2 SAMUEL 19 - Cho Bible Common Language 2016

Joab naw David cu Angkhän ah M’cäi ci

¹ Absalom ah phäh ah David thüi ne akyah ah mawng cu Joab am m’thein ci gui.

² Cu hnüüp ung David ah gakap gui ami van ah näng ne ami yei nak cu thüi nak ah ng’lat ci, a i ah kyasei ci ung ghangpughang cu a hta ah phäh ah a thüi kyah ami ng’yak ah phäh ah kyak ci.

³ Ngami cu adüm hta ah mang gaw ah hteit ba ci gui, ng’tuk nak ungka dawng neta thüi ng’a ciah gakap ah mäih ah kyak ci gui.

⁴ Ghangpughang cu a hmai shung neta kyap ne m’lau ci, “O ka hta! Ka hta Absalom! Absalom, ka hta!”

⁵ Joab naw ghangpughang ah im ah hteit neta ani am a pyen nak cu, “Tuh ngawi nang na chang gui cu na ng’a sak gui ci — na hnun ning hun ci gui, na htapami gui, na hta hnumi gui, na chu gui la na chu bawk gui ah hnun hun ci gui ah chang gui.

⁶ Ning m’hni ci hnu ng’tuk püi ne, ning gen ci na k’cang nak ci! Na bawi gui la na chang gui cu nang ah khan ah a i ah kä mawng ci gui ah na pyang pyi ci nei. Keimi kami van si u ne, Absalom a ghin vai sü ung nang ang htei ah na yei khai sü ah kei naw ka hmuk ci nei.

⁷ Tuhbäi hteit ne na chang gui ng’htei cha ba sak gui ä. Kei naw Bawipa ah ming ung ng’phyun ne ka pyen cu, cun ah kä na bi ah akiak ung, ngawi ung khaw ngawi chang tumat phi nang awn a täng ah kä om khai nei. Cun cu na ghin nak avan ung na awt ah akshekha pi k’bäih leibei ah kyak khai nei” cik ci.

⁸ Cun kawn ah ghangpughang cu ng’düi law ne, hteit ne, mang gaw m’kawt pei ah ngok ci. A chang gui naw cu ah a om cu ng’ya u neta, ami van ng’cut ne k’bui lawk ci gui. Cun yah ung Israel chang gui ami van dawng ci gui, ami im phäh phäh ah hteit ba ci gui.

David Jerusalem ah Hteit ba ci

⁹ Khaw avan ung tün ne ami mät gui ng’vaw ng’shang ci gui. Ngami ami mät gui ng’htau u ne, “Ghangpughang David naw mi ga gui ungka na hun gui ci, Ani naw Philistin gui ah kut ungka na gung gui ci, cun ung phi tuhbäi Absalom kyih ne dawng ne mi khaw nawng shüt ci nei.

¹⁰ Mikmi naw Absalom cu mi ghangpughang ah mi hmoh ci nei, cun ung phi ani naw ng’tuk nak ung ngawn ci nei. A i ah kyasei Ghangpughang David cu chang gui naw tha na ne ami law püi ba ang?” cik ci gui nei.

¹¹ Israel chang gui ah ng’htau ah ng’thu cu ghangpughang David ung gawk ba ci. Cun ah kyasei ani naw taigü goi Zadok la Abiathar cu tüi goi ne Judah ng’vai gui cu ng’shi sak gui ci, “A i ah kyasei ghangpughang a mang im ung tha ba nak ung kugam tu vai ah nami shokshü ang?

¹² Nang mi cu ka ning mätyah gui, ka si la ka sa ah nami kyak ci; a i ah kyasei kei na tha ba vai ah nami shokshü ang?” cik ci.

¹³ David naw Amasa am ami m’thein vai ah a pyen nak gui cu, “Nang cu ka ning mätyah nei. Tuhbäi ung tün ne, Joab hnün ung, gakap ung ang vai pi ah ka ning tha ci nei. Cun ah kä ka bi ah a kyak ung Khanpughi naw na m’sih sä!” cik ci.

¹⁴ David ah ng’thu naw Judah chang gui ami van akbe ah bekhüt sak gui ci, ngami naw, a bawi gui ami van nawn ami law ba vai ah ng’thu m’khäh ci gui.

