2 SAMUEL 21 - Cho Bible Common Language 2016

Saul ah Hta ng’shon gui Ngawn ci gui

¹ David naw a uk yah ung khaw kum thum ung ei khaw yaw ci. Cun ah kyasei David naw a cun ah mawng cu Bawipa am m’thein ci, Bawipa naw, “Saul la akyong chang gui naw chang ngawn ci gui; Ani naw Gibeon chang gui cu sih nak ung tüi gui ci.”

² (Gibeon chang gui cu Israel chang ah kä kyak ci gui; Ngami cu Israel gui ami shung vong gui vai ah shai ami tak ah Amorit chang ken gui ah kyak ci. Cun ung phi Saul naw m’di gui khai ah k’tha nak ci, a i ah kyasei ci ung ani naw Israel la Judah gui ah phäh ah a khüi ghat ah phäh ah kyak ci.)

³ Cun ah kyasei David naw Gibeon chang gui cu khü thäh gui neta, a pyen nak gui cu, “Nang mi ah phäh ah a i ang ka bi hning kaw? Kei naw nangmi ah khan ah katnak ka bi cu ka pyang hlük ci, cun ung nang mi cu Bawipa ah chang ah hriham na mi gah khai” cik ci.

⁴ Ngami naw, “Saul la akyongkhui chang gui awn kami ng’vokshan nak cu ghui ngui awm kä m’khüt vai nei, Israel chang a u phi ngawn vai kä kami ng’ya hlük ci nei” cik ci gui. David naw, “Nangmi ah phäh ah ka bi vai nami ngaih cu a i ang?” cine ng’shi gui ci.

⁵ Ngami naw, “Saul naw na m’di gui hlük ci, Israel khaw a hawi ah phi kami ghin tuba vai ah kä na nawng gui ci.

⁶ Cun ah kyasei ani ah hta ng’shon pami chih na ap gui ä, Bawipa ah ghü ah ghangpughang, Saul ah gawnu, Gibeon ung Bawipa ah ma ah kami m’awh gui khai nei” cik ci gui. Ghangpughang naw, “Ka ning ap gui khai nei” cik ci.

⁷ Cun ung phi ani la Jonathan naw theing ciah shaitak ani bi om ci kyasei, Saul a tu Jonathan ah hta, Mephibosheth cu David naw k’pawih nak ci.

⁸ A i ah akiak ung phi, ani naw Armoni la Mephibosheth, Aiah ah hta hnumi Rizpah la Saul a hta goi lah; Saul ah hta hnumi Merab la Meholah ungka, Barzillai ah hta Adriel ah hta gui hma cu la ne ap gui ci.

⁹ David naw cun gui cu Gibeon chang gui am ap gui sei, ngami naw Bawipa ah ma ah m’htung ung m’awh gui ci gui — cun ah chih cu a täng ah sik ci gui. Cun ah ami ngawn gui cu kho hting ah ng’pyi law htang m’guh bi ami tün yah ung ah kyak ci.

¹⁰ Cun kawn ah Saul ah chubawk, Aiah ah hta hnumi Rizpah cu thüi ung sui ah sui la neta, gook gui ah om nak lung song khan ah amät ah phäh ah phung tu neta, htang tün ne bi law ung tün ne, vakiak khaw a aa law ung khüt sei a cun ung om ci. Hnüüp yah ung ani naw kha gui cu gook ung kä ng’et khai ah ghung ne, mü ah khisa kä lawk khai ghung khawng ci.

¹¹ Rizpah ah bi cu David naw ng’ya neta,

¹² Gilead ah Jebesh chang gui ah, Saul la a hta Jonathan ah guh cu hteit ne lak ci. (Beth Shan pigaw lung ungka ngami naw ami m’guk ah kyak ci, cun cu Gilboa M’htung ah Saul ngawn u ne, a cu hnüüp, a pum cu Philistin gui naw ami m’awh ah kyak ci.)

¹³ David naw Saul la Jonathan ah guh gui cu lak ci, ami m’awh gui ah chang chih ah guh gui cun phi lak ci.

¹⁴ Saul la Jonathan ah guh gui cu, Benjamin khaw, Zela pigaw, Saul ah pa Kish ah phuh hmun ung phuh ci gui, cun gui avan bi vai cu ghangpughang naw ak bäi gui ah kyak ci. Cun kawn ah, ami khaw ah phäh ah ami taigü cu Khanpughi naw m’shang gui ci.

Philistin chang dämcham gui Ng’tuk Püi nak

¹⁵ Cun yah ung Philistin gui la Israel gui ah ng’lak ung ng’tuk nak om tu hnga ci, David la a chang gui naw hteit ne Philistin gui cu tu gui ci gui. Tuk nak akda ungka, tumat ung ami ng’tuk yah ung David cu cümbawng ci.

¹⁶ Chang dämcham Ishbibenob cu pit thum lawk ciah kyei k’htei kawt ne, khim sem akthai k’bah ne, David ngawn khai ah ngai ci.

¹⁷ Cun ung phi Zeruiah ah hta Abishai cu David ah kugam nak awn law neta, chang dämcham cu tu ne, ngawn ci. David ah a chang gui naw, David cu ngami awn a täng ah ng’tuk nak ung kä a hteh tuba vai ah shaitak sak ci gui. Ngami naw, “Nang naw Israel gui ah ngaih u ah na kyak ci, keimi naw na sih vai kä kami m’hni ci” cik ci gui.

¹⁸ Cun kawn ah Gob ung Philistin gui awn ng’tuk nak om ba mä ci. Cun yah ung Hushan ungka Sibbecai naw Philistin chang dämcham Saph cu ngawn ci.

¹⁹ Cun kawn ah Gob ung Philistin gui awn ng’tuk nak a hei om ba ci, cun ung Bethlehem ah ka, Jari ah hta Elhanan naw Gath ungka Goliah cu ngawn ci, ani naw tah k’cawn teih däm ne shah ciah k’htei kawt ci.

²⁰ Cun kawn ung Gath ung a hei ng’tuk nak om ba ci, a cun ung ng’tawh vai m’hni ciah chang dämcham tumat om ci. Ani cu akut päng ung kutpyün chuk ci lawk ci, a khawpäng ung khaw pyün chuk ci lawk ci.

²¹ Ani naw Israel chang gui ghet gui khäta, David ah phäi ah hta Shammah naw ani cu ngawn ci.

²² Shin ah phli gui cu Gath chang dämcham ah hta ng’shon gui ah kyak ci, ngami cu David la ak chang gui naw ngawn gui ci gui.