2 SAMUEL 20 - Cho Bible Common Language 2016

Sheba ah Hnu Ng’tuk Püi nak

¹ Cun yah ung Gilgal gawnu ah Benjamin pakhui Bikri ah hta, Sheba ming nak ciah chang om k’she tumat om ci. Ani naw phyung puuk tum ne, khü gui ne, “David yu ng’kia sä! Mikmi naw kä mi läk khai nei! Israel chang gui, mi om ah mi hteit ba khai nei!” cik ci.

² Cun ah kyasei Israel chang gui cu David hteh ta u ne, Sheba awn hteit ba ci gui. Cun ung phi Judah chang gui cu om shüt ne, bekhüt u ne, Jordan ungka naw Jerusalem ah khüt sei David cu läk ci gui.

³ David cu Jerusalem amang im ung gawk law ba neta, mang im m’htei khai ah a nawng shüt gui chubawk sing gha cu la gui ne, im ung chum gui ci. Ani naw ami ng’yak hlü pe gui ci, cun ung phi kä ng’yaw koh püi gui ci. Ngami cu ami ghin ah chüih chum ne tha gui ci, hmeinu ah mäih ah om ci gui.

⁴ Ghangpughang naw Amasa am, “Judah chang gui khü ne m’cut gui ne, ci tuh hnüüp a shin ung na law püi vai” cik ci.

⁵ Amasa naw hteit ne khü gui ci, cun ung phi, Ghangpughang naw akbäi nak ah khin ung kä law ba ci.

⁶ Cun ah kyasei ghangpughang naw Abishai am, “Sheba naw Absalom ah ta däm pi ciah yaica nak na pe goi khai nei. Ka chang gui la gui ne a hnu ah läk ä, kä cun ung ani naw khäng ciah gawnu khäm ne, mikmi ungka phyawng khai nei” cik ci.

⁷ Cun ah kyasei, Joab ah chang gui, bekhüt ciah chang ngäng gui, la gakap gui ami van cu Jerusalem ungka Abishai awn Sheba ah hnu ah hteit ci gui.

⁸ Gibeon ung lung song nu pei ah gawk law neta, Amasa awn ng’hmuk ci gui. Joab cu ng’tuk nak sui sui ci. Akhei pat ung khim käp mah khim bun ci. Malam ung a hteh yah ung a khim kya lawk ci.

⁹ Joab naw Amasa am, “Na gai ne ang, ka teih püi? cine, ng’ui khai hlawk ah akpat lam kut awn am gawng mu cu k’pang ci.

¹⁰ Joab naw akut vangtäng ung a kawh ah khim cu, Amasa naw kä hmat ci, Joab naw apoi ung k’daih ne yak sei, ak chi lut law ne m’dek ung ng’zäi ci. Ani cu a cung sik ci, Joab naw a i ah phi kä ciba ci. Cun kawn ah Joab la anau Abishai naw Sheba cu läk ba ci goi.

¹¹ Joab ah chang tumat cu Amasa ah pumsa pei ah ng’düi neta ng’khü ci, “David la Joab ah phäh ah ng’düi ciah chang päng naw Joab cu läk sä” cik ci.

¹² Amasa ah pumsa cu si bäng ah kya ne lam ng’lung ung ng’yän ci. Acun ung chang avan ng’düm u sei, Joab ah chang naw hmuk ci. Ani naw lam ungka kaih ne, lo ma ah tha neta, yih awn bu shüt ci.

¹³ Lam ungka gook cu ami m’hnawn kawn ah chang van naw Joab cu läk u ne, Sheba cu gawt ci gui.

¹⁴ Sheba naw Israel pakhui ami van ah khaw gui cu sum pah gui ne, Abel Beth Maacah mang gaw ung gawk lawk ci. Bikri pakhui chang avan ng’bum u ne, ani cu mang gaw kyong güt ah läk lawk ci gui.

¹⁵ Joab ah chang gui naw Sheba cä ah a om cu ng’ya u neta, ngami naw hteit ne, mang gaw khaai ci gui. Ngami naw pang akpung täng m’dek phlu ne pyang u ne, k’pang ayu ng’kiak vai ah pang ah ka phi co ci gui.

¹⁶ Mang gaw kyong ah cüivai ciah hnumi om ci, ani cu pang ungka naw m’lau ne, “Ngai vä! Ngai vä! Shiah a law vai ah Joab cu m’thein vä; kei naw ka ng’htau püi hlük ci nei” cik ci.

¹⁷ Joab hteit khäta, ani naw, “Nang Joab ma?” cine ng’shik ci. Ani naw, “Ä, kei nei” cik ci. Hnumi naw, “Saya, na ngai ä” cik ci. Ani naw, “Ka ning ngai ci nei” cik ci.

¹⁸ Hnumi naw, “Cau chang gui naw pyen u ne, ‘Abel mang gaw ah hteit ne thu m’shan nak nami lak vai — ci u sei, a cun ah bi man ci gui.

¹⁹ Kami mang gaw cu akdämduh ah kyak ci, Israel khaw ung ak ding gei pi la abekhüt pi k’bäih ah kyak ci. A i ah kyasei cu m’di vai ah na tha nak ang? Bawipa ah a ka cu adi vai na ng’ya hlük ci ma?” cik ci.

²⁰ Joab naw, “Ka nei! Kei naw nangmi ah mang gaw kä ka m’di, kä ka m’shum khai.

²¹ Cun cu keimi ah pawng püi ah kä kyak ci. Ephraim khaw gui ungka Bikri ah hta Sheba ming nak ciah chang naw Ghangpughang David cu hnu ng’tuk püi ci. Cun ah chang cu ap vä, kei mang gaw ungka, ka ng’hlat ba khai nei” cik ci. Hnumi naw, “Keimi naw ani ah lu cu pang khan ungka naw kami ning ak ghawh khai nei” cik ci.

²² Ani cu ang bü nak awn mang gaw chang gui ah dawng ba sei, ngami naw Sheba ah lu chüng ne, pang ah khan ung Joab am ak ghawh lawk ci gui. Ani naw mang gaw hteh tak nak vai ah m’hnüt nak ah phyung puuk tum sei, ngami cu ng’hlat ne ami im ah hteit ba ci gui. Joab cu Jerusalem ung ghangpughang ah hteit ba ci.

David Bawi gui

²³ Joab cu Israel gakap ah gabawi ah kyak ci; Jehoiada ah hta Benaiah cu David ngäng ci gui ah bawi ah kyak ci.

²⁴ Adoniram cu akhan bawi ah kyak ci; Ahilud ah hta Jehoshaphat cu yung bawi ah kyak ci;

²⁵ Sheva cu ca guk ciah ng’vai pi ah kyak ci; Zadok la Abiatha cu taigü ah kyak ci goi,

²⁶ Jaira gawnu ungka Ira cun phi David ah taigü tumat ah kyak ci.