¹⁵ Cun ah kyasei ghangpughang cu Jordan ung gawk lawk ci, Judah chang gui cu ghangpughang hmuk khai gui ah Gilgal ung gawk lawk ci gui, ngami naw tuinu kah nak ung phi ngäng m’htei khai gui.

¹⁶ A cun yah ung Benjamin chang, Bahurim ah ka, Gera ah hta Shimei phi Jordan ung ang ghit ah law ne, Ghangpughang David hmuk khai ah lawk ci.

¹⁷ Ani awn a täng ah Benjamin pakhui ungka chang phia gha law tuk ci gui. Saul changshäm kyong chang ungka Ziba phi a hta gha lei-hma la a changshäm m’ku awn a täng ah law tu u ne, Jordan tuinu pei, ghangpughang ah ma ah gawk lawk ci gui.

¹⁸ Ngami cu tuinu kat u ne, bawi mang gui naw ami kah yah ung m’htei gui ci gui, cun kawn ah ghangpughang ah ang yak hlü phung cu bi pek ci gui. Ghangpughang cu tui kat ge khai ah kya khäta Shimei cu ghangpughang ah ma ah ng’phäi ne kawp neta

David naw Shimei ah Khan ah M’gein nak M’dang ci

¹⁹ a pyen cu, “Bawi mang aw, na bä ni, Jerusalem na nawng shüt hnüüp kei naw ka bi ah hma cu na m’hnih pe ä. Cun k’pang ne kä na hnu en na ä, cun cu kä ngaih-tüh en ba ä.

²⁰ Bawi aw, kei ka hma ciah ka hmat ci nei, Tuh ngawi, ka bawi mang, a siip lam pakhui ungka ak htük bäih ah nang ning hmu lawk ci cu, kei ah kyak ci nei” cik ci.

²¹ Zeruiah ah hta Abishai naw thu pyen ne, “Shimei cu sih nak pek vai kyak ci nei, a i ah kyasei ci ung, ani cu Bawipa naw ghangpughang ah a ghü ah chang a plah tam ah phäh ah kyak ci” cik ci.

²² Cun ung phi David naw Abishai la anau Joab am, “A u naw na ngaih na pyen vai ning shi ne ang? Kei cu tuhbäi Israel ghangpughang tumat ah ka kyak ci, tuh ngawi a u Israel chang phi sih nak kä pek vai” cik ci.

²³ Cun kawn ah ani naw Shimei am, “Kei naw thu khän ne ka pyen cu, nang am sih nak kä ning pek vai nei” cik ci.

David naw Mephibosheth am Amgein nak M’dang ci

²⁴ Cun kawn ah Mephibosheth, Saul ah atu cu ghangpughang hmuk khai ah lawk ci. Ani cu Jerusalem ungka ghangpughang a hteh ungka naw näng ne a law ba ung khüt sei, a khaw kä m’si ne, am gawng mu kä k’teiu ne, a sui kä m’su ne om ciah kyak ci.

²⁵ Mephibosheth cu ghangpughang hmuk khai ah Jerusalem ah ka gawk law khäta, ghangpughang naw ani am, “Mephibosheth, nang cu kei awn a täng ah kä na hteit ci, a i ah kyasei ang?” cik ci.

²⁶ Ani naw, “Ka bawi mang awi, na hmat ah mäih ah, kei cu ka shum ci. Kei naw ka changshäm, laa ung ana taih tu vai, cun ung nang awn a täng ah ka hteit tuk khai ka pyen nak ci. Cun ung phi, ani naw na m’hleei ci.

²⁷ Nang ka Bawimang ah ma ah ani naw a hleei pyen ci. Cun ung phi nang cu Khanpughi ah khanchang ah mäih ah na kyak ci, hman ciah na ngaih cu na bik ci.

²⁸ Kapa ah kyongchang avan cu nang ka bawi mang naw sih nak na pek gui vai kyak ci. Cun ung phi nang naw na tawnglang ung ei tu vai ah na na pek ci. Nang bawi mang ung kei naw ka thäh ba vai cu a i phi kä om ci nei.”

²⁹ Ghangpughang naw, “Nang ung a i phi na pyen ba vai kä om ci. Saul ah khawh cham cu nang la Ziba naw nani ng’pai vai ah kei naw ka k’bäi pyi ci nei” cik ci.

³⁰ Mephibosheth naw, “Ziba naw avan la sä, nang bawi mang phyawng ne im ah na gawk law ba cu kei ah phäh ah bä ci nei” cik ci.

David naw Barzillai Am Gein nak M’dang ci

³¹ Gilead ah ka Barzillai cu Regelim ungka law ne, ghangpughang naw Jordan tuinu ak kah yah ung ngäng m’htei tuk ci.

³² Barzillai cu ang htei ah ghi ci, a khaw kum cheit-kip lawk ci. Ani cu ang htei ah büh mang ci, Mahanaim ung ghangpughang a om yah ung ei vai pe tak ci.

³³ Ghangpughang naw ani am, “Kei awn a täng ah Jerusalem ah law ä, kei naw ka ning m’htei khai nei” cik ci.

³⁴ Barzillai naw, “Kei cu ak shou kä ka ghing ba khai; bawi mang awi, a i vai Jerusalem ah ka hteh tu vai ang?

³⁵ Kei cu ka khaw kum cheit kip law pyi ci, a i naw phi yeikyai nak kä na pek khai. Ka ei ka awk phi atui hlim kä ka hmat hning khai, ng’äi ci gui ah ng’äi m’cu phi kä ka ng’ya thei khai. Nang Bawi mang ah phäh ah kei cu phuih gih ah kyak khai.

³⁶ Shin ah küikyang ciah m’cümhnah nak awn kei kä ka khin kha ci nei. Cun ah kyasei Jordan tui hei ga ah aläk hta bäng nang awn a täng ah ka va hteit tuk khai nei.

³⁷ Cun ah kyasei ka im ah na ng’hlah ba sak ä, ka nupa gui ah ng’cim hmun pei ah ka sik khai nei. Shin cu kei ah hta Chimham nei, nang ah khut bik khai, hteh püi ä, bawi mang aw, nang naw akni pi ah na ngaih cu bi pe ä” cik ci.

³⁸ Ghangpughang naw, “Kei naw ani cu hteh püi ne, nang naw na ng’yak hlü phung cu ka bi pek khai nei. A i phi nang naw na thäh phung cu kei naw ka ning bi pek khai nei” cik ci.

³⁹ Cun kawn ah David la a chang gui ami van naw Jordan tuinu hei kat ci gui. Ani naw Barzillai cu ng’ui ne, hriham pek sei, Barzillai cu a im ah hteit ba ci.

Judah la Israel gui Naw Ghangpughang Ng’cuh ci gui

⁴⁰ Judah chang avan la Israel chang amshah naw ngäng m’htei u sei, ghangpughang naw tui hei kat ci. Ani cu Gilgal ah hteit sei, chimham phi hteit tuk ci.

⁴¹ Israel chang van ghangpughang ah hteit neta ami pyen nak cu, “Bawi mang, a i ah kyasei, kami phäi nau gui, Judah chang gui naw, ngami naw va ami ning lak ba vai, nang, na kyongchang gui la na chang gui, cu ngami naw Jordan kah nak ung va ami ngäng m’htei vai ah ami ngaih ang? cik ci gui.

⁴² Judah chang gui naw, “Ka mi bi hman ci, a i ah kyasei ci ung, ghangpughang cu keimi ungka ah kyak ci. A i ah kyasei cun naw nami m’lung a shet sak ang? Ani naw ei vai na pe gui ne ang? a i bawta na pe gui ne ang?

⁴³ Israel chang gui naw, “Ani cu nangmi ungka ah a kyak pang ung phi, Ghangpughang David cu nangmi ah ta keimi ung a gha ah ng’gui pha pi ci nei. A i ah kyasei keimi nami na kahta nak gui ang? Ghangpughang lak ba vai ah ng’thu pyen ma ci cu, keimi nei, kä nami m’hnih vai!” cik ci gui. Cun ung phi Judah chang gui ah ng’thu cu Israel chang gui ah thu ah ta khäng htek pi ci.