2 SAMUEL 18 - Cho Bible Common Language 2016

Absalom cu Hnim ne Ngawn ci gui

¹ Ghangpughang David naw a chang gui ami van cu m’cut gui neta, phia gha ng’bum, phia ng’bum ciah k’paai gui ci, ngami matawn gui khai ah ang vai gui phi tha pe gui ci.

² Cun kawn ah thum ah k’paai ne tüi gui ci, Joab, la Joab ah nau Abishai, Gath ungka Ittai ni naw tumat ciah matawn ci gui. Cun kawn ah ghangpughang naw ak chang gui am, “Kei ka mät nangmi awn a täng ah ka hteit khai nei” cik ci.

³ Ngami naw, “Nang keimi awn a täng ah kä na hteit khai. Ga gui ah phäh ah kei mi kami van kami dawng ung phi a i kä kyak khai, a yah ng’paai ami na ngawn gui ung phi a i kä kyak khai; cun ung phi nang cu keimi phia, phia ah ta na bä pi ci. Nang shin ung mang gaw ung om ne, na m’htei gui cu bä pi khai nei” cik ci gui.

⁴ Ghangpughang naw, “Nangmi naw ni pi khai ah nami ngaih phung kei naw ka bik khai nei” cik ci. Ani cu m’kawt pei ah ng’düi khäta ak chang gui cu phia gha bum ät, phi bum ät ciah kaan ne hteit ci gui.

⁵ Ani naw khän ne m’cäi gui ci, Joab ni, Absalom ni, Ittai ni gui cu, “Kei ah phäh ah chang nong Absalom cu kä nami ngawn vai nei.” Cun ah a bawi gui David naw am cäi gui cu gakap avan naw ng’yak ci gui.

⁶ David ah gakap gui cu gaw k’pung ah lut law u ne, Ephraim bung ung Israel chang gui tu gui ci gui.

⁷ Israel chang gui cu David ah chang gui naw hnim gui ci gui. Cun cu kyih aih vai kyak ci, cun hnüüp ung chang phia phia m’ku ngawn gui ci gui.

⁸ Ami ng’tuk nak cu khawbung avan ung gawk sei, bung hmu ah sik ci cu, ng’tuk nak ung sik ciah ta däm pi ci.

⁹ Ang ghit ah Absalom naw David ah chang amshah cu hmu gui ci. Absalom cu sela ng’cum ci, ani cu Oak sing ghing ban ung ng’cep shüt ci. Sela cu dawng ngei sei Absalom cu k’pawih shüt ne khaw häu ung ng’bat ci.

¹⁰ David ah chang tumat naw hmu neta, Joab am m’thein ci “Bawi aw, Absalom cu oak sing ghing ung ng’bat sei ka hmuk ci nei!” cik ci.

¹¹ Joab naw, “Na hmuh ah a kyak ung a i ah kyasei a cun ung kä na ngawn ang? Kei ka mät naw ngui phe gha la khei pat ka ning pek khai süte ne” cik ci.

¹² Cun ung phi cun ah chang naw, “Nang naw ngui phia gha na na pek ung phi, kei naw ghangpughang ah hta ah kutpyün phi kä ka tawn khai nei. Nang ni, Abishai ni, Ittai ni am ghangpughang naw thu a ning m’khän gui cu mi van naw mi ng’yak ci nei, ‘Kei ah phäh ah chang nong Absalom cu kä nami ngawn vai.’

¹³ Cun ung phi kei naw ghangpughang ah thu kä ngai ne, Absalom ka ngawn ah akiak ung — Ghangpughang naw ng’ya ba khai, ani naw a päng ng’yak ci — nang naw kä na na shung vong hlawt khai” cik ci.

¹⁴ Joab naw, “Nang awn akhin kä ka ng’pyi sak khai nei” cik ci. Ani naw htei thum la neta, oak sing ghing ung ng’bat ne ghing yah ciah Absalom ah ng’kyang ung ng’täih khai ah shun ci.

¹⁵ Cun kawn ah Joab ah gakap sing gha naw vun u ne Absalom cu ngawn ci gui.

¹⁶ Joab naw ng’tuk nak ng’düm nak vai ah phyung puuk tum sak gui ci, a ga kap gui cu Israel gui ami k’täm nak ungka law ba ci gui.

¹⁷ Ngami naw Absalom ah pum cu la u neta, bung hmu ah ak thuk ah khui ci ung yuk chak ci gui, ak khan ah lung gui akawm awn adäm ah yuk pum shi ci gui. Israel chang gui ami van cu ami im phäh phäh ah dawng ba ci gui.

¹⁸ Amät a ghin yah ung Absalom naw ghangpughang ah khaw nawi ung, amät ah phäh ah lungtung ng’ling ci, a i ah kyasei ci ung ani ung aming m’ghin khai ah a htapa kä om ci. Cun ah kyasei ani naw amät ah ng’ming sui ci, tuh ngawi güt “Absalom ah Lungtung” ah ami hmat ah kyak ci.

Absalom ah Sih David Ami M’thein

¹⁹ Cun kawn ah Ahimaaz ah hta Zadok naw Joab am, “Kei ghangpughang ah dawng ne, Bawipa naw aga gui ah kut ung a hun ah mawng ng’thu ni cu ka m’thein khai nei” cik ci.

²⁰ Joab naw, “Ka, tuh ngawi nang naw a i ng’thu ni phi kä na hteh püi vai. A hnüüp hei ung na bi hning ci, tuh ngawi cu ghangpughang ah hta ah sih nak hnüüp ah kyak ci” cik ci.

²¹ Cun kawn ah ani naw Sudan changshäm am, “Hteit ne ghangpughang am na hmuh cu na m’thein vai” cik ci. Changshäm naw chang m’sui shüt neta dawng ne hteit ci.

²² Ahimaaz naw aküikyang ah, “A i i ah akiak ung phi, a i ah kä ka sui ci; ng’thu ni cu kei am phi na hteh püi sak ä” cik ci. Joab naw, “A i ah kyasei shin ah na bi hlü angka hta aw, shin ah phäh ah a i m’cümhnah nak kä na gah khai nei” cik ci.

²³ Ahimaaz naw pyen ba mä ne, “A i i ah akiak ung phi ka htei hlük ci nei” cik ci. Joab naw, “Hteit ä” cik ci. Cun ah kyasei Ahimaaz cu lam ung dawng ne, Jordan khaw nawi kaan ne, ana hteit ciah changshäm phlän ci.

²⁴ David cu mang gaw m’kawt akyong la ak pung ah ng’lak ung ngok ci. Gaw ngäng ciah chang cu, k’pang ah mawng ah hang kai ne, m’kawt k’cih nak khan ah ng’düi ci; ani naw chang tumat amät dawng law sei hmuk ci.

²⁵ Ani naw ng’khü neta, ghangpughang am m’thein ci; Ghangpughang naw, “Ani amät bäng ah akiak ung, ani naw ng’thu ni law püi ciah kyak khai” cik ci. Dawng cicu ng’et law pi, ng’et law pi ci.

²⁶ Cun kawn ah gaw ngäng ci naw, a hei tumat amät dawng law sei hmu ba ci, ani naw m’kawt ngäng cicu khü neta, “Teng ä, chang tumat dawng law ba ci nei!” cik ci. Ghangpughang naw, “Shin ah chang phi ng’thu ni law püi ciah kyak ci” cik ci.

²⁷ Gaw ngäng ciah chang naw, “Dawng law ma cicu Ahimaaz ah mäih lawk ciah ka hmuk ci nei” cik ci. Ghangpughang naw, “Ani cu chang man, ani naw ng’thu ni law püi ci” cik ci.

²⁸ Ahimaaz naw khü ne, ghangpughang cu yavaih neta, ama ah m’dek ung m’khukdong ne, apyen cu, “Bawipa na Khanpughi cu m’taam nei, nang bawi mang, ning hnu ng’tuk ne, ning tuk püi ci gui ah khan ah ani naw näng nak ning pek ci nei!” cik ci.

²⁹ Ghangpughang naw, “Chang nong Absalom cu phyawng ne ang?” cik ci. Ahimaaz naw, “Bawi aw, na bawi Joab ana tüih law yah ung dämduh ciah thüngkyüng nak ka hmu shüt ci nei, cun ung phi a i cicu kä ka ning m’thein hning ci nei” cik ci.

³⁰ Ghangpughang naw, “Ang nawn law ne ng’düi ä” ci sei, vang nawn ne ng’düi ci.

³¹ Cun kawn ah Sudan changshäm gawk law neta, ghangpughang am, “Ka bawi mang, ng’thu ni ka law püi ci nei! Nang ning hnu ng’tuk ne, ning tuk püi ci gui van ah khan ah tuh ngawi Bawipa naw näng nak ning pek ci nei!” cik ci.

³² Ghangpughang naw, “Chang nong Absalom cu phyawng ne ang?” cine ng’shik ci. Changshäm naw, “Bawi aw, kei naw ka ng’yak hlü cu, ani ah khan ung gawk cicu na ga gui avan la ning hnu tuk püi ci gui avan ah khan ah gawk tu sä” cik ci.

³³ Ghangpughang cu ang htei ah thüi ci. Ani cu m’kawt ah khan, akhan ung hang kai neta thüi ci. Ani thüi ne akyah cu, “O Ka hta! Ka hta Absalom! Absalom ka hta! Nang ah hnün ung kei vah ka sik khai sü, ka hta! Absalom ka hta!”