2 SAMUEL 2 - Cho Bible Common Language 2016

David cu Judah Ghangpughang ah Hmoh ci gui

¹ Cun kawn ah David naw Bawipa ah ma ah, “Kei naw hteit ne Judah gawnu tumat mat la ne ka k’pan vai ang?” cik ci. Bawipa naw, “Ä” cik ci. David naw, “A hawn ah gawnu ang?” cik ci. Bawipa naw, “Hebron” cik ci.

² Cun ah kyasei David cu Hebron ah hteit ci, ak chu goi khah püi goi ci: Ahinoam, Jezreela ah ka la, Abigail, Nabalah ah chu hmei, Karmelaah ah ka ah kyak ci.

³ Ani naw a chang gui phi ami kyongchang gui mah ah khah püi gui sei, Hebron gawnu ah a pei yung gawnu gui ung om ci gui.

⁴ Cun kawn ah Judah chang gui cu Hebron ah law u ne David cu Judah ghangpughang ah hmoh ci gui. David naw Kilead ung Jebesh chang gui naw Saul ami htüm cu ng’ya neta,

⁵ Chang gui cu m’cäi ne tüi gui ci: “Nami bekhüt nak m’dang ne, nami ghangpughang nami htüm cu, Bawipa naw hriham ning pe gui sä.

⁶ Tuhbäi Bawipa naw ning m’hni gui ne, ning bekhüt na gui sä. Kei naw phi nami bilawh ah phäh ah akni ah ka ning m’htei gui khai nei.

⁷ Khüi ghat vä! M’gäi vä! Nami ghangpughang Saul cu si pyi ci, Judah chang gui naw ami ghangpughang ah kei cu na hmoh pyi ci gui nei” cik ci.

Ishbosheth cu Israel Ghangpughang ah Hmoh ci gui

⁸ Saul ah gabawi, Ner ah hta Abner cu Saul ah hta Ishbosheth awn Jordan tuinu kat ne Mahanaim ah dawng ci goi.

⁹ A cu ah Abner naw Ishbosheth cu, Kilead, Asher, Jezreelaa, Ephraim la Benjamin khaw gui ah ghangpughang, akcang ah Israel khaw avan uk khai ah hmoh ci.

¹⁰ Ani cu Israel ghangpughang ah akyak yah ung a kho kum phli-kip lawk ci, ani naw kum goi uk ci. Cun ung phi Judah pakhui cu David ung bekhüt ci gui,

¹¹ Ani naw Hebron ung om ne khokum chih la amcawt Judah ung uk ci.

Israel la Judah ah Ng’tuk nak

¹² Abner la Ishbosheth ah bawi gui cu Mahanaim ungka naw Kibeon mang gaw ah hteit ci gui.

¹³ Zeruiah nu nak ciah Joab la David ah bawi gui naw ngami cu tuibüm pei ah hmu gui ci gui, ngami ami van ngok ci gui, amshah cu tuibüm ah vangtäng ah ngo sei, amshah cu vangtäng ah ngok ci gui.

¹⁴ Abner naw Joab am, “Mi ng’tuk nak püi gui vai ah vang goi vei ungka, chang nong gui mi la gui khai nei” cik ci. Joab naw, “Aw, bä khai nei” cik ci.

¹⁵ Cun ah kyasei Ishboshet ah chang la Benjamin pakhui ungka gha lei goi ghü ne, David ah chang gha lei goi awn ng’tuk sak ci gui.

¹⁶ A chang sing naw ami tuk püi cu a lu ung ven ne, a vei ung ami khim awn tawk ci gui. Cun ah kyasei chang m’ku lei-phli kyu u ne ami van a täng ah sik ci gui. Cun ah kyasei Kibeon hmun cu “Khim gui ah Khaw” ah sui ci goi.

¹⁷ Nui ciah ami ng’tuk nak cu ng’pyi sei, Abner la Israel chang gui cu David ah chang gui naw hnim gui ci gui.

¹⁸ A cu ah om ci gui ah Zeruiah ah hta thum cu: Joab, Abishai la Asahela ah kyak ci. Asahela, kigang ah mäih ah dawng m’khüt ci naw,

¹⁹ Abner cu gawt lawk ci, ak ghuih ah dawng lawk ci.

²⁰ Abner naw va mang ba neta, “Asahela, nang ma?” cik ci. Ani naw “Ä” cik ci.

²¹ Abner naw, “Kä na gawt ba ä, düi ä! gakap gui ungka tumat cu gawt ne, ani ung om cicu gut ä” cik ci. Cun ung phi Asahela naw gawt law gäk gäk ci.

²² Abner naw ani cu pyen na ba mä ci, “Kä na gawt ä, düi ä! A i ah kyasei ka ning ngawn vai ah na tha nak ang? Na phäi Joab cu a i hawkcha ka ng’awt püi khai ang?” cik ci.

²³ Cun ung phi Asahela cu kä ng’düm ci; cun ah kyasei Abner naw vang hlat ba neta, apoi ung vawi sei a hnu täng ah ng’täih lawk ci. Asahela cu m’dek ung kyu ne si sei, ani ang yän nak ah hmun ung gawk lawk ci päng cu ng’düm ne ng’düi ci gui.

²⁴ Cun ung phi Joab la Abishai naw Abner cu läk lawk ci goi, hni a hang kyak law vai ung Ammah kho gui ah gawk lawk ci gui, cun cu Giah ah kiang lam, Gibeon bung ah hteh ah lam khan ah om ci.

²⁵ Benjamin pakhui ungka, chang gui naw Abner cu khaai ba mä u neta, m’htung lai ah ami ng’mah nak pyan ne om ci gui.

²⁶ Abner naw Joab cu khü ne, “Mikmi angtäi sei mi ng’tuk khai ma? Ak hnu ah a i phi a bä nak kä om khai, a khaa nak va om khai, cicu kä nami hmu ne ma? Keimi cu nami khaw-chang ah kami kyak ci. Na chang gui naw kä na gawt ba gui khai ah na k’bäi nak vai a i güt lüng ba khai ang?” cik ci.

²⁷ Joab naw, “Kei cu ghing ciah Khanpughi awn ka ng’tam ci nei. Nang naw thu kä na pyen ah akiak vai sü ung ka chang gui naw ngawi ung kho ngawi güt ning k’täm gui khai sü te nei,” cik ci.

²⁸ Cun kawn ah Joab naw Israel gui ami k’täm nak ami düm nak vai ah m’hnüt nak ah k’phyung puuk tum sei; ami ng’tuk nak cu ng’pyi ci.

²⁹ Abner la ak chang gui cu khomü pum Jordan kho nawi kan ne hteit ci gui; ngami cu Jordan tuinu kat ci gui, a ngawi ung kho ngawi pum ung kaan u neta, ngami cu Mahanaim ah gawk ba ci gui.

³⁰ Joab naw ami k’täm nak gui ng’düm neta, ak chang gui m’cut ba gui ci, chang gha lei-kaw cu maih ci, Asahela awn a täng ah.

³¹ David ah chang gui naw Abner ah chang gui Benjamin pakhui 360 ngawn ci gui.

³² Joab la ak chang gui naw Asahela ah gook cu la u ne, Bethlehem ah akyong chang ah phuh hmun ung phuh ci gui. Cun kawn ah ngami cu pum ng’kaan u ne, kho ngawi hta ung Hebron ah gawk ba ci gui.