khaw ah mäih ah na yaang sak ne; m’htung gui ah khan ah, na k’phyawn ci.

³⁵ Ani naw ng’tuk bi nak vai na m’thei ci, cun ah kyasei kei naw ng’khüüi pi ciah li ka bi hning ci.

³⁶ O Bawipa, nang naw na shungvong ne, na na hun ci; Na m’hteihtang nak naw na dämduh sak ci.

³⁷ Nang naw thawng kyum nak ungka na na k’pang ci, Kei cu kä ka kyu phung khai.

³⁸ Kei naw ka ga gui cu gawt gui ne ka hnim gui ci; Kei naw kä ka m’di pha gui ah chuih kä ka ng’düm khai.

³⁹ Kei naw ka m’ghuih gui ci, ngami kä tho ba hlawt ci gui; Ngami cu kei ah ma ah ng’yän ne hnim nak gah ci gui.

⁴⁰ Nang naw ng’tuk nak vai tha gui na na pek ci, Ka ga gui ah khan ah näng nak phi na na pek ci.

⁴¹ Nang naw ka ga gui kei ungka dawng khai gui ah na bik ci; Kei naw na gen ci gui ka m’di gui ci.

⁴² Ngami naw m’hteihtang nak shui ci gui, cun ung phi a u naw kä hun gui ci. Ngami naw Bawipa khü ci gui, cun ung phi ani naw kä m’shang gui ci.

⁴³ Kei naw ka deng gui ci, ngami cu m’vut ah kyak ci gui; Lam ung om ciah ng’nai ah mäih ah kei naw ka kai na gui ci.

⁴⁴ Kei na ng’tuk püi ciah chang gui ungka, na na k’phyawn ci. Chang pakhui gui ah khan ah ka uknak na gawk sak ci. Kei naw kä ka hmat gui ah chang gui phi, tuhbäi ka chang ah kya lawk ci gui.

⁴⁵ Khaw hei chang gui ka ma ah kawp ci gui; Ngami naw ami na ng’yak ung, na ngai ci gui.

⁴⁶ Ngami ami k’tha maih ci, Ami mangpang ungka ng’hlet ne lawk ci gui.

⁴⁷ Bawipa ghing ci! Na shungvong cicu m’tam nei! Na hun ciah m’gäi ciah Khanpughi ah dämduh nak cu shäu nei.

⁴⁸ Ani naw ka ga gui ah khan ah näng nak na pek ci, Chang pakhui gui cu ka, ka ah tha gui ci nei.

⁴⁹ Ani naw ka ga gui ung na hun ci. O Bawipa, nang naw ka ga gui ah khan ah näng nak na na pek ci, Sohai ciah chang gui ung na na shungvong ci.

⁵⁰ Cun ah kyasei chang pakhui gui ah ng’lung ah ka ning m’tam ci nei; Ning m’tam ne ng’äi ka m’cu ci.

⁵¹ Khanpughi naw a ghangpughang am näng nak akdäm pek ci; Ani naw kä ng’pyi hlawt ciah m’hni nak cu a ghü ah chang tumat David la a hta ng’shon am ngawi yä m’hnuh ci nei